Search This Blog

Saturday, 24 June 2017

சிரியாவில் அமெரிக்க-ரஷ்ய மோதல் அச்சுறுத்தலுக்கு இடையே

Amid threat of US-Russia clash in Syria
NATO warplane buzzes jet carrying Russian defense minister over Baltic Sea


சிரியாவில் அமெரிக்க-ரஷ்ய மோதல் அச்சுறுத்தலுக்கு இடையே
நேட்டோ போர்விமானம் பால்டிக் கடல் மீது ரஷ்ய பாதுகாப்பு அமைச்சர் சென்ற விமானத்தைச் சுற்றி ரீங்காரமிட்டு பறந்தது

Image source from Internet
நேரடி மோதல் அளவிற்கு சிரியாவில் ரஷ்ய படைகளுடனான பதட்டங்களை அமெரிக்கா தீவிரப்படுத்தி உள்ள நிலையில், ரஷ்யாவின் மேற்கு எல்லைக்கு அருகில் அதன் பொறுப்பற்ற அடாவடித்தனம் ஐரோப்பாவில் அவ்விரு அணுஆயுத சக்திகளுக்கு இடையிலும் ஓர் இராணுவ மோதல் அபாயத்தை அதிகரித்து வருகிறது.
புதனன்று ஒரு நேட்டோ F-16 போர்விமானம் சர்வதேச வான்வழி தடத்தில் பால்டிக் கடல் மீது ரஷ்ய பாதுகாப்பு அமைச்சர் சென்று கொண்டிருந்த அந்நாட்டின் விமானத்தைச் சுற்றி ரீங்காரமிட்டு பறந்தது. வெறும் மூன்று நாட்களுக்கு முன்னர் தான், ஓர் அமெரிக்க போர்விமானம் சிரியாவில் ஓர் அரசு விமானத்தை சுட்டுவீழ்த்தியது, இது 2011 ஆட்சி மாற்றத்திற்கான அமெரிக்க போர் தொடங்கியதற்கு பின்னர் நடந்துள்ள இதுபோன்ற முதல் தாக்குதலாகும். சிரிய ஆட்சியை மாஸ்கோ இராணுவப் படைகள் ஆதரித்து வருகின்ற நிலையில், அமெரிக்காவின் நடவடிக்கை இனிமுதல் ரஷ்யாவின் மேற்கு பகுதி மீது பறக்கும் அமெரிக்க விமானத்தை அது இலக்கில் வைக்கும் என்று மாஸ்கோவை அறிவிக்க தூண்டியது. சிரியாவில் செயல்பட்டு வரும் அமெரிக்க மற்றும் ரஷ்ய விமானங்களுக்கு இடையே மோதல்களைத் தடுப்பதற்காக பயன்படுத்தப்பட்டு வருகின்ற "மோதல் நிறுத்தப்பட்ட" எல்லை கோட்டை ரஷ்யா இனி மதிக்காது என்றும் அது தெரிவித்தது.
நேற்றைய சம்பவத்தில், அமெரிக்க-மேலாதிக்கத்திலான இராணுவ கூட்டணியின் ஒரு போர்விமானம், பால்டிக் கடல் மீது லித்துவேனியா மற்றும் போலாந்துக்கு இடையே ரஷ்யாவின் மேற்கு பகுதியில் அமைந்துள்ளதும், பாதுகாப்பு அமைச்சர் Sergey Shoigu ரஷ்ய இராணுவ அதிகாரிகளைச் சந்திக்க திட்டமிட்டிருந்ததுமான கலினின்கிராடுக்கு பறந்து கொண்டிருந்த ரஷ்ய விமானத்தை நெருங்கியது. ஒரு Su-27 பாதுகாப்பு போர்விமானம் நேட்டோ விமானத்தின் வழியில் குறுக்கிட்டு, அதன் ஆயுதங்களைக் காட்ட அதன் இறக்கைகளை சாய்த்துக்கொண்டபோதுதான், ஊடுருவிய நேட்டோ விமானம் விலகி பறந்து சென்றது.
நேட்டோவின் இந்த அதிக ஆத்திரமூட்டும் நகர்வானது, பால்டிக் பிரதேசத்தில் குறிப்பாக ரஷ்யாவின் மேற்கு விளிம்போரத்தில் உள்ள புற-இராணுவச் சாவடியான கலினின்கிராடு சுற்றுவட்டாரத்தில் அமெரிக்கா-நேட்டோ மற்றும் ரஷ்ய போர்விமானங்களுக்கு இடையே அதிகரித்துவரும் அடிக்கடி எதிர்கொள்ளல்களின் சமீபத்திய எடுத்துக்காட்டு மட்டுமே ஆகும். திங்களன்று, ரஷ்ய எல்லை நோக்கி பறந்து கொண்டிருந்த ஒரு அமெரிக்க RC-135 உளவு விமானம் ஒரு திருப்பம் எடுத்தது, இடைமறிக்கும் நடவடிக்கையில் இறக்கிவிடப்பட்டுள்ள ஒரு பால்டிக் போர்விமானமான Su-27 நோக்கிய ஒரு "ஆத்திரமூட்டும் திருப்பமாக" இதை மாஸ்கோ குறிப்பிட்டிருந்தது.
புதனன்று நேட்டோ வெளியிட்ட ஓர் அறிக்கையில், Shoigu சென்ற விமானம் சம்பந்தப்பட்ட சம்பவத்தை ஒப்புக்கொண்டதுடன், அது பொது வான்வெளியில் நடந்த உண்மையையும் ஒப்புக் கொண்டது. இருப்பினும் வருத்தம் தெரிவிப்பதற்கு பதிலாக, அந்த மேற்கு கூட்டணி, அது உரிய விதத்தில் நடந்து கொண்டதாக தெரிவித்ததுடன், எதிர்காலத்திலும் இதே விதத்தில் செயல்பட அதற்கு சுதந்திரம் இருப்பதாக மறைமுகமாக குறிப்பிட்டது.
கலினின்கிராடில் Shoigu தரையிறங்கியதற்குப் பின்னர், “சில நாடுகள் புவிசார் அரசியல் இலக்குகளை அடைவதற்கு ஒரு கருவியாக இராணுவ பலத்தைப் பயன்படுத்த முனைந்து வருகின்றன,” என்று கூறி, உலகளாவிய பாதுகாப்பிற்கு இடர் உண்டாக்குவதற்காக மேற்கை குற்றஞ்சாட்டினார்.
நேட்டோ மற்றும் ரஷ்ய போர்விமானங்களுக்கு இடையே அபாயகரமான எதிர்கொள்ளல்கள், குறிப்பாக பால்டிக் பிரதேசத்தில் நடைமுறையளவில் அன்றாடம் நடக்கும் நடைமுறைகளாக ஆகியுள்ளன. 2014 பெப்ரவரியில் தேர்ந்தெடுக்கப்பட்ட ரஷ்ய-ஆதரவு அரசாங்கத்தை தூக்கியெறிந்து, கியேவில் ஒரு வெறிபிடித்த ரஷ்ய-விரோத, அதிதீவிர வலது ஆட்சியை நிறுவிய அமெரிக்க மற்றும் ஜேர்மன் ஆதரவிலான ஆட்சிக்கவிழ்ப்பு சதிக்குப் பின்னர் ரஷ்யாவின் மேற்கு எல்லையை ஒட்டி தொடங்கப்பட்ட அமெரிக்க-நேட்டோ அத்துமீறல்களின் விளைவாக, அந்த ஒட்டுமொத்த பகுதியும் ஓர் ஆயுத முகாமாக மாற்றப்பட்டுள்ளது.
பால்டிக் கடல் மீது கூட்டுப்படையின் வான்வெளியை (allied airspace) அணுகிய 32 ரஷ்ய இராணுவ விமானங்களை கடந்த வாரம் நேட்டோ இடைமறித்ததாக திங்களன்று லித்துவேனியாவின் பாதுகாப்பு அமைச்சகம் அறிவித்தது. நேட்டோ மற்றும் கூட்டுப்படையின் அதிவிரைவு விமானங்கள், ஜூன் 12 மற்றும் 18 க்கு இடையே, ரஷ்ய போர்விமானங்கள் மற்றும் குண்டுவீசும் அதிவிரைவு விமானங்களை ஒன்பது முறை சுற்றி வளைத்து விரட்டி அடித்தன என்றும் அது குறிப்பிட்டது.
இத்தகைய சம்பவங்களில் ஏதேனும் ஒன்று, வேண்டுமென்றே நோக்கம் கொண்டோ அல்லது தற்செயலாகவோ, குண்டுவீச்சு தாக்குதலில் அல்லது மோதலில் போய் முடிந்தால், அது ஒட்டுமொத்த உலகையே சாம்பலாக்கிவிடும் அச்சுறுத்தலுடன், அந்த அணுஆயுத சக்திகளுக்கு இடையே ஒரு முழு அளவிலான போரை விரைவிலேயே தூண்டிவிடும்.
எண்ணெய் வளம் மிக்க மத்திய கிழக்கு மற்றும் மத்திய ஆசியாவில் மேலாதிக்கம் கொள்வதற்கும் மற்றும் உலகளாவிய ஆதிக்கத்திற்கு வாஷிங்டனின் மிகப்பெரிய போட்டியாளராக உள்ள சீனாவை கையாள்வதற்கு அது இன்றியமையாததாக காணும் யுரேஷியா கண்டத்தில் ஆதிக்கம் செலுத்துவதற்குமான அதன் உந்துதலுக்கு மாஸ்கோ ஒரு தடையாக இருப்பதை நீக்கும் அதன் மூலோபாயத்தின் பாகமாக, வாஷிங்டன் ரஷ்யாவுடனான மோதலை முன்னெடுத்து வருகிறது.
கிழக்கு ஐரோப்பா மற்றும் பால்டிக் மீதான வான்வெளியில் நேட்டோ-ரஷ்ய எதிர்கொள்ளல்களின் இந்த தற்போதைய கண்மூடித்தனம், நேட்டோவின் கிழக்கு பக்கவாட்டில் நடத்தப்பட்டு வரும் பல தொடர்ச்சியான பரந்த போர் சாகசங்கள் மற்றும் இராணுவ பயிற்சிகளுக்கு இடையே வருகிறது. இவற்றில் எல்லாம், போர்விமானங்கள், டாங்கிகள், கப்பல்கள் மற்றும் நடைமுறையளவில் சகல போர் பரிவாரங்களுடன் சேர்ந்து, இராணுவக் கூட்டணியின் உள்ளேயும் வெளியேயும் உள்ள நாடுகளின் பத்தாயிரக் கணக்கான துருப்புகள் ஈடுபடுத்தப்பட்டுள்ளன.
ஜூன் மாதத்தின் பெரும்பாகத்தில், அமெரிக்க இராணுவம் பால்டிக் பிரதேசத்தில் அங்கே உள்ள அதன் கூட்டாளிகளுடன் சேர்ந்து போர் தாக்குதல் (Saber Strike) என்றழைக்கப்படும் அதன் வருடாந்தர தொடர்ச்சியான கோடைக்கால போர் ஒத்திகைகளை நடத்தி வருகிறது.
இம்மாத தொடக்கத்தில், போலந்து மற்றும் ஜேர்மனியில் நேட்டோ அதன் வருடாந்தர BALTOPS (பால்டிக் நடவடிக்கை) பயிற்சியை நடத்தியது, பெல்ஜியம், டென்மார்க், எஸ்தோனியா, பிரான்ஸ், ஜேர்மனி, லாட்வியா, நெதர்லாந்து, நோர்வே, போலாந்து, இங்கிலாந்து, அமெரிக்கா, பின்லாந்து மற்றும் ஸ்வீடன் உள்ளடங்கலாக 14 நாடுகளின் 6,000 துருப்புகள் இதில் ஈடுபடுத்தப்பட்டன. சுமார் 50 கப்பல்கள் மற்றும் நீர்மூழ்கிக்கப்பல்களும், B-1 மற்றும் B-52 குண்டுவீச்சு விமானங்கள் உட்பட 50 க்கும் அதிகமான போர்விமானங்களும் இதற்காக ஒருங்கிணைக்கப்பட்டிருந்தன.
பால்டிக் கடலில் போலாந்தின் Ustka இல் கடற்கரையையே புரட்டிப்போட்ட ஒரு பயிற்சியைக் குறித்து அங்கிருந்தே ஒரு புகைப்பட செய்தியறிக்கையை ரூபேர்ட் முர்டோச்சின் Sun சிற்றிதழ் வழங்கியது, அதில் அப்பத்திரிகை ஆர்வத்துடன் எழுதுகையில், “சிப்பாய்களும் வாகனங்களும் கடற்கரையில் ஈடுபட்டிருந்த நிலையில், விமானங்கள் படையின் பயங்கர காட்சியை காட்டுவதில் தலைக்கு மேல் ரீங்காரமிட்டு பறந்தன,” என்று குறிப்பிட்டது. “நாங்கள் பயிற்சி செய்ய விரும்புகிறோம் மற்றும் கடலிலும் கடலில் இருந்தும் பலத்தைக் காட்டுவதை மற்றும் கடல் மீதான கட்டுப்பாட்டை வழங்குவதற்கான ஆற்றலை எடுத்துக்காட்ட விரும்புகிறோம்,” என்று அமெரிக்க கடற்படை அட்மிரல் கிறிஸ்டோபர் கிராடி கூறியதை அக்கட்டுரை மேற்கோளிட்டது.
“Noble Jump 17” என்று குறிப்பிடப்பட்ட ரஷ்யாவிற்கு எதிராக திருப்பி விடப்பட்ட மற்றொரு பயிற்சி, இம்மாதம் ருமேனியாவின் சிர்சுவில் நடத்தப்பட்டது. நேட்டோவின் அதிவிரைவு தயார்நிலை கூட்டு நடவடிக்கை படையை பரிசோதிக்க வடிவமைக்கப்பட்ட அது, இங்கிலாந்து, அமெரிக்கா, ருமேனியா, நெதர்லாந்து, அல்பேனியா, ஸ்பெயின், போலாந்து மற்றும் நோர்வே இல் இருந்து துருப்புக்களை உள்ளெடுத்து இருந்தது.
முடிவில்லாமல் தொடர்ச்சியான போர் சாகசங்கள் மற்றும் இராணுவ பயிற்சிகளுக்குக் கூடுதலாக, 20 ஆண்டுகளுக்கு முன்னர் கையெழுத்தான நேட்டோ-ரஷ்ய ஸ்தாபக சட்டத்தை மீறி, 6,000 சிப்பாய்களைக் கொண்ட மொத்தம் நான்கு போர் குழுக்கள், நடைமுறையளவில் நிரந்தர நிலைநிறுத்தலாக, பால்டிக் நாடுகள் மற்றும் போலாந்தில் நிலைநிறுத்தப்பட்டு வருகின்றன. இதற்கும் கூடுதலாக, 10,000 பேர் கொண்ட பிரத்யேக பலமான படைப்பிரிவு ஒன்றும் ருமானியாவில் நிறுவப்பட்டு வருகிறது மற்றும் 10,000 துருப்புகளை உள்ளடக்க உள்ள ஒரு டாங்கி படைப்பிரிவும் போலாந்தில் அமெரிக்காவினால் நிலைநிறுத்தப்பட்டு வருகிறது.
அமெரிக்கா தலைமையில் ஏகாதிபத்திய சக்திகளின் அட்டூழியங்களுக்கு ஜனாதிபதி விளாடிமீர் புட்டினின் ஆட்சியிடம் எந்த நம்பகமான அல்லது முற்போக்கான பதிலும் இல்லை. ஸ்ராலினிச அதிகாரத்துவத்தின் கரங்களில் 1991 சோவியத் ஒன்றியம் கலைக்கப்பட்டதை தொடர்ந்து, அரசு சொத்துக்களைச் சூறையாடியதன் மூலமாக அதன் ஆரம்ப செல்வவளங்களைக் குவித்துக் கொண்டிருந்த முதலாளித்துவ செல்வந்த தட்டை அவர் ஆட்சி பிரதிநிதித்துவம் செய்கிறது. அது மேற்கத்திய அத்துமீறல்களுக்கு ஒரு பாதுகாப்பு விடையிறுப்பு எடுக்கப்படுவதாக அதன் சொந்த இராணுவ சாகசங்களையும் அத்துடன் வாஷிங்டன் மற்றும் ஐரோப்பிய சக்திகளுடனான ஓர் உடன்பாட்டிற்கு முறையீடுகளையும் ஒருங்கிணைத்துக் கொண்டுள்ளது—இது ஐரோப்பா மற்றும் சர்வதேச அளவில் தொழிலாள வர்க்கத்தை ஐக்கியப்படுத்துவதற்கான சகல முயற்சிகளுக்கும் எதிராக தீவிர ரஷ்ய தேசியவாதத்தின் அடிப்படையில் ஒரு பிற்போக்குத்தனமான கலவையாக உள்ளது.
சென்ற ஆண்டு இறுதியில், அமெரிக்க-நேட்டோ ஆத்திரமூட்டல்களுக்கான விடையிறுப்பில், ரஷ்யா கலினின்கிராடில் அணுஆயுதமேந்தும் ஆற்றல் கொண்ட பெருந்தொலைவுக்குப் பாயும் ஏவுகணைகளை நிலைநிறுத்தியது. இந்த வாரயிறுதியில், அதன் எல்லையோரங்களில் தற்போதைய நேட்டோ ஆயத்தப்படுத்தல்களுக்கு இடையே, அது பால்டிக் கடலில் சீன கடற்படை கப்பல்களுடன் இரண்டு திட்டமிடப்பட்ட இராணுவ பயிற்சிகளை மேற்கொண்டது. அமெரிக்க ஜனாதிபதி டொனால்ட் ட்ரம்ப் ஜேர்மனியின் ஹம்பேர்க்கில் ஜி20 உச்சிமாநாட்டிற்கு வருகையில் அவரது போலாந்திற்கான விஜயத்தைப் பின்தொடர்ந்து, படைகளது இரண்டாவது சாகசக் காட்சி ஜூலை இறுதியில் திட்டமிடப்பட்டுள்ளது.
Shoigu இன் விமானத்திற்கு நேட்டோ அச்சுறுத்தல் வருவதற்கு ஒரு நாள் முன்னதாக, செவ்வாயன்று, ட்ரம்ப் வெள்ளை மாளிகையில் உக்ரேனிய ஜனாதிபதி பெட்ரோ பொறோஷென்கோவைச் சந்தித்தார். அவ்விரு தலைவர்களும் கூட்டாக மேடையில் தோன்றுவதற்கு ஒரு மணி நேரங்களுக்கு முன்னதாக, அமெரிக்க நிதித்துறை செயலர் ஸ்டீவன் மினுசின் அறிவிக்கையில் உக்ரேனில் அதன் குற்றகரமான அத்துமீறல்களுக்காக ரஷ்யா மீது வாஷிங்டன் புதிய தடையாணைகளை விதிப்பதாக அறிவித்தார்.
இந்த நடவடிக்கையில் முந்தைய கடுமையான நடவடிக்கையில் இலக்கில் வைக்கப்பட்ட பட்டியலில் இருந்த தனிநபர்கள் மற்றும் நிறுவனங்களுடன் மேலும் 38 பேர் சேர்க்கப்பட்டனர், இது மொத்த எண்ணிக்கையை 160 தனிநபர்கள் மற்றும் 400 நிறுனங்களாக கொண்டு வந்துள்ளது. புதிதாக தடைவிதிக்கப்பட்டவர்களின் சொத்துக்கள் முடக்கப்படும் என்பதுடன், அவர்கள் அமெரிக்க பிரஜைகள் மற்றும் நிறுவனங்களுடன் வணிகம் செய்யவோ அல்லது அமெரிக்காவில் இருந்து நிதி திரட்டவோ தடுக்கப்படுவார்கள். இந்த 38 பேர் கொண்ட பட்டியலில் இரண்டு கீழ்மட்ட ரஷ்ய அரசு அதிகாரிகள் மற்றும் புட்டினுக்கு நெருக்கமான பல தனிநபர்களும் உள்ளடங்குவர்.
ட்ரம்ப் பொறோஷென்கோ உடனான அவர் சந்திப்பைக் குறைத்துக்காட்டி, உக்ரேனில் ரஷ்யாவின் பாத்திரம் குறித்து ஒன்றும் கூறவில்லை என்றாலும், அந்த அமெரிக்க கைப்பாவை அரசாங்கத்தின் தலைவருக்கு பென்டகனில் ஒரு கதாநாயகனின் வரவேற்பு வழங்கப்பட்டதுடன், பாதுகாப்பு செயலர் மற்றும் முன்னாள் கடற்படை தளபதி ஜேம்ஸ் மாட்டிஸ் அமெரிக்காவின் முழு ஆதரவை சூளுரைத்து, உக்ரேனிய "இறையாண்மைக்கும்" மற்றும் "சர்வதேச விதிமுறைகளுக்கும்" மற்றும் "சர்வதேச ஒழுங்குமுறைக்குமான" அச்சுறுத்தல்களை கண்டனம் செய்தனர். பென்டகன் செய்தி தொடர்பாளர் ஒருவர் கூறுகையில் கிழக்கு உக்ரேனில் ரஷ்ய-ஆதரவு பிரிவினைவாதிகளுடன் சண்டையிட கியேவ் அரசாங்கத்திற்கு அமெரிக்கா அபாயகரமான ஆயுதங்களை வினியோகிக்கும் சாத்தியக்கூறை அது இன்னும் கைவிடவில்லை என்று தெரிவித்தார்.
புதிய தடையாணைகளுக்கு விடையிறுப்பாக, ரஷ்ய துணை வெளியுறவுத்துறை அமைச்சர் Sergey Ryabkov புதனன்று கூறுகையில், அரசியல் விவகாரங்களுக்கான அமெரிக்க வெளியுறவுத்துறை துணை செயலர் தோமஸ் ஷேனன் ஜூனியர் உடன் வெள்ளிக்கிழமை திட்டமிடப்பட்டிருந்த செயின்ட் பீட்டர்ஸ்பேர்க் சந்திப்பு இரத்து செய்யப்பட்டிருப்பதாக தெரிவித்தார். கிரெம்ளின் பத்திரிகைத்துறை செயலர் டிமிட்ரி பெஸ்கொவ் கூறுகையில், அமெரிக்கா ரஷ்யா மீது தொடர்ந்து புதிய தடையாணைகளைக் கொண்டு வந்தால், மாஸ்கோ "விடயங்களைப் பரஸ்பரமாக்கியும்" மற்றும் அமெரிக்கா மீது தடையாணைகளை கொண்டு வந்தும் விடையிறுக்கும் என்றார். “சாத்தியமான தடையாணைகளின் நீண்ட பட்டியல்" ஒன்று தயாரிக்கப்பட்டு வருவதாக அவர் தெரிவித்தார்.
By Barry Grey
22 June 2017

தமிழ் கட்சியில் உள்மோதல் இலங்கையில் ஆழமான அரசியல் நெருக்கடியைக் குறிக்கிறது

Infighting in Tamil party signifies deep political crisis in Sri Lanka

Image source from Internet
லங்கையின் வடக்கு மாகாண சபையின் முதலமைச்சர் சி.வி. விக்னேஸ்வரனுக்கும் தமிழ்த் தேசியக் கூட்டமைப்பு தலைமைத்துவத்துக்கும் இடையில், கடந்த வாரம் வெடித்த ஒரு கன்னை மோதல், நேற்று ஒரு அரசியல் சமரசத்திற்கு பின்னர் முடிவுக்கு வந்தது.
2013ல் நடந்த தேர்தலில் தமிழ் கூட்டமைப்பின் முன்னணி வேட்பாளராக நியமிக்கப்பட்ட பின்னர், ஓய்வுபெற்ற உயர் நீதிமன்ற நீதிபதியான விக்னேஸ்வரன், வட மாகாண சபை முதலமைச்சர் ஆனார். அவர் கூட்டமைப்பின் உறுப்பினராக இல்லாத போதிலும், கொழும்பு ஸ்தாபனத்தாலும் சர்வதேச சக்திகளாலும் ஒரு பொருத்தமான நபராக கருதப்பட்டதால், தமிழ் கூட்டமைப்பின் தலைவர் ஆர். சம்பந்தனால் அமைப்புக்குள் கொண்டுவரப்பட்டார்.
எனினும், கடந்த வாரம் விக்னேஸ்வரன் இரண்டு வடமாகாண அமைச்சர்களை ஊழல் குற்றச்சாட்டுகள் காரணமாக பதவி நீக்கியதுடன், இன்னும் இரண்டு பேரை கட்டாய விடுமுறையல் செல்ல நிர்ப்பந்தித்தை அடுத்து, தமிழ் முதலாளித்துவ உயரடுக்கின் உள்ளேயான இந்த வேறுபாடுகள் வீதிக்கு வந்தன. இந்த நான்கு அமைச்சர்களும் தமிழ் தேசியக் கூட்டமைப்பின் தலைமைத்துவத்தில் உள்ள கட்சியான இலங்கை தமிழரசுக் கட்சியின் உறுப்பினர்களாவர்.
ஆர்.சம்பந்தன் மற்றும் எம்.ஏ. சுமந்திரன் உள்ளிட்ட தமிழ் கூட்டமைப்பு தலைவர்கள், முதலமைச்சரின் தீர்ப்பை எதிர்த்ததோடு, இரண்டு அமைச்சர்களை கட்டாய விடுமுறையில் அனுப்புவது எதேச்சதிகார முடிவு என அறிவித்தனர். தமிழரசுக் கட்சி மாகாணசபை உறுப்பினர்கள் விக்னேஸ்வரனுக்கு எதிரான நம்பிக்கையில்லா பிரேரணையை வடமாகாண சபையில் கொண்டுவந்ததன் மூலம் இதற்குப் பதிலளித்தனர்.
இதற்கு எதிர் நடவடிக்கையாக, தமிழ் கல்வியாளர்கள் குழுவான தமிழ் மக்கள் பேரவையும் யாழ்ப்பாண பல்கலைக்கழக மாணவர் ஒன்றியமும் யாழ்ப்பாணத்திலும் ஏனைய வடக்கு நகரங்களிலும் விக்னேஸ்வரனை ஆதரிக்கும் ஆர்ப்பாட்டங்களை ஏற்பாடு செய்தன. ஈழ மக்கள் விடுதலை முன்னணி (ஈ.பி.ஆர்.எல்.எப்), தமிழீழ மக்கள் விடுதலை அமைப்பு (புளொட்), தமிழ் ஈழ விடுதலை இயக்கம் (டெலோ) ஆகியவற்றையும் உள்ளடக்கிய தமிழ் மக்கள் பேரவையும், தமிழ் கூட்டமைப்பின் பங்காளிகள் ஆகும். மற்றொரு இனவாத கட்சியான தமிழ் தேசிய மக்கள் முன்னணியும், தமிழ் மக்கள் பேரவையில் அங்கம் வகிக்கின்றது. விக்னேஸ்வரனுக்கு ஆதரவு திரட்டும் முயற்சியில், இந்த அமைப்புகள் அவரை ஊழலுக்கு எதிரான போராளியாகவும், தமிழர்களின் உரிமைகளின் காவலனாகவும் சித்தரித்தன.
ஊழல் செய்த அமைச்சர்களுக்கு எதிரான விக்னேஸ்வரனின் நடவடிக்கைகளுக்கும் தமிழ் வெகுஜனங்களின் உரிமைகளைக் காப்பதற்கும் இடையில் எந்த சம்பந்தமும் கிடையாது. ஆனால் தமது நலன்களை எப்படி பாதுகாப்பது என்பது பற்றி தமிழ் செல்வந்த தட்டிற்குள் நிலவும் தந்திரோபாய வேறுபாடுகளையே இது பிரதிபலிக்கிறது. இராணுவ ஆக்கிரமிப்பு, அடிப்படை ஜனநாயக உரிமைகள் நசுக்கப்படுதல் மற்றும் கொடூரமான வாழ்க்கை நிலைமைகள் சம்பந்தமாக, தமிழ் கூட்டமைப்பிற்கும் கொழும்பு அரசாங்கத்துக்கும் எதிராக, இலங்கையின் வடக்கு மற்றும் கிழக்கில் தமிழ் உழைக்கும் மக்கள் மற்றும் இளைஞர்களின் மத்தியில் ஆழ்ந்த வளர்ச்சியடைந்து வரும் கோபமுமே இந்த மோதல்களுக்கு பின்னணியில் உள்ளன.
கொழும்பை பற்றியும் வடக்கின் இராணுவ ஆக்கிரமிப்பு பற்றியும் மட்டுப்படுத்தப்பட்ட விமர்சனங்களையே செய்யும் விக்னேஸ்வரன், வெகுஜன கோபத்தையும் எதிர்ப்பையும் இனவாத வழிவகைகளில் திசைதிருப்புவதற்கு முயற்சிக்கிறார்.
எவ்வாறாயினும், தமிழ் கூட்டமைப்பு, இலங்கை அரசாங்கம் மற்றும் இராணுவத்தின் பிரிவுகள், விக்னேஸ்வரனும் அவரது ஆதரவாளர்களும் நாடு முழுவதும் ஆழமடைந்து வரும் அரசியல் ஸ்திரமின்மையை இன்னும் அதிகரிக்கச் செய்கின்றனர் என கவலை கொண்டுள்ளனர். வடக்கிலும் கிழக்கிலுமான அதிருப்தி, நாட்டில் தென் பகுதியில் தொழிலாளர்கள், ஏழைகள் மற்றும் இளைஞர்கள் மத்தியில் அரசாங்கத்துக்கு எதிரான பகைமை வளர்ச்சியடைகின்ற நிலைமையிலேயே வெடித்துள்ளது.
நேற்று, கொழும்பை தளமாகக் கொண்ட டெயிலி மிரர் பத்திரிகை, இலங்கையில் பல உயர் ஸ்தானிகரகங்களும் தூதரகங்களும் "தமிழ் கூட்டமைப்பு தலைமைத்துவத்தை பிரச்சினையை இணக்கமாக தீர்த்துக்கொள்ளுமாறு கேட்டுக் கொண்டன" என்று கூறியுள்ளது. செய்தித்தாள் அவர்களின் பெயர்களை கூறாவிட்டாலும் அமெரிக்க, ஐரோப்பிய ஒன்றிய, பிரித்தானிய மற்றும் இந்திய இராஜதந்திரிகள் அனைவரும், இலங்கையில் அரசியல் அபிவிருத்தியை நெருக்கமாக அவதானித்து வருகின்றனர். இந்த சக்திகள், குறிப்பாக வாஷிங்டன் மற்றும் புது தில்லியும், சீனாவிற்கு எதிரான தமது நடவடிக்கைகளுக்கு இணங்க இலங்கையில் ஒரு உறுதியான மூலோபாய பிடியை வைத்திருக்க முனைகின்றன.
இந்த கோரிக்கைகளுக்கு பிரதிபலித்த விக்னேஸ்வரன், நேற்று இரண்டு அமைச்சர்களுக்கு எதிரான கட்டாய விடுமுறையை இரத்துச் செய்ய உடன்பட்டதுடன், தனது எதிர்ப்பாளர்களுடன் சமரசத்திற்கு வந்தார். தன் பங்கிற்கு, கூட்டமைப்பின் தலைவர் சம்பந்தன், இரண்டு அமைச்சர்களுக்கு எதிரான ஊழல் விசாரணையில் தலையிட மாட்டேன் என வாக்குறுதியளித்ததுடன் விக்னேஸ்வரனுக்கு எதிரான நம்பிக்கையில்லா பிரேரணையை சுருட்டிக்கொள்ளவும் உடன்பட்டார்.
2013ல் நடந்த வட மாகாண சபை தேர்தல், தமிழீழ விடுதலைப் புலிகளுக்கு எதிரான யுத்தத்தின் போது நடந்த மனித உரிமை மீறல்கள் தொடர்பாக சர்வதேச அழுத்தத்தை எதிர்கொண்ட ஜனாதிபதி மஹிந்த இராஜபக்ஷவின் கீழ் ஏற்பாடு செய்யப்பட்டதுடன், அவர் தமிழ் உயரடுக்கை சமாதானப்படுத்தவும் விரும்பினார். ஏனைய மேற்கத்திய சக்திகளின் ஆதரவுடன் வாஷிங்டனின் முக்கிய அக்கறை, இராஜபக்ஷவை அரசியல் ரீதியாகவும், பொருளாதார ரீதியாகவும் அவரது அரசாங்கத்தை சீனாவிலிருந்து தூக்கி நிறுத்துவதற்கு நெருக்குவதாகும்.
2015ல், இராஜபக்ஷவை பதவி நீக்கி, மைத்திரிபால சிறிசேனவை பதவியில் அமர்த்த வாஷிங்டனால் திட்டமிடப்பட்ட ஆட்சி மாற்ற நடவடிக்கையை தமிழ் கூட்டமைப்பு முழுமையாக ஆதரித்தது. சிறிசேன தமிழ் மக்களுக்கு ஜனநாயகம், நல்லிணக்கம் மற்றும் மேம்பட்ட சமூக நிலைமைகளை கொண்டுவருவார் எனத் தமிழ் தேசியக் கூட்டமைப்பு பொய்யாக பிரச்சாரம் செய்து, அவருக்கு வாக்களிக்க மக்களை வலியுறுத்தியது.
"ஜனநாயகம்" மற்றும் "நல்லிணக்கம்" என்பதன் மூலம் தமிழ் தேசியவாதிகள் அர்த்தப்படுத்துவது தமிழ் தொழிலாளர்களையும் இளைஞர்களையும் சுரண்டுவதற்காக கொழும்புடன் ஒரு அதிகாரப் பகிர்வு ஒழுங்கை ஏற்படுத்திக்கொள்வதையே ஆகும். கொழும்பில் ஆட்சி மாற்றத்திற்கான திமழ் கூட்டமைப்பின் ஆதரவு, இன்னும் கூடுதலான சலுகைகள் பெறுவதற்கான எதிர்பார்ப்பில், அமெரிக்க ஏகாதிபத்தியத்திற்கு தமிழ் உயரடுக்கு அடிமைச் சேவை செய்வதன் ஒரு புதிய கட்டத்தை பிரதிபலித்தது.
கடந்த 30 மாதங்களில் இலங்கை அரசாங்கம், கொழும்பின் வெளியுறவுக் கொள்கையை அமெரிக்க மற்றும் இந்திய கோரிக்கைகளுக்கு இணங்கும் பாதையில் கொண்டுவந்துள்ளது. சிறிசேன மற்றும் பிரதமர் ரணில் விக்கிரமசிங்கவும், இரு நாடுகளுடனும் தமது இராணுவ உறவுகளை பலப்படுத்தியுள்ளனர். இந்த அரசாங்கம் இலங்கையின் பெருகிவரும் பொருளாதார நெருக்கடியின் சுமை தொழிலாள வர்க்கத்தின் மற்றும் ஏழைகளின் முதுகில் சுமத்த சர்வதேச நாணய நிதியத்தின் கோரிக்கைகளையும் நடைமுறைப்படுத்துகின்றது.
சிறிசேன மற்றும் விக்கிரமசிங்கவின் ஸ்திரமற்ற "ஐக்கிய அரசாங்கத்தை" அடுத்து இலங்கை பாராளுமன்றத்தில் தமிழ் கூட்டமைப்பே மிகப்பெரிய குழுவாகும். பாராளுமன்ற எதிர்க்கட்சித் தலைவராக சம்பந்தன் இருக்கும் அதே வேளை, ஏறத்தாழ அரசாங்கத்தின் ஒரு பங்காளியாக செயற்படும் தமிழ் கூட்டமைப்பு, அதன் சிக்கன நடவடிக்கைகள் மற்றும் ஜனநாயக விரோத செயற்பாடுகளுக்கு ஆதரவளிக்கும் அதே சமயம், முகத்தை காத்துக்கொள்ளும் விமர்சனங்களையும் முன்வைக்கின்றது.
நாட்டின் அழிவுகரமான இனவாத யுத்தம் முடிந்து எட்டு ஆண்டுகளுக்குப் பின்னர், கிட்டத்தட்ட வடக்கு மற்றும் கிழக்கை இலங்கை இராணுவமே ஆளுகின்றது. தொடரும் இராணுவ ஆக்கிரமிப்பு மீது ஆழமான எதிர்ப்பு நிலவும் அதே வேளை, தமிழ் தேசியக் கூட்டமைப்பானது இலங்கை அரசாங்கத்துக்கு முண்டுகொடுத்து, இராணுவத்தின் யுத்த குற்றங்கள் சம்பந்தமான ஒரு சர்வதேச விசாரணையை தடுக்க அது எடுக்கும் முயற்சிகளையும் ஆதரிக்கின்றது.
வட மாகாணத்தில், போரின் போது இராணுவம் கைப்பற்றிக்கொண்ட நிலங்களை தருமாறு கோரியும் மோதலின் போது "காணாமற் போனவர்களை" பற்றிய தகவல்களை கோரியும் தொடர்ச்சியான ஆர்ப்பாட்டங்கள் இடம்பெறுகின்றன. வேலைவாய்ப்பின்மை பெருகியுள்ளதுடன், போரில் வீடுகள் அழிக்கப்பட்ட ஆயிரக்கணக்கானவர்கள் இன்னும் தற்காலிக குடிசைகளில் வசிக்கின்றனர்.
2015 இறுதியில், இந்த புகைந்துகொண்டிருக்கும் வெகுஜன அதிருப்தியை இனவாத வழியில் திசை திருப்பும் முயற்சியில், விக்னேஸ்வரன் தமிழ் மக்கள் பேரவையை ஸ்தாபிக்க பல குழுக்களுடன் இணைந்து கொண்டார். தமிழ் மக்கள் பேரவையானது கடந்த செப்டெம்பரில் வடக்கிலும் இந்த பெப்பிரவரியில் கிழக்கிலும், தமிழர்களின் அபிலாஷைகளை "சர்வதேச சமூகத்துக்கு” எடுத்துச் செல்வது என்ற பதாகையின் கீழ் எழுக தமிழ் ஆர்ப்பாட்டங்களை ஏற்பாடு செய்திருந்தது.
போரில் கொல்லப்பட்ட தமிழர்களை நினைவுகூறுவதற்கு மே 18 நடைபெற்ற ஒரு கூட்டத்தில், "இராணுவத்தை வெளியேற்றக் கோரி மக்கள் வீதிக்கு இறங்கும் நாள் தொலைவில் இல்லை" என்று விக்னேஸ்வரன் பிரகடனம் செய்தார். இந்த வாய்ச்சவடால் அறைகூவல், எதிர்ப்பு வளர்வதையிட்டு கொழும்புக்கு விடுக்கும் எச்சரிக்கையாக இருந்தது. "இராணுவத்தை திரும்பப் பெற முடியாது" என்று "போர் வீரர்களை" நினைவுகூரும் ஒரு கூட்டத்தில் சிறிசேன பதிலளித்தார்.
சர்வதேச ரீதியில் வர்க்கப் போராட்டங்கள் அபிவிருத்தியடையும் சூழ்நிலையில், சிங்கள, தமிழ் மற்றும் முஸ்லீம்களுமாக இலங்கை முதலாளித்துவத்தின் ஒவ்வொரு பிரிவினரும், இன பேதங்களைக் கடந்து இலங்கைத் தொழிலாளர்களின் ஒன்றுபட்ட போராட்டத்தின் ஆபத்தை பற்றி கவலைப்படுகின்றனர். சிறிசேன-விக்கிரமசிங்க அரசாங்கம், இராஜபக்ஷவின் எதிர்க் கட்சி மற்றும் இராணுவமும், வடபகுதியில் அபிவிருத்தியடைந்து வரும் போராட்டங்களை கண்டனத்துடன் நோக்குவதோடு, தொழிலாள வர்க்கத்தை பிளவுபடுத்துவதற்கான முயற்சியில் சிங்கள இனவாதத்தை தூண்டிவிடுகின்றன.
தமிழ் தொழிலாளர்கள் மற்றும் இளைஞர்கள், தமிழ் தேசியக் கூட்டமைப்பினதும் விக்னேஸ்வரனை சூழவுள்ள குழுவும் ஆற்றும் துரோக பாத்திரத்தை நிராகரிக்க வேண்டும். இவர்களுக்கு தமிழ் தொழிலாளர்களினதும் ஏழைகளினதும் அடிப்படை உரிமைகள் மற்றும் வாழ்க்கைத் தரங்களுக்காகப் போராடுவதில் எந்த ஆர்வமும் கிடையாது. புலிகளைப் போலவே, இந்த அமைப்புகளும் தங்கள் தேசியவாத கொள்கைகளை மேம்படுத்துவதுடன், பிரதான ஏகாதிபத்திய சக்திகளுக்கு அழைப்பு விடுத்து தங்கள் சலுகைகளை பாதுகாக்கின்றன.
தேசிய முதலாளித்துவ வர்க்கத்தின் ஒவ்வொரு பிரிவினருக்கும் ஏகாதிபத்திய சக்திகளுக்கும் எதிரான போராட்டத்தில் ஒரு சோசலிச மற்றும் சர்வதேசிய வேலைத்திட்டத்தின் அடிப்படையில் போராடுவதன் மூலமே, தொழிலாளர்கள் மற்றும் ஏழைகளால் தங்கள் ஜனநாயக உரிமைகளை வென்றெடுக்கவும் தமது சமூக நிலைமையை மேம்படுத்தவும் முடியும். தெற்காசியாவிலும் மற்றும் சர்வதேச அளவிலும் சோசலிசத்துக்கான போராட்டத்தின் பாகமாக, ஸ்ரீலங்கா-ஈழம் சோசலிசக் குடியரசின் வடிவில் தொழிலாளர் மற்றும் விவசாயிகளின் அரசாங்கத்திற்காகப் போராடுவது இதன் பாகமாகும். இந்த முன்னோக்கிற்காக சோசலிச சமத்துவக் கட்சி மட்டுமே போராடுகிறது.
By K. Ratnayake
21 June 2017
http://www.wsws.org/tamil/articles/2017/6-Jun/npcs-j22.shtml

Thursday, 22 June 2017

இந்தியாவும், பாகிஸ்தானும் ஷங்காய் கூட்டுழைப்பு அமைப்பில் இணைக்கப்பட்டன

India and Pakistan admitted to Shanghai Cooperation Organisation

Image source from Internet
ந்தியாவிற்கும் அதன் பரம எதிரியான பாகிஸ்தானுக்கும் இடையே அதிகரித்துவரும் விரோதப் போக்கிற்கு மத்தியில், ஷங்காய் கூட்டுழைப்பு அமைப்பின் (Shanghai Cooperation Organisation-SCO) வருடாந்திர உச்சிமாநாடு கடந்த வாரம் காஜக்ஸ்தானில் இரண்டு நாட்களுக்கு நடைபெற்றபோது இவ்விரு நாடுகளுக்கும் இந்த அமைப்பின் முழு உறுப்பினராவதற்கு அனுமதி வழங்கப்பட்டது.
மத்திய ஆசியா மற்றும் காஸ்பியன் பிராந்தியத்தில் அமெரிக்க புவிசார் அரசியல் மூலோபாயத்திற்கு பதிலடி கொடுக்கும் விதமாக அங்கு ரஷ்யாவும், சீனாவும் மேலாதிக்கம் செய்யக்கூடிய பிராந்திய அமைப்பு ஸ்தாபிக்கப்பட்டுள்ளது. இது, காஜகஸ்தான், உஸ்பெகிஸ்தான், தஜிகிஸ்தான் மற்றும் கிர்கிஸ்தான் போன்ற பல மத்திய ஆசிய நாடுகளை உள்ளடக்கியுள்ளது.
இந்த அமைப்பின் இரண்டு மிகமுக்கிய சக்திகளாக இருந்த ரஷ்யாவிற்கும், சீனாவிற்கும் இடையிலான வேறுபாடுகள் காரணமாக 2005 இல் இந்தியாவுக்கும், பாகிஸ்தானுக்கும் உறுப்பினர் அனுமதி வழங்கப்படவில்லை. ரஷ்யா அதன் பல தசாப்தகால நட்பு நாடான இந்தியாவை இந்த அமைப்பின் முழு உறுப்பினராக்குவதற்கு அழுத்தம் கொடுத்துவந்த நிலையில், இதேபோன்ற காரணங்களுக்காக சீனாவும் பாகிஸ்தானுக்கு ஆதரவளித்தது. சமீபத்திய ஆண்டுகளில், வாஷிங்டனின் ஆக்கிரோஷமான மற்றும் மோதல் போக்குடனான நிலைப்பாட்டுக்கு விடையிறுப்பாக, ரஷ்யாவும், சீனாவும் ஒன்றாக இணைந்து இந்தியாவும், பாகிஸ்தானும் இந்த அமைப்பில் முழு உறுப்பினர்களாவதற்கு வழிவகை செய்ய ஒப்புக்கொண்டனர்.
அமெரிக்கா அதன் இராணுவ மூலோபாய செயற்பட்டியலில் சீனாவிற்கு எதிராக இந்தியாவை ஒருங்கிணைக்க அதன் முயற்சிகளை தீவிரப்படுத்தியுள்ளதுடன், மோடி அரசாங்கத்தின் கீழ், பெய்ஜிங்கிற்கு எதிரான வாஷிங்டனின் யுத்தத் தயாரிப்புகளில் இந்தியாவை ஒரு முன்னணி நாடாக திறம்பட மாற்றிவிட்டது. தென் சீனக் கடல் பகுதி சார்ந்த பிராந்திய மோதல்கள் குறித்த அமெரிக்காவின் கோரிக்கைகளையே, பிரதம மந்திரி நரேந்திர மோடியும் அதிகரித்தளவில் வலியுறுத்தியுள்ளார். கடந்த ஆகஸ்டில், இந்தியா தனது இராணுவ தளங்களை அமெரிக்க இராணுவ பயன்பாட்டிற்கு உட்படுத்தவும் ஒப்புக்கொண்டது.
அமெரிக்காவிற்கும், இந்தியாவிற்கும் இடையிலான நெருக்கமான ஒத்துழைப்பிற்கு, பாகிஸ்தானும், சீனாவும் தசாப்தங்களாக நீண்ட அவர்களது அரசியல், பொருளாதார மற்றும் இராணுவ பங்காண்மையை மேலும் உறுதிப்படுத்துவதன் மூலமாக விடையிறுத்துள்ளனர்.
பரந்த ஆசிய பிராந்தியத்தில் இந்தியா அதன் புவிசார் அரசியல் இலட்சியங்களை முன்னெடுக்க தனது SCO உறுப்பினர் தகுதி அனுமதிக்குமெனவும், அதிலும் குறிப்பாக, எரிபொருள் மூலவளங்கள் நிறைந்த மத்திய ஆசியா பகுதியில் அதன் பாதுகாப்பான அணுகுமுறைக்கு வழிவகுக்குமெனவும் நம்புகின்றது. “SCO உடன் இணைந்தது என்பது, மத்திய ஆசியாவில் இந்தியாவின் செல்வாக்கை குறைந்த செலவில் அதிகரிப்பதற்கான ஒரு முயற்சியாகும்,” என்று கார்னெகி இந்தியாவில் ஒரு உறுப்பினரான கான்ஸ்டன்டினோ சேவியர் சமீபத்தில் கருத்து தெரிவித்தார்.
இந்திய உறுப்பினர் தகுதியை ஆதரிப்பதன் மூலம், தனது சொந்த நலன்களை தெற்கு ஆசியாவில் விரிவுபடுத்தவும், அமெரிக்க-இந்திய உறவுகளை பலவீனப்படுத்தவும் பெய்ஜிங் முனைந்துவருகிறது. சேவியர் பின்வருமாறு குறிப்பிட்டுள்ளபடி: “SCO வில் இந்தியா இணைந்ததன் மூலம், பிராந்திய ஒத்துழைப்பிற்கான தெற்காசிய அமைப்பு (South Asian Association for Regional Cooperation-SAARC), பல்துறை தொழில்நுட்பம் மற்றும் பொருளாதார ஒத்துழைப்பிற்கான வங்காள விரிகுடாப் பகுதி முன்னெடுப்பு (Bay of Bengal Initiative for Multi-Sectoral Technical and Economic Cooperation-BIMSTEC) மற்றும் தெற்காசியாவின் ஏனைய பிராந்திய அமைப்புக்களிலும் சீனாவிற்கு முன்னோடியாக, இந்தியா உறுப்பினர் தகுதியை கோருவதற்கு வழிவகை செய்யமுடியும்.”
முழு SCO உறுப்பினர் தகுதி அவர்களுக்கு இருந்தபோதிலும், இந்தியாவிற்கும், பாகிஸ்தானுக்கும் இடையேயான போர் பதட்டங்கள் குறைந்து விட்டதற்கான எந்தவொரு அடையாளமும் தெரியவில்லை. மோடியும், அவரது பாகிஸ்தான் சமதரப்பினரான நவாஸ் ஷெரீபும் உச்சிமாநாட்டின் போது எந்தவொரு முறையான இருதரப்பு அல்லது தனிப்பட்ட பேச்சுவார்த்தையையும் நடத்த தவறிவிட்டனர். மாநாட்டு நிகழ்ச்சிகள் மற்றும் விருந்துக்கு முன்னர் மாலையில் தலைவர்களின் சாதாரண சந்திப்பின் போது நிகழ்ந்த ஒரு சிறிய சந்திப்பாகவே அது இருந்தது. ஷெரீப் மற்றும் அவரது குடும்பத்தினரின் நலம் குறித்து மோடி விசாரித்தபோது அவர்கள் “வாழ்த்துக்களை பரிமாறிக்கொண்டனர்” என்று கூறப்படுகிறது.
SCO உச்சிமாநாட்டிற்கு முன்னதாக ஜூன் 1 அன்று Hindustan Times பத்திரிகை இருதரப்பு கூட்டங்கள் எதற்கும் வாய்ப்பில்லை என்று அறிக்கை வெளியிட்டது. மேலும், பெயர் குறிப்பிடாத இந்திய அதிகாரி ஒருவர் பின்வருமாறு கூறியதாக மேற்கோளிட்டு காட்டியது: “பாகிஸ்தான் இராணுவம் அதன் இந்திய கொள்கையில் மிகவும் வலுவான பாத்திரம் வகிக்கிறது. பல்வேறு முனைகளில் உறவுகளை கெடுக்க சாத்தியமான அனைத்தும் அதனால் மேற்கொள்ளப்படுகிறது. தற்போதைய நிலவரப்படி, எந்தவொரு சந்திப்பிற்கும் பாகிஸ்தானிடமிருந்து வேண்டுகோள் எதுவும் பெறப்படவில்லை.”
SCO உச்சிமாநாட்டில் மோடி உரையாற்றிய போது “பயங்கரவாதத்திற்கு எதிரான போராட்டம்” குறித்து மையப்படுத்தியதுடன், “நாங்கள் ஒருங்கிணைந்த மற்றும் வலுவான முயற்சிகளை எடுக்கும்வரை, ஒரு தீர்வு காண்பது என்பது சாத்தியமற்றது” எனவும் அறிவித்தார். எந்தவொரு நாட்டின் பெயரையும் குறிப்பிடாத போதும், இந்திய எதிர்ப்பு காஷ்மீர் பிரிவினைவாத குழுக்களை ஆதரிப்பதன் மூலம் தொடர்ந்து ஒரு மறைமுகப் போரை நடத்துவதாக புது தில்லி குற்றம் சாட்டுகின்ற பாகிஸ்தான் மீது தான் அவரது வெளிப்படையான இலக்கு இருந்தது.
இந்திய பிரதம மந்திரி தனது நாடு SCO உறுப்பினர் நாடுகளுக்கு மத்தியிலான “இணைப்பை” முழுமையாக ஆதரித்ததாக தெரிவித்தபோதும், “உள்ளடக்குதலும், நிலையானதன்மையும் அவசியமாகவுள்ள அதேவேளையில், இறையாண்மையும், பிராந்திய ஒருமைப்பாடும் மதிக்கப்படவேண்டும்” என்றும் அவர் வலியுறுத்தினார். “இறையாண்மை” பிரச்சினையை மேற்கோளிட்டு, சில வாரங்களுக்கு முன்னர் சீனாவின் ஒரே இணைப்பு, ஒரே பாதை (One Belt, One Road – OBOR) உச்சிமாநாட்டை இந்தியா புறக்கணித்ததில் இந்த கருத்துக்கள் குறிப்பிடத்தக்கவையாகும். OBOR இன் ஒரு பகுதியாக, 46 பில்லியன் டாலர் ($46 billion) மதிப்பிலான சீனா மற்றும் பாகிஸ்தானின் பொருளாதார வழித்தடம் (China and Pakistan Economic Corridor-CPEC) இந்தியா இன்னும் உரிமைகோருகின்ற பாகிஸ்தான் கட்டுப்பாட்டிலுள்ள காஷ்மீர் பகுதி ஊடாக செல்கின்றது.
SCO வின் உறுப்பினராக உள்ளபோதும், CPEC மற்றும் OBOR திட்டங்கள் மீதான எதிர்ப்பை இந்தியா தொடரும் என்பதையே “இறையாண்மைக்கு மரியாதை” எனும் மோடியின் குறிப்பு காட்டுகிறது. வாஷிங்டனின் செயற்பட்டியலுக்கு இணங்க புது தில்லியும், இந்த திட்டங்கள் தெற்கு ஆசியாவிலும், யூரேஷியாவிலும் சீனாவின் பூகோள அரசியல் செல்வாக்கை பொதுவாக கணிசமான வகையில் மேம்படுத்தும் என்பதுடன் பாகிஸ்தானின் வீழ்ச்சியடைந்த பொருளாதாரத்தையும் உயர்த்தும் என்று கவலை கொண்டுள்ளது.
கடந்த ஆண்டில், இரண்டு தெற்கு ஆசிய நாடுகளுக்கு இடையில் போர் பதட்டங்கள் மோசமான வகையில் அதிகரித்துள்ளன. கடந்த செப்டம்பரில், பாகிஸ்தானின் எல்லைப்பகுதிக்குள் “நுட்பமான தாக்குதல்” ஒன்றை தொடங்க இந்திய அரசாங்கம் அதன் இராணுவத்திற்கு உத்தரவிட்டது. பாகிஸ்தானுடனான “மூலோபாய தடையை” நேருக்கு நேராக முடிவுக்கு கொண்டுவர நோக்கம் கொண்டே இந்தியாவின் இராணுவ நடவடிக்கைகள் மேற்கொள்ளப்படுகின்றன என்று மோடி பெருமையடித்துக் கொண்டார். அப்போதிருந்து, இந்தியா மற்றும் பாகிஸ்தான் கட்டுப்பாட்டிலுள்ள காஷ்மீர் பகுதிகளை பிரிக்கும் எல்லை கட்டுப்பாட்டுக் கோட்டின் (Line of Control-LoC) ஊடாக நடைபெறும் துப்பாக்கி சூடு தாக்குதல் பரிமாற்றங்களினால் உறவுகள் மிகவும் மோசமடைந்துவிட்டன. அணுசக்தி ஆயுதங்களை பிரயோகிப்பதற்கான சாத்தியங்கள் உட்பட இருதரப்பும் போர் அச்சுறுத்தல்களை ஒருவருக்கொருவர் விடுத்துள்ளனர்.
பாகிஸ்தான் இராணுவம் எல்லை கட்டுப்பாட்டு பகுதியுடன் சேர்த்து பூஞ்ச் மற்றும் ரஜோவ்ரி போன்ற எல்லைப்புற மாவட்டங்களின் மூன்று பிரிவுகளின் பாதுகாப்புப் பகுதிகள் மற்றும் பொதுமக்கள் வசிக்கும் பகுதிகளையும் இலக்குவைத்து தாக்கிய பின்னர், அதற்கு எதிராக இந்திய இராணுவம் ஒரு பெரும் தாக்குதலை தொடங்கியதாக ஜூன் 11 அன்று Daily Excelsior பத்திரிகை அறிவித்தது. பதிலடியான துப்பாக்கி சூடு தாக்குதலில் குறைந்தபட்சம் ஒன்பது பாகிஸ்தானிய இராணுவ காவல் அரண்களும், பதுங்கு குழிகளும் அழிக்கப்பட்டதாக செய்தித்தாள் அறிவித்தது. ஒரு நாள் கழித்து, அதன் இராணுவத் தலைவரான ஜெனரல் கமர் ஜாவெத் பாஜ்வா, முசாஃப்ராபாத்துக்கும், எல்லை கட்டுப்பாட்டு பகுதியில் சில முன்னோடி காவல் அரண்களுக்கும் விஜயம் செய்த பின்னர் பாகிஸ்தான் அதன் தாக்குதல்களை மேலும் தீவிரப்படுத்தியது.
ஜூன் 12 அன்று, எல்லை கட்டுப்பாட்டு கோடு ஊடாக இந்திய துருப்புக்கள் நடத்திய பீரங்கி தாக்குதல்களினால் இரண்டு இளைஞர்கள் கொல்லபட்டதாகவும், மேலும் மற்றொரு மூன்று பேர் காயமடைந்ததாகவும் Inter Services Public Relations ல் இருந்து மேற்கோளிட்டு, பாகிஸ்தான் இராணுவ ஊடகப் பிரிவான Geo News அறிவித்தது. இரண்டு நாட்களுக்கு முன்பாக, சிராக்கோட்டில் 70 வயதான முதியவர் ஒருவர் இந்திய பீரங்கி தாக்குதலினால் கொல்லப்பட்டார். இவை குறித்து, இந்திய துணை உயர் ஆணையர் J.P. சிங்குக்கு பாகிஸ்தான் வெளியுறவு அமைச்சகம் நீதிமன்ற அழைப்பு விடுத்ததுடன், இந்திய துருப்புகளினால் “தூண்டப்படாத” துப்பாக்கி சூடு தாக்குதல் குறித்து ஒரு உத்தியோகபூர்வ எதிர்ப்பையும் தாக்கல் செய்தது.
இந்த மாத தொடக்கத்தில், ஒரு “பதிலடி துப்பாக்கி சூடு” தாக்குதலில் பாகிஸ்தானிய படையினர் ஐந்து பேர் கொல்லப்பட்டதாகவும், மற்றுமொரு ஆறு பேர் காயமடைந்ததாகவும் இந்திய இராணுவம் அறிவித்தது. மேலும், இந்திய இராணுவ படையினரின் தாக்குதலினால் இரண்டு பாகிஸ்தானிய பொதுமக்கள் கொல்லப்பட்டனர் என்றும், மேலும் எட்டு பேர் காயமடைந்தனர் என்றும் ஒரு பாகிஸ்தான் இராணுவ செய்தித் தொடர்பாளர் அறிவித்தார்.
By Wasantha Rupasinghe
14 June 2017
http://www.wsws.org/tamil/articles/2017/6-Jun/inpk-j20.shtml

Monday, 19 June 2017

ஜோடிக்கப்பட்ட குற்றச்சாட்டுக்களின் பேரில் மேலும் மாருதி சுசூகி தொழிலாளர்களை சிறையிலிட இந்திய அதிகாரிகள் முனைகின்றனர்

Indian authorities seek to imprison more Maruti Suzuki workers on frame-up charges

ஜோடிப்பு வழக்கின் பேரில் கைதுசெய்து சிறையிலிடப்பட்டிருந்த 117 முன்னாள் மாருதி சுசூகி வாகனத் தொழிலாளர்கள் மீதான குற்றச்சாட்டுக்களை தள்ளுபடி செய்து அவர்களை விடுவித்து, இந்த ஆண்டுத் தொடக்கத்தில் ஒரு நீதிமன்றம் தீர்ப்பு வழங்கியதை வடமேற்கு இந்திய ஹரியானா மாநில அரசாங்கம் சவால் செய்துள்ளது.
ஜூலை 2012 ல் நிர்வாகத்தினால் தூண்டிவிடப்பட்ட ஒரு கைகலப்பு மற்றும் அப்போது அந்நிறுவன மானேசர் ஆலையில் ஏற்பட்ட தீ விபத்தின் விளைவாக நிறுவன மேலாளர் ஒருவர் மரணமடைந்தது போன்றவை தொடர்பாக இந்த குற்றச்சாட்டுக்கள் எழும்பின. ஜப்பானிய வாகன உற்பத்தியாளர், இந்திய அரசாங்கம் மற்றும் அரசியல் ஸ்தாபகம் அனைவரும் ஜூலை 18, 2012 சம்பவங்களை, இந்திய தலைநகரம் தில்லியின் புறநகர் பகுதியில் அமைந்துள்ள மானேசர் குர்கான் தொழில்துறை பகுதியில் நிலவுகின்ற மலிவுகூலி உழைப்பு வேலையிட நிலைமைகளுக்கு ஒரு மைய எதிர்ப்பாக உருவாகிவரும் வாகன ஒருங்கிணைப்பு ஆலைத் தொழிலாளர்கள் மீது ஒரு சட்டபூர்வமான சதிவேட்டையை தொடங்குவதற்கும், அந்த தொழிலாளர் தொகுப்பை வெளியேற்றுதற்குமான ஒரு வாய்ப்பாக பயன்படுத்தினர்.
“கலகத்தில் ஈடுபட்டதாகவும்” மற்றும் இந்த சம்பவத்துடன் தொடர்புடைய ஏனைய குற்றச்சாட்டுக்களின் பேரிலும் குற்றம்சாட்டப்பட்ட 18 தொழிலாளர்களுக்கு கடுமையான தண்டனைகளை வழங்க முனைவதற்கு திட்டமிடுவதாக பாரதிய ஜனதா கட்சி (BJP) தலைமையிலான மாநில அரசாங்கமும் தெரிவித்துள்ளது. இவர்கள் 3 முதல் 5 ஆண்டுகள் வரையிலான சிறை தண்டனைகள் விதிக்கப்பட்டு இருந்தனர்.  
இந்த தீர்ப்பை எதிர்த்து மாநிலத்தின் மேல்முறையீடு தயாரிக்கப்பட்டு விரைவில் உயர்நீதிமன்றத்தில் சமர்ப்பிக்கப்படவுள்ளதாக கடந்த வியாழனன்று ஹரியானா மாநில அரசுத் தலைமை வழக்கறிஞர் ராஜ் மஹாஜன் செய்தியாளர்களிடம் தெரிவித்தார்.
மார்ச் இல், குருகிராமில் (குர்கான்) உள்ள ஒரு மாவட்ட நீதிமன்றம் 2012 சம்பவங்களினால் உருவான குற்றச்சாட்டுக்களின் பேரில் 31 முன்னாள் மாருதி சுசூகி தொழிலாளர்களை குற்றவாளிகள் எனத் தீர்ப்பளித்து அவர்களுக்கு தண்டனைகளை விதித்தது. இந்த 31 பேரில் 13 பேர் மீது மேலாளரின் மரணம் குறித்து ஜோடிக்கப்பட்ட கொலை குற்றச்சாட்டுக்கள் சுமத்தப்பட்டு அவர்களுக்கு ஆயுள் தண்டனை விதித்து இந்தியாவின் மிருகத்தனமான சிறை அமைப்புக்குள் அவர்கள் தள்ளப்பட்டுள்ளனர். ஒரு நிறுவன சார்புடைய, அரசாங்க ஆதரவுள்ள தொழிற்சங்கத்திற்கு எதிராக 2011-12 இல் ஒரு தொடர்ச்சியான போர்க்குணமிக்க வேலைநிறுத்தங்கள் மற்றும் ஆக்கிரமிப்புக்கள் மூலமாக தொழிலாளர்களால் கட்டியமைக்கப்பட்ட ஒரு சுயாதீன தொழிற்சங்கமான மாருதி சுசூகி தொழிலாளர்கள் சங்கத்தின் (MSWU) ஒட்டுமொத்த தலைமையும், ஆயுள் தண்டனை விதிக்கப்பட்டு சிறையிலிடப்பட்ட தொழிலாளர்களில் அடங்குவர்.
ஒரு சட்டபூர்வ பழிவாங்கும் நடவடிக்கையினால் இவர்கள் பாதிக்கப்பட்டவர்கள். இந்தியாவின் புதிய மற்றும் உலகளாவிய ரீதியில் இணைந்த தொழில்களில் தொழிலாளர்கள் மீது நாடுகடந்த நிறுவனங்கள் சுமத்தும் மிகமோசமான ஊதியங்கள் மற்றும் மிருகத்தனமான வேலைத்திட்டங்களை எதிர்க்கவேண்டிய நிர்பந்தத்தில் இந்த தொழிலாளர்கள் இருந்தது மட்டுமே அவர்கள் செய்த ஒரே “குற்றமாக” உள்ளது.
பொலிஸூம், வாதித் தரப்பும் மாருதி சுசூகி நிர்வாகத்துடன் இணைந்து ஆதாரங்களை ஜோடித்து, சாட்சிகளை பயிற்றுவித்ததுடன், சட்டவிரோதமாக அவர்களுடன் இரகசியமாக சேர்ந்து வேலைசெய்துள்ளனர் என்பது போன்ற மறுக்கமுடியாத ஆதாரங்களுக்கு முகம்கொடுத்து நீதிமன்றம் 117 தொழிலாளர்களை குற்றங்களிலிருந்து விடுவித்தது.
மானேசர் ஆலையில் பணியில் இல்லாதவரும், மேலும் அந்த கைகலப்பினை நேரடியாக காணாதவருமான மூத்த மாருதி சுசூகி அதிகாரி ஒருவர் மூலம் வழங்கப்பட்ட பெயர்ப் பட்டியலை அடிப்படையாகக் கொண்டு இந்த 117 பேரில் 87 பேரை பொலிஸார் கைதுசெய்துள்ளனர் என்பதை பிரதிவாதித் தரப்பு வழக்கறிஞர்கள் சுட்டிக்காட்டினர். பின்னர், இது நீதிமன்றத்தில் வெளிவந்துவிடுமென அஞ்சி, 87 பேரும் இதனுடன் சம்பந்தப்பட்டிருப்பதாக சாட்சியம் கூற நான்கு மாருதி சுசூகி தொழிலாளர் ஒப்பந்தக்காரர்களை புனையப்பட்ட ஆதாரங்களாக பொலிஸார் உருவாக்கினர்.
இந்த வழக்கு முழுமையிலும் மாநிலத்தின் நடப்புடன் ஒத்துப்போவதாகவே பொலிஸின் சட்டவிரோத நடவடிக்கைகள் இந்த 87 பேருக்கு எதிராக இருந்தன. முக்கிய சாட்சியங்கள் தொடர்பாக அடிப்படை தடயவியல் சோதனைகள் நடத்துவதற்கு கூட பொலிஸ் தவறிவிட்டது. நிறுவன மேலாளர் மீது அவர்கள் தாக்குதல் நடத்தியதாக கூறப்பட்டதில், உள்நோக்கத்துடன் தொழிலாளர்கள் எந்தமாதிரியான ஆயுதங்களைப் பயன்படுத்தினார்கள் என்பது உட்பட, வழக்கு விசாரணையின் அடிப்படை குறிப்பைக்கூட வாதித் தரப்பு மாற்றியது. மூச்சுத்திணறல்தான் மேலாளரை மரணத்திற்கு இட்டுச்சென்றது என்ற நிலையில், வாதித் தரப்பு வழக்கின் கடினமான பிரச்சனையாக இந்த நெருப்பிடல் சம்பவம் இருந்தபோதிலும், கைகலப்பிற்கு மத்தியில் மர்மமான முறையில் ஆலையில் வெடித்த தீ விபத்திற்கு ஏதேனும் ஒரு மாருதி சுசூகி தொழிலாளர்தான் காரணமென்று தொடர்புபடுத்தி வாதிடவும் வாதித் தரப்பு தவறிவிட்டது.
ஆயினும், நீதிபதி அனைத்தையும் வேண்டுமென்றே புறக்கணித்து, MSWU தலைவர்கள் உட்பட 31 பேருக்கு எதிரான ஜோடிப்பு வழக்குகளை உறுதிசெய்தார்.
குற்றவாளியென தீர்ப்பு வழங்கப்பட்டு தண்டனையும் விதிக்கப்பட்ட பின்னர், அது குறித்து ஹரியானா மாநில அரசாங்கம் மேல்முறையீடு செய்வது மேலும் பழிவாங்கும் நடவடிக்கையாகவுள்ளது. வாகன ஆலைகள் அல்லது ஏனைய உற்பத்தி வசதிகளில் மலிவு உழைப்பு நிலைமைகள் குறித்து முடுக்கிவிடப்படும் எந்தவொரு எதிர்ப்பையும் அடையாளம் தெரியாமல் ஒடுக்குவதில் அதிகாரிகளையும், அரசியல் ஸ்தாபகத்தையும் கணக்கில் கொள்ளமுடியும் என்ற வகையில், இந்தியா முழுவதிலும் தொழிலாளர்களை அச்சுறுத்தி பெரு வணிகத்தை நிரூபிக்க இது நோக்கம் கொண்டுள்ளது. முதலீட்டாளர்களை உறுதிபடுத்துவதற்கு மாருதி சுசூகி தொழிலாளர்கள் ஒரு உதாரணமாக்கப்பட வேண்டுமென்று அரசாங்கமும், சட்ட அதிகாரிகளும் தங்களுக்குள் மீண்டும் மீண்டும் கூறிக்கொண்டனர்.
ஜப்பானை தளமாகக் கொண்ட சுசூகி மோட்டார் கார்ப்பரேஷன் நிறுவனத்தின் இந்திய இணை நிறுவனமே மாருதி சுசூகி நிறுவனமாகும். ஜப்பானின் நான்காவது மிகப்பெரிய வாகனத் தயாரிப்பு நிறுவனமாக இது இருப்பதுடன், குறைந்த உற்பத்தி செலவினங்களுக்கான வழிவகையை தேடும் முயற்சியில் உலகையே அழிக்க முனையும் நாடுகடந்த பெருநிறுவனங்களில் குறிப்பிடத்தக்க ஒரு நிறுவனமாக இந்த நிறுவனம் உள்ளது. அதன் மலிவு உழைப்பு ஆட்சியின் ஒரு பகுதியாக, மிகுந்தளவில் சுரண்டலுக்கு உட்படுத்தப்படும் ஒப்பந்த தொழிலாளர்களையே ஒரு பெரும் விகிதத்தில் பணியமர்த்துகின்றது. உண்மையில், MSWU இன் முக்கிய கோரிக்கைகளில் ஒன்று ஒப்பந்த தொழிலாளர் முறையை ஒழிப்பதாகும்.
மாருதி சுசூகி தொழிலாளர்களை பழிவாங்குவதன் மூலம், நிர்வாகம் அதன் தொழிலாளர்கள் மீதான சுரண்டலையும், மேலும் வீழ்ச்சியடைந்த முதலீட்டாளர் இலாபங்களையும் தீவிரப்படுத்தியுள்ளது. இந்த வாகனத் தயாரிப்பு நிறுவனம் தற்போது அதன் இந்திய ஆலைகளில் ஒவ்வொரு 12 விநாடிக்கும் ஒரு கார் வீதம் தயாரிப்பதாக தற்பெருமை பேசுகிறது.
கூடுதல் முதலீட்டிற்கு கோரிக்கைவிடும் பொருட்டு இந்திய நிதியமைச்சர் அருண் ஜேட்லி சமீபத்தில் ஜப்பானுக்கு விஜயம் செய்தார். அங்கு இருந்தபோது, சுசூகி மோட்டார்ஸ் இன் தலைவர் ஒசாமு சுசூகியை அவர் சந்தித்தார். இந்த சந்திப்பின்போது, இந்திய மாநிலம் குஜராத்தில் 880 மில்லியன் அமெரிக்க டாலர் (US$880 million) மதிப்பிலான தொகையை முதலீடு செய்ய சுசூகி உறுதியளித்தார்.
மாருதி சுசூகி தொழிலாளர்கள் மீதான விசாரணை தொடக்கத்திலிருந்து முடிவு வரையிலும் போலியானதாகவே இருந்தது. நிறுவனத்தின் வழக்கறிஞர் ஒருவரே வாதித் தரப்பின் ஒரு துணை ஆலோசகராக செயல்பட்டார். முரண்பாடான மற்றும் வெளிப்படையாக பயிற்றுவிக்கப்பட்ட சாட்சியத்தை வழங்க மேலாளர்கள் முழுமையாக சுதந்திரமாக அனுமதிக்கப்பட்டிருந்த நிலையில், தொழிற்சாலையில் உள்ள தொழிலாளர்களில் எவரும் விசாரணைக்கு சாட்சியமளிக்க அனுமதிக்கப்படவில்லை.
பிரதிவாதித் தரப்பு வழக்கறிஞர் வாதித் தரப்பு சாட்சிகளை மறு விசாரணைக்காக மீண்டும் அழைத்தபோது தலைமை நீதிபதி அனுமதியளிக்க மறுத்துவிட்டார். குற்றம்சாட்டப்பட்டவர்கள் குறித்த ஒரு நியாயமான விசாரணை போன்ற அவர்களது உரிமைகள் மறுக்கப்படுவதை ஒரு உயர்நீதிமன்றம் கண்டது. ஆனால் ஜோடிக்கப்பட்ட குற்றச்சாட்டை தக்கவைத்துக்கொள்ளவும், உயர் நீதிமன்ற தீர்ப்பை தகர்க்கவும் இந்தியாவின் உயர் நீதிமன்றமான, இந்திய உச்ச நீதிமன்றம் (Indian Supreme Court) தலையீடு செய்தது.
31 பேரை குற்றவாளிகளாக தீர்ப்பளித்தமைக்கு ஒரு போலியான சட்டபூர்வ சாக்குப்போக்கை வழங்க ஏதுவாக, அடிப்படை சட்ட நெறிமுறைகளை மீறுவதன் மூலம் வழக்கு தொடர்பான நிரூபணங்களின் சுமையை முக்கியமாக வாதித் தரப்பினரின் தோள்களிலிருந்து தொழிலாளர்கள் பக்கம் மாற்றிவிடும் விதமாக விசாரணை நீதிபதி ஒரு தொடர்ச்சியான தீர்ப்புக்களை வழங்கினார்.
கொலைக் குற்றம்சாட்டப்பட்ட 13 மாருதி சுசூகி தொழிலாளர்களுக்கு மரணதண்டனை விதிக்கப்படவேண்டும் என்று அவர் அழைப்பு விடுத்ததற்கான காரணத்தை சிறப்பு வழக்கறிஞர் அனுராக் ஹூடா விளக்கியபோது பின்வருமாறு அறிவித்தார்: “நமது தொழில்துறை வளர்ச்சி வீழ்ச்சியடைந்துவிட்டதுடன், வெளிநாட்டு நேரடி முதலீடும் (Foreign Direct Investment-FDI) வரண்டு விட்டது. பிரதம மந்திரி நரேந்திர மோடி “இந்தியாவில் உற்பத்தி செய்வோம்” திட்டத்திற்கு அழைப்பு விடுத்துள்ள நிலையில், இத்தகைய சம்பவங்கள் நம்மைப் பற்றிய எண்ணம் மீதான ஒரு கறையாக உள்ளது.”
அதேபோல், இந்தியாவிலுள்ள நடைமுறை அரசியல் கட்சிகளும் இந்த ஜோடிப்பு வழக்கு குறித்த தங்களின் ஆதரவை மறைமுகமாக விடுத்துள்ளனர். பிரதம மந்திரி நரேந்திர மோடி தலைமையிலான ஆளும் இந்து மேலாதிக்கவாத பி.ஜே.பி.யும், எதிர்க் கட்சியான காங்கிரஸ் கட்சியும் இதில் அடங்கும்.
மாருதி சுசூகி தொழிலாளர்களுக்கு எதிராக சட்டரீதியான சதிவேட்டை தொடங்கப்பட்டபோது ஹரியானாவில் காங்கிரஸ் கட்சி தலைமையிலான மாநில அரசாங்கம் இருந்தது. மேலும் தற்போதுள்ள பி.ஜே.பி. மாநில அரசாங்கம் 117 பேரை குற்றச்சாட்டுகளிலிருந்து விடுவிக்க முறையீடு செய்துவருகின்ற அதேவேளையில், குறைந்த குற்றச்சாட்டுக்களின் பேரில் தண்டனைகளைப் பெற்ற 18 தொழிலாளர்கள் மீது கடுமையான தண்டனைகளை விதிக்கச் செய்வதற்கு முனைந்து வருகிறது.
ஜோடிக்கப்பட்ட வழக்கில் சிக்கவைக்கப்பட்டுள்ள மாருதி சுசூகி தொழிலாளர்களை உடனடியாக விடுவிப்பதிலும், அவர்களுக்கு எதிரான அனைத்து குற்றச்சாட்டுக்களையும் இல்லாதொழிப்பதிலும் வெற்றி பெற சர்வதேச தொழிலாளர் வர்க்கத்தை அணிதிரட்டுவதற்கு நான்காம் அகிலத்தின் அனைத்துலகக் குழுவும் (International Committee of the Fourth International), உலக சோசலிச வலைத் தளமும் (World Socialist Web Site) ஒரு பிரச்சாரத்தைத் தொடங்கியுள்ளன. இந்தியா மற்றும் இலங்கையில் மறியல்களும், கூட்டங்களும் நடத்தப்பட்டன, மேலும் இவற்றின் மூலம் நடத்தப்பட்ட ஒரு சர்வதேச அளவிலான மனு பெறும் பிரச்சாரமும் கணிசமான ஆதரவைப் பெற்றது.
பெருநிறுவன கட்டுப்பாட்டு நீதிமன்றங்கள், பெரும் வணிக அரசியல் கட்சிகள் அல்லது நிர்வாக சார்பு கொண்ட உத்தியோகபூர்வ தொழிற்சங்கங்கள் போன்றவற்றின் மீது எந்தவித நம்பிக்கையும் வைக்கமுடியாதென ICFI வலியுறுத்துகின்றது. தொழிலாள வர்க்கத்தின் சுயாதீன தொழில்துறை மற்றும் அரசியல் அணிதிரள்வின் மூலமாக மட்டும்தான் மாருதி சுசூகி தொழிலாளர்களை பாதுகாக்க முடியும்.
ஸ்தாபக அரசியல்வாதிகளின் தவறான முறையீடுகளுக்குள் தொழிலாளர்களை திசைதிருப்பவும், தங்களது ஆதரவின் பேரில் ஆர்ப்பாட்டங்களை தடுத்து நிறுத்தவும் முனைகின்ற ஸ்ராலினிச கட்டுப்பாட்டிலான உத்தியோகபூர்வ தொழிற்சங்கங்களால் மேற்கொள்ளப்பட்ட முயற்சிகளின் பல்வேறு பிடிகளுக்கு மத்தியில், மாருதி சுசூகி தொழிலாளர்களை பாதுகாக்கும் விதமாக ICFI ஆதரவாளர்களின் பிரச்சாரம் செயல்படுத்தப்பட்டு வருகின்றது. மாருதி சுசூகி தொழிலாளர்களைப் பாதுகாப்பதற்காக என்பதன் பேரில், இந்திய ஸ்ராலினிச கம்யூனிஸ்ட் கட்சி (மார்க்சிஸ்ட்) அல்லது CPM, தொழிலாளர்களுக்கான ஊதியங்களை நிறுத்தி அவர்களது ஆர்ப்பாட்டங்களை ஒடுக்குவதன் மூலமாக, நாட்டிற்குள் வெளிநாட்டு முதலீடுகளை ஈர்ப்பது குறித்த இந்திய அரசாங்கத்தின் உந்துதலுக்கு ஆதரவளிப்பது போன்ற நாசவேலைகளில் ஈடுபட முனைந்துள்ளது. தொழிலாள வர்க்கத்தின் சுயாதீனமான முன்முயற்சியின் எந்தவொரு வெளிப்படுத்துதலுக்கும் நேர் விரோதமானவர்களாக இருக்கின்ற ஸ்ராலினிஸ்டுகள், மாருதி சுசூகி தொழிலாளர்களின் கலகத்தனமான உணர்வைக் கண்டு அஞ்சுகின்றனர்.
மாருதி சுசூகி தொழிலாளர்களுக்கு எதிராக மேலதிக பழிவாங்கும் நடவடிக்கைகளைத் தொடங்க மாநில அதிகாரிகள் தற்போது உணர்ச்சிவசப்படும் பட்சத்தில், அது இந்த வழக்கை மூடிமறைக்க முயன்றுவரும் இந்திய ஸ்ராலினிஸ்டுகளின் துரோகத்தனமான பாத்திரத்திற்கு ஒரு சாட்சியமாகும். பல வாரங்களாக CPM இன் ஆங்கில மொழி பத்திரிகையான People’s Democracy, 31 மாருதி சுசூகி தொழிலாளர்கள் மீது விதிக்கப்பட்ட தண்டனைகள் குறித்தும், அதிலும் இவர்களில் MSWU இன் அனைத்து 12 நிர்வாக உறுப்பினர்களும் உட்பட 13 பேருக்கு ஆயுள் தண்டனைகள் விதிக்கப்பட்டுள்ளது குறித்தும் அறிக்கை வெளியிடத் தவறிவிட்டது.
மாருதி சுசூகி தொழிலாளர்களை பாதுகாக்க முன்வருமாறு உலகம் முழுவதிலும் உள்ள தொழிலாளர்களை ICFI யும், WSWS ம் வலியுறுத்துகின்றன. மலிவுகூலி உழைப்பு நிலைமைகளுக்கு சவாலாக, உலகெங்கிலும் உள்ள தொழிலாளர்களின் சார்பாக மேற்கொள்ளப்பட்ட ஒரு அடியாக அவர்கள் வேலைநிறுத்தத்தில் ஈடுபட்டுவந்தனர். மாறாக, சுசூகி நிறுவனமும், இந்திய ஆளும் உயரடுக்கும் இந்த போர்க்குணமிக்க தொழிலாளர்கள் மீது வெற்றிகரமாக ஜோடிப்பு வழக்குகளை பதிவுசெய்து, அவர்களை சிறையிலிடும் பட்சத்தில், அது நாடுகடந்த நிறுவனங்கள் மற்றும் அவர்களின் அரசியல் கூலிகளை ஊக்கம் கொள்ளச் செய்வதாகவும், வலுவூட்டுவதாகவும் மட்டுமே இருக்கும்.
மாருதி சுசூகி தொழிலாளர்கள் மீதான ஜோடிப்பு வழக்கு குறித்து எதிர்க்கவும், உலகெங்கிலும் உள்ள தொழிலாளர்கள் மத்தியில் இந்த வழக்கு பற்றிய விபரத்தை பரவலாக அறியச்செய்வதற்கும், இணையவழி மனுவில் கையெழுத்திட உலகளவில் அனைத்து தொழிலாளர்களையும் நாங்கள் ஊக்குவிக்கின்றோம்.
By Shannon Jones
13 June 2017
http://www.wsws.org/tamil/articles/2017/6-Jun/maru-j17.shtml

Saturday, 17 June 2017

இரண்டாம் சுற்று பிரெஞ்சு நாடாளுமன்ற தேர்தல்களுக்கு முன்னர்

On the eve of the second round of the French legislative elections

நாளை நடக்கவுள்ள இரண்டாம் சுற்று பிரெஞ்சு நாடாளுமன்ற தேர்தல்கள், ஐயத்திற்கிடமின்றி அண்மித்து அரை நூற்றாண்டாக பிரான்சில் "இடது" என்று கூறப்பட்டு வந்ததன் மற்றும் பிரெஞ்சு முதலாளித்துவ ஜனநாயகம் என இரண்டினதும் ஒரு வரலாற்று பொறிவைக் குறிக்கும்.
புதிதாக தேர்ந்தெடுக்கப்பட்டுள்ள ஜனாதிபதி இமானுவல் மக்ரோன் அவரது குடியரசை நோக்கி அணிவகுப்போம் இயக்கத்திற்கு (LREM) பெரும் பெரும்பான்மை கிடைக்க முயன்று வருகிறார். சோசலிஸ்ட் கட்சி (PS) பொறிந்து வரும் நிலையில் அதிலுள்ள சக்திகளை பெற்றுள்ள LREM, இரண்டாம் உலக போருக்குப் பின்னர் கண்டிராத மட்டத்திலான பிரெஞ்சு சமூகத்தின் ஒரு வன்முறையான மறுசீரமைப்புக்கு ஒரு வாகனமாக செயல்பட நோக்கம் கொண்டுள்ளது.
இந்த சட்டமன்ற தேர்தல்கள் ஒரு திடுக்கிடவைக்கும் முரண்பாட்டைக் கொண்டுள்ளன: மக்ரோனின் கொள்கைகள் ஆழ்ந்த எதிர்ப்பை முகங்கொடுக்கின்ற அதேவேளையில், 577 ஆசன சட்டமன்றத்தில் சாத்தியமான வகையில் 400 க்கும் அதிகமான ஆசனங்களுடன் LREM பெரும் பெரும்பான்மை பெற முடியுமென நம்பிக்கைகளைக் கொண்டுள்ளது. இது ஜோன்-லூக் மெலோன்சோன் மற்றும் புதிய முதலாளித்துவ-எதிர்ப்பு கட்சி (NPA) போன்ற சக்திகள் மக்ரோனுக்கு எதிராக ஒரு முன்னோக்கை வழங்குவதற்கான பொறுப்புகளை கைத்துறந்ததன் விளைவாகும். அதற்கு பதிலாக அவர்கள் இரண்டாம் சுற்று ஜனாதிபதி தேர்தல்களின் போது, மக்ரோனுக்கு வாக்களிப்பது நவ-பாசிசவாத மரீன் லு பென்னுக்கு எதிராக தீமை குறைந்த ஒருவருக்கு வாக்களிப்பதாகும் என்று அவர்கள் "புரிந்து கொண்டதை" தெளிவுபடுத்தி இருந்தனர்.
பிரெஞ்சு மக்களின் பரந்த அடுக்குகள் வாக்களிப்பதற்கு ஏற்ற எவரும் இல்லை என்பதைக் கண்ட நிலைமைகளின் கீழ், ஒரு வாரத்திற்கு முன்னர்தான் முதல் சுற்று சட்டமன்ற தேர்தல்களில் சாதனையளவிற்கு 51 சதவீத வாக்காளர்கள் வாக்களிப்பை புறக்கணித்திருந்தனர். இளைஞர்கள் மற்றும் தொழிலாள வர்க்க வாக்காளர்களிடையே இந்த புறக்கணிப்பு அதிகபட்சமாக இருந்தது. இது, மதிப்பிழந்த முந்தைய சோசலிஸ்ட் கட்சி அரசாங்கத்தின் கொள்கைகளை தீவிரப்படுத்துவதாக இருந்த, மக்ரோன் தேர்ந்தெடுக்கப்பட்டதற்குப் பிந்தைய அவர் கொள்கைகளை வாக்காளர்கள் நிராகரித்ததன் தீர்ப்புரையாக இருந்தது.
நாளைய தேர்தல்களில் வெவ்வேறு கட்சிகளுக்கு என்ன வாக்கு விகிதாசாரங்கள் கிடைத்தாலும், ஒரு ஜனநாயக சட்டபூர்வத்தன்மை மறைப்பும் கூட இல்லாமல் மக்ரோனும் தேசிய சட்டமன்றமும் தொழிலாள வர்க்கத்தின் மீதான தாக்குதல்களைத் தொடர்வார்கள். முதல் சுற்று ஜனாதிபதி தேர்தலில் மக்ரோன் வெறும் ஒரு கால்வாசி வாக்குகள் மட்டுமே பெற்றிருந்தார், LREM கடந்த ஞாயிறன்று நடந்த முதல் சுற்று சட்டமன்ற தேர்தலில் பதிவு செய்த வாக்காளர்களில் வெறும் 15 சதவீதத்தினரின் வாக்குகளை மட்டுமே பெற்றிருந்தது.
மக்ரோனின் மூலோபாயம் தெளிவாக உள்ளது: அவருக்கு இடதின் பக்கத்தில் இருந்து ஒழுங்கமைக்கப்பட்ட எதிர்ப்பு இல்லாதிருப்பதைச் சாதகமாக்கிக் கொண்டு, ஒரு ஒப்புதல் முத்திரை குத்தும் நாடாளுமன்றத்தின் மூலமாக தனது நடவடிக்கைகளுக்கு அழுத்தமளித்து, வெடித்தெழ உள்ள சமூக போராட்டங்களை தாக்குவதற்கு பொலிஸை அனுப்புவதற்கு அவசரகால நிலையைப் பயன்படுத்தி, எதிர்க்கும் மக்களின் மீது இத்தகைய கொள்கைகளை பலவந்தமாக திணிக்க அவர் நோக்கம் கொண்டுள்ளார்.
நான்காம் அகிலத்தின் அனைத்துலக குழுவின் பிரெஞ்சு பிரிவான சோசலிச சமத்துவக் கட்சி (Parti de l'égalité socialiste PES), தீமை குறைந்த ஒருவராக மக்ரோனுக்கு தொழிலாளர்கள் வாக்களிக்க வேண்டுமென்ற கூற்றுகளை நிராகரித்து, மக்ரோன் மற்றும் நவ-பாசிசவாத லு பென்னுக்கு இடையிலான இரண்டாம் சுற்று தேர்தலை செயலூக்கத்துடன் புறக்கணிக்குமாறு பிரச்சாரம் செய்தது. இந்த கொள்கை, தேர்தல்களுக்குப் பின்னர் தவிர்க்கவியலாமல் எழ உள்ள போராட்டங்களின் போது தொழிலாளர்களுக்கு அரசியல்ரீதியில் ஒரு சுயாதீனமான வர்க்க திசைவழியை வழங்க நோக்கம் கொண்டது என்று அது விளங்கப்படுத்தியது.
அனைத்திற்கும் மேலாக, புறக்கணிப்பிற்கான அழைப்பானது, சோசலிஸ்ட் கட்சி மற்றும் மெலோன்சோன், புதிய முதலாளித்துவ எதிர்ப்பு கட்சி (NPA), மற்றும் அதுபோன்ற திவாலான போலி-இடது சக்திகளுக்கு எதிராக பிரெஞ்சு மற்றும் சர்வதேச தொழிலாள வர்க்கத்தின் தலைமையாக ICFI ஐ மற்றும் பிரான்சில் ஒரு புரட்சிகர கட்சியைக் கட்டியெழுப்புவதுடன் கைகோர்த்து செல்லவேண்டும் என்பதையும் PES வலியுறுத்தியது. மே 7 ஜனாதிபதி தேர்தல்களில் மக்ரோன் ஜெயித்ததற்கு பிந்தைய இந்த ஆறு வார கால நாட்களும் சோசலிச சமத்துவக் கட்சியின் (PES) கொள்கையின் சரியான தன்மையை ஊர்ஜிதப்படுத்தி இருப்பதுடன், லு பென் முன்னிறுத்திய அச்சுறுத்தலுக்கு மக்ரோன் ஒரு ஜனநாயக மாற்றீடு என்ற வாதங்களின் மோசடியான தன்மையை தீர்க்கமாக அம்பலப்படுத்தி உள்ளது.
மக்ரோனின் அரசாங்கம், அவசரகால நிலைமையின் கீழ் பாதுகாப்பு சக்திகளுக்கு வழங்கப்படும் அதிகாரங்களை —அதாவது, நிரந்தர அவசரகால நிலையின் கீழ் அடிப்படை ஜனநாயக உரிமைகளை நீக்குவதை— அது சட்டமாக்க இருப்பதாக அறிவித்துள்ளது. பின்னர் அந்த அரசாங்கம், மக்ரோன் அவர் விருப்பப்படி பிரெஞ்சு தொழிலாளர் சட்டத்தைத் திருத்தி எழுத அனுமதிக்கும் விதத்தில் நாடாளுமன்றம் ஒரு செயல்பாடுகளைச் செயல்படுத்தும் சட்டத்தை (Enabling Act) நிறைவேற்றக் கோரி கோரிக்கை விடுக்கும். அதேநேரத்தில் அது இராணுவம், பொலிஸ் மற்றும் உளவுத்துறை எந்திரத்திற்குள் இன்னும் அதிக ஆதாரவளங்களை தொடர்ந்து பாய்ச்சும்.
சுருக்கமாக கூறுவதானால், இரண்டாம் உலக போருக்குப் பின்னர் பிரெஞ்சு முதலாளித்துவம் தொழிலாள வர்க்கத்திற்கு வழங்க நிர்பந்திக்கப்பட்ட சகல சமூக மற்றும் ஜனநாயக உரிமைகள் மீதான விட்டுக்கொடுப்புகளையும் நிராகரிப்பதும், அழிப்பதும் மற்றும் பிரான்சில் நாஜிசத்துடன் இணைந்து இயங்குவதுமே மக்ரோன் அரசாங்கத்தின் நோக்கமாகும். இது, முதலாளித்துவ நெருக்கடி மற்றும் அமெரிக்க ஏகாதிபத்தியத்தின் உலக மேலாதிக்க நிலைமையில் ஏற்பட்டுள்ள பொறிவு ஆகியவற்றுடன் பிணைந்த வகையில் உலகளாவிய அரசியலிலும் வர்க்க உறவுகளிலும் ஏற்பட்டுள்ள ஒரு பாரிய திடீர் மாற்றத்தின் விளைவாகும்.
டொனால்ட் ட்ரம்ப் அரசாங்கம் மதிப்பிழந்து வருவதைப் பயன்படுத்தி ஜேர்மன் தலைமையிலான ஐரோப்பிய ஒன்றியத்தை உலக மேலாதிக்க சக்தியாக ஸ்தாபிக்கும் ஒரு பெரும்பிரயத்தன முயற்சியில் உள்ள பேர்லினுடன் மக்ரோன் ஒரு கூட்டணி மேற்கொண்டு வருகிறார். அமெரிக்க எதிர்ப்புக்கு இடையிலும் ரஷ்யாவுடனான உறவுகளை மேம்படுத்துவதற்கு அழைப்புவிடுக்க மக்ரோன் வேர்சாயில் ரஷ்ய ஜனாதிபதி விளாடிமீர் புட்டினைச் சந்தித்த போது, பிரெஞ்சு ஊடகங்கள் அதை ஒரு "ஐரோப்பிய தருணம்" என்று ஏகமனதாக புகழ்ந்து, உற்சாகத்துடன் பிரதிபலிப்பைக் காட்டியது. அதுபோன்ற அபிலாஷைகளை அடைய தொழிலாள வர்க்கத்தை விலையாக கொடுத்து பாரியளவில் இராணுவ செலவினங்களை அதிகரிக்க வேண்டியிருக்கும், மேலும் மக்ரோன் கட்டாய இராணுவச் சேவையைத் திரும்ப கொண்டு வர முன்மொழிந்துள்ளார்.
மக்ரோனின் நிகழ்ச்சி நிரலுக்கு பாராளுமன்ற மட்டத்திலான எதிர்ப்பு காட்டுவதற்கு அழைப்பு விடுக்கும் செல்வசெழிப்பான குட்டி-முதலாளித்துவ "இடது" சக்திகளிடம் தொழிலாளர்களுக்கு வழங்க எதுவும் இல்லை. வியாழனன்று மார்சைய்யில் ஒரு பிரச்சார உரையில், மெலோன்சோன் கூறுகையில், ஒவ்வொன்றும் எடுத்துக்காட்டுவதைப் போல, சட்டமன்ற தேர்தலில் மக்ரோன் ஒரு பாரிய பெரும்பான்மை பெற்றால், ஆளும் உயரடுக்கிற்குள் எந்தவித எதிர்கட்சியின் குறுக்கீடும் இல்லாமல் முன்செல்ல அவருக்கு முழு அதிகாரம் கிடைத்துவிடும் என்ற பத்திரிகைகளின் கவலைகளையே எதிரொலித்தார்.
இதுவொரு முட்டுச்சந்து: அவசரகால நிலை, தொழிலாளர் சட்டம் திருத்தம் மற்றும் இராணுவத்தை கட்டியெழுப்புதல் என மக்ரோனின் அடிப்படை திட்டநிரலை LREM, PS, பிரான்சில் உள்ள ஏனைய பிரதான முதலாளித்துவ அரசியல் உருவடிவங்கள், மற்றும் ஐரோப்பிய ஒன்றியம் எங்கிலும் ஆளும் உயரடுக்களும் பகிர்ந்து கொள்கின்றன. நாளைய தேர்தலில் LREM இன் போட்டியாளர்கள் அதிக ஆசனங்களை ஜெயித்தாலும் கூட, மெலோன்சோனின் வேட்பாளர்கள் இன்னமும் அவர்கள் தாக்குப்பிடித்து நிற்கும் ஒருசில டஜன் தொகுதிகளில் முன்னேறினாலும் கூட, இந்த சம்பவங்களின் அடிப்படை போக்கை மாற்றப் போவதில்லை.
மக்ரோன் அரசாங்கத்திற்கும் மக்கள் தொகையினருக்கும் இடையே, அனைத்திற்கும் மேலாக அரசாங்கத்திற்கும் தொழிலாள வர்க்கத்திற்கும் இடையே, ஒரு வெடிப்பார்ந்த மோதல் தயாரிக்கப்பட்டு கொண்டிருக்கிறது. அதை தொழிற்சங்கங்களிடமோ, புதிய முதலாளித்துவ எதிர்ப்பு கட்சி மற்றும் அதைப் போன்ற ஏனைய போலி இடது சக்திகளிடமோ விட முடியாது. அவை ஏற்கனவே சோசலிஸ்ட் கட்சியின் தொழிலாளர் சட்டத்திற்கு எதிரான கடந்த ஆண்டு போராட்டங்கள் மற்றும் சிக்கன நடவடிக்கைகளுக்கு எதிரான தொழிலாளர்களின் போராட்டங்களது எண்ணற்ற தோல்விகளுக்கு தலைமைதாங்கி உள்ளதுடன், சிரியா, லிபியா மற்றும் அதற்கு அப்பாலும் பிரெஞ்சு ஏகாதிபத்தியத்தின் போர் முனைவையும் அவை ஆதரித்துள்ளன.
ஐரோப்பிய ஒன்றியத்தால் ஆதரிக்கப்பட்ட மக்ரோன் அரசாங்கத்துடன் விரைவிலேயே ஒரு கடுமையான அரசியல் போராட்டமாக வெடிக்க உள்ள ஒரு போராட்டத்தை நடத்த தொழிலாளர்களுக்கு அவசரமாக ஒரு புதிய புரட்சிகர தலைமை அவசியப்படுகிறது.
அக்டோபர் புரட்சியின் ஒரு நூறு ஆண்டுகளுகளின் வேளையில், பிரெஞ்சு சோசலிச சமத்துவக் கட்சி (PES), மட்டுமே 1917 இல் லெனின் மற்றும் ட்ரொட்ஸ்கியின் போல்ஷிவிக் கட்சியினது விட்டுக்கொடுப்பற்ற சர்வதேச சோசலிச வேலைத்திட்டம் மற்றும் நான்காம் அகிலத்தின் அனைத்துலகக் குழுவால் (ICFI) பாதுகாக்கப்பட்ட ட்ரொட்ஸ்கிச மரபின் பிரதிநிதியாக தன்னைத்தானே முன்னெடுத்துச் சென்று கொண்டிருக்கிறது. மக்ரோனின் ஜனாதிபதி காலப்பகுதி குறித்த அதன் பகுப்பாய்வுடன் உடன்படும் இளைஞர்கள் மற்றும் தொழிலாளர்கள் PES ஐ ஆதரிக்குமாறும், அதன் வேலைத்திட்டத்தை படித்து, பிரான்சில் தொழிலாள வர்க்கத்தின் அரசியல் முன்னணி படையாக அதை கட்டியெழுப்பும் போராட்டத்தில் இணையுமாறும் அது அழைப்புவிடுக்கிறது.
By Alex Lantier
17 June 2017
http://www.wsws.org/tamil/articles/2017/6-Jun/legi-j17.shtml

Friday, 16 June 2017

வாஷிங்டனின் அரசியல் நெருக்கடியும் தொழிலாள வர்க்கத்தின் மூலோபாயமும்

Palace coup or class struggle: The political crisis in Washington and the strategy of the working class

அரண்மனை சதியா அல்லது வர்க்கப் போராட்டமா: வாஷிங்டனின் அரசியல் நெருக்கடியும் தொழிலாள வர்க்கத்தின் மூலோபாயமும்

1. டொனால்ட் ட்ரம்ப்பின் நிர்வாகம் வந்து ஐந்து மாதங்கள் ஆகின்றன, வாஷிங்டனில் நச்சு அரசியல் யுத்தம் ஒரு அதிமுக்கிய கட்டத்தை எட்டியிருக்கிறது. சென்ற வாரத்தில் செனட்டின் உளவுத்துறை கமிட்டியின் முன்பாக FBI இன் முன்னாள் இயக்குநரான ஜேம்ஸ் கோமி அளித்த சாட்சியமானது, ட்ரம்ப்பின் எதிர்ப்பாளர்களால், ஊடகங்களிலும் அரசியல் ஸ்தாபகத்திற்குள்ளாகவும், அமெரிக்க தேர்தலில் ரஷ்யா தலையிட்டதென்றும் ட்ரம்ப் மற்றும் பிற நிர்வாக அதிகாரிகளின் தரப்பில் இருந்து அதற்கு ஒத்துழைப்பும் மூடிமறைப்பும் இருந்ததாகவுமான குற்றச்சாட்டுகளை தீவிரப்படுத்துவதற்காய் பயன்படுத்திக் கொள்ளப்படுகிறது. 
2. ட்ரம்ப்புக்கு எதிரான குற்றச்சாட்டுகள், முன்னாள் ஜனாதிபதி பில் கிளிண்டனின் வைட்வாட்டர் நிலம்-மனை சொத்து முதலீடுகள் தொடர்பாகவும் வெள்ளை மாளிகை ஊழியர் மொனிக்கா லெவின்ஸ்கி உடனான அவரது பாலியல் உறவு தொடர்பாகவும் குடியரசுக் கட்சியின் தலைமையில் நடந்த முறைகேட்டுக் கூச்சல்; 2012 இல் பென்காசியில் நடந்த தாக்குதலில் ஹிலாரி கிளிண்டனின் பாத்திரம் குறித்த விசாரணைகள் மற்றும் ஒரு அந்தரங்க மின்னஞ்சல் சேர்வரை அவர் பயன்படுத்தியது தொடர்பான குற்றச்சாட்டுகள், மற்றும் பராக் ஒபாமா ஒரு அமெரிக்கக் குடிமகனே அல்ல என்பதான குற்றச்சாட்டுகள் —இதனை ட்ரம்ப்பே ஊக்குவித்திருந்து வந்திருக்கிறார்— ஆகியவற்றை ஒத்த, ஒரு செயற்கையானதும் மோசடியானதுமான தன்மையைக் கொண்டுள்ளன. இந்த அத்தனை சந்தர்ப்பங்களிலுமே, ஆளும் உயரடுக்கிற்குள் பிளவிற்கான உண்மையான மூலங்கள் ஒரு நாற்றமெடுக்கும் குற்றச்சாட்டுகளின் குவியலைக் கொண்டு திட்டமிட்டு இருட்டடிப்பு செய்யப்பட்டன.
3. வாஷிங்டனில் நடைபெறுகின்ற அரசியல் யுத்தத்தின் சமீபத்திய வெடிப்பு அமெரிக்க முதலாளித்துவத்தின் உலகளாவிய மேலாதிக்கம் மற்றும் தேசிய ஸ்திரத்தன்மையின் அடித்தளங்களை அரித்துக் கொண்டிருக்கின்ற சமாளிக்க இயலாத சமூக, பொருளாதார மற்றும் புவியரசியல் நெருக்கடிகளில் வேரூன்றியிருக்கிறது. சோவியத் ஒன்றியம் கலைக்கப்பட்டு இருபத்தியைந்து ஆண்டுகளுக்குப் பின்னர், வரிசையான இஇராணுவ நடவடிக்கைகளின் மூலமாக தனது மேலாதிக்கத்தை தக்கவைத்துக் கொள்வதற்கு அமெரிக்க ஏகாதிபத்தியம் செய்திருக்கும் முயற்சிகள் வரிசையான படுதோல்விகளுக்கே இட்டுச்சென்றிருக்கின்றன. 2008 இல் உலகப் பொருளாதார முறிவு —இதில் வோல் ஸ்ட்ரீட்டின் பொறுப்பற்ற தன்மை முக்கியமான பாத்திரம் வகித்தது— நடந்து கிட்டத்தட்ட ஒரு தசாப்தத்திற்குப் பின்னர், அமெரிக்க நிதியமைப்பு முறையானது தொடர்ந்தும் ஸ்திரமற்ற நிலையில்தான் இருக்கிறது என்பதோடு, கடனின் முடிவற்றதொரு விரிவாக்கத்தின் மூலமாக தாக்குப்பிடித்துக் கொண்டு நிற்கிறது. அமெரிக்க பொருளாதார அமைப்புமுறையின் நோய்வாய்ப்பட்ட தன்மையானது, ஒட்டுண்ணித்தனத்தையும் மலைக்க வைக்கும் சமூக சமத்துவமின்மை மட்டத்தையும் தனது குணாம்சங்களாய் கொண்ட ஒரு சிலர்-அதிகார சமூக அமைப்புமுறையை உருவாக்கி விட்டிருக்கிறது.
4. ட்ரம்ப் தேர்வானது ஒரு தற்செயல் அல்ல. ட்ரம்ப் அமெரிக்காவை ஆட்சி செய்கின்ற ஒரு சிலர்-அதிகாரக் கும்பலின் உருவடிவமே ஆவார். பில்லியனர்களையும் முன்னாள் இராணுவத் தளபதிகளையும் கொண்ட அவரது நிர்வாகமானது சமூக எதிர்ப்புரட்சியின் ஒரு இருகட்சி வேலைத்திட்டத்தையும் சர்வதேச அளவில் பொறுப்பற்ற விதத்தில் இராணுவவாதத்தையும் கூர்மையாக தீவிரப்படுத்திக் கொண்டிருக்கிறது. ஆனால், அமெரிக்க முதலாளித்துவம் அதன் தேசிய மற்றும் சர்வதேசப் பிரச்சினைகளுக்கு எப்படி பதிலிறுப்பு செய்ய வேண்டும் என்பதில் ஆளும் வர்க்கத்திற்குள்ளாக கடுமையான பிளவுகள் நிலவுகின்றன. இந்த பிளவுகள், ட்ரம்ப்பின் கீழ், ஒரு அசாதாரணமான தீவிரத்தை பெற்றிருக்கின்றன.
5. தொழிலாள வர்க்கமானது, அதன் ஜனநாயக உரிமைகளை அழிப்பதற்கும் அதன் வாழ்க்கைத் தரங்களை மேலதிகமாய் குறைப்பதற்கும் அர்ப்பணித்துக் கொண்ட ஒரு நச்சுத்தனமான எதிரியை, ட்ரம்ப்பிலும் அவரது நிர்வாகத்திலும் முகம்கொடுத்து நிற்கிறது. “முதலில் அமெரிக்கா” பேரினவாதத்தை அடிப்படையாகக் கொண்ட ஒரு சர்வதேச திட்டநிரலை பின்பற்றிக் கொண்டிருக்கும் ஒரு அரசாங்கமாக அது உள்ளது. தொழிலாள வர்க்கம் இந்த அரசாங்கத்தை எதிர்க்க வேண்டும், அதனை அகற்ற முனைய வேண்டும். ஆனால் இந்தப் பணி ஆளும் வர்க்கத்தில் இருக்கின்ற ட்ரம்ப்பின் கன்னை போட்டியாளர்களிடம் ஒப்படைக்கப்பட முடியாது. ட்ரம்புக்கும் ஜனநாயகக் கட்சியினருக்கும் இடையிலான மோதலில் தொழிலாள வர்க்கம் வெறுமனே வேடிக்கை பார்த்துக் கொண்டிருக்க முடியாது. மாறாக அது தனது சொந்தப் பதாகையின் கீழ் தனது சொந்த வேலைத்திட்டத்தைக் கொண்டு ட்ரம்ப்புக்கு எதிரான தன் போராட்டத்தை அபிவிருத்தி செய்தாக வேண்டும்.
6. ட்ரம்ப் நிர்வாகத்திற்கான எதிர்ப்பு மூன்று அடிப்படை வடிவங்களாய் இருக்கிறது, அவை வெவ்வேறு சமூக வர்க்கங்களின் நலன்களைப் பிரதிநிதித்துவம் செய்கின்றன.
்ரம்ப்புக்கான ஆளும் வர்க்க எதிர்ப்பு
7. முதலாவதாய், முதலாளித்துவ வர்க்கத்தின் சக்திவாய்ந்த பிரிவுகளின் எதிர்ப்பு உள்ளது. அரசியல் ஸ்தாபகத்திற்குள்ளாக இருக்கும் ஜனநாயகக் கட்சி குடியரசுக் கட்சி இருகட்சிகளையும் சேர்ந்த ட்ரம்ப்பின் எதிரிகள் பெருநிறுவன மற்றும் நிதிய உயரடுக்கின் ஒரு கன்னைக்காக பேசுகின்றனர். ட்ரம்புக்கு எதிரான பிரச்சாரத்தில் அவர்கள் பயன்படுத்துகின்ற வழிமுறைகள் அடிப்படையாக ஜனநாயக-விரோதமானவையாக இருக்கின்றன, இராணுவ/உளவு ஸ்தாபகம் மற்றும் பெருநிறுவன-நிதி உயரடுக்கிற்குள்ளாக இருக்கின்ற கூறுகளுடன் சேர்ந்து திரைமறைவில் சதி செய்வதும் இதில் இடம்பெற்றிருக்கிறது. இவை ஒரு அரண்மனை சதியின் வழிமுறைகள் ஆகும்.
8. ட்ரம்ப் நிர்வாகத்துடனான அவர்களது பேதங்கள், பிரதானமாக வெளியுறவுக் கொள்கை பிரச்சினைகளை மையமாகக் கொண்டவையாக இருக்கின்றன. அவர்களது உண்மையான கவலை அமெரிக்க ஜனநாயகத்திற்கு எதிராக ரஷ்யா “சதிசெய்ததாக” சொல்லப்படுவது குறித்தல்ல —அமெரிக்க ஜனநாயகத்திற்கு எதிராக அதன் சொந்த ஆளும் வர்க்கம் செய்கின்ற சதியுடன் அதை ஒப்பிடவும் இயலாது— மாறாக சிரியாவில் பஷார் அல்-ஆசாத்தின் அரசாங்கத்தை தூக்கிவீசுவதற்கு அமெரிக்கா செய்த முயற்சிகளை பயனற்றதாக்கி இருக்கின்ற ரஷ்யாவின் நடவடிக்கைகள் குறித்ததாகும். ஒபாமாவின் கீழ் உருவாக்கப்பட்டிருந்த ரஷ்ய-விரோதக் கொள்கையை —ஹிலாரி கிளிண்டனின் பிரச்சாரம் இதனை மேலும் விரிவுபடுத்துவதற்கு அர்ப்பணித்துக் கொண்டதாய் இருந்தது— பலவீனப்படுத்துவதில் இருந்து ட்ரம்ப்பை தடுத்து நிறுத்துவதற்கு அவர்கள் தீர்மானகரமாக உள்ளனர்.
9. ரஷ்யா மீதான இந்த வெறித்தனமான கவனக்குவிப்பு தற்செயலானதல்ல. ட்ரம்ப்பின் வெளியுறவுக் கொள்கை முன்னுரிமைகள், அனைவரும் அறிந்தவாறாய், சீனாவை எதிர்கொள்வதின் மீது கவனம் குவித்திருக்கின்றன. ரஷ்யாவுடன் ஒரு “உடன்பாட்டுக்கு” அவர் அறிவுறுத்துவதாக சொல்லப்படுவது இராணுவ, உளவு மற்றும் வெளியுறவுத் துறை ஸ்தாபகத்தில் ஆதிக்கம் செலுத்துகின்ற பிரிவுகளால் ஆதரிக்கப்படுகின்ற ஒரு மூலோபாய திட்டத்திற்கு இணங்கியதாக இல்லை. அமெரிக்காவின் இராணுவ நடவடிக்கைகளை பயனற்றதாக்குகின்ற ரஷ்யாவின் திறனை அழிப்பது யூரோஆசிய நிலப்பகுதியை கட்டுப்பாட்டில் கொண்டிருப்பதற்கு மையமானதாக பார்க்கப்படுகிறது, அது இல்லாமல் சீனாவுடனான ஒரு நீண்ட-கால மோதலில் அமெரிக்க வெற்றி என்பது சாத்தியமில்லாததாய் கருதப்படுகிறது.
10. ட்ரம்ப், “ஆழ் அரசில்” இருக்கக் கூடிய அவரது எதிரிகளாலும் ஜனநாயகக் கட்சியாலும் பதவியில் இருந்து அகற்றப்படுவாராயின், அது ஜனநாயகத்தின் ஒரு வெற்றியைக் குறிக்காது எனும்போது தொழிலாள வர்க்கத்தின் நிலைமைகள் மேம்படுவது குறித்த விடயத்திற்கெல்லாம் போகவும் தேவையில்லை. ஒபாமா நிர்வாகத்தின் கீழ், ஆளும் வர்க்கமானது அமெரிக்க வரலாற்றில் மிகப்பெரும் அளவில் கீழிருந்து மேலே செல்வம் இடமாற்றப்படுவதையும், அத்துடன் வெளிநாடுகளில் போர் விரிவாக்கம் செய்யப்படுவதையும் அத்துடன் இராணுவ-உளவு எந்திரத்தின் அதிகாரம் தொடர்ச்சியாக வளர்ச்சி கண்டு செல்வதையும் மேற்பார்வை செய்தது. வோல் ஸ்ட்ரீட்டின் மனதுக்கு பிடித்த வேட்பாளராய் இருந்த ஹிலாரி கிளிண்டன், இந்த அத்தனை கொள்கைகளையும் மேலும் ஆழப்படுத்துவதற்கும் அதேசமயத்தில் சிரியாவில் போரையும் மற்றும் ரஷ்யாவுடன் மோதலையும் தீவிரப்படுத்துவதற்கும் சூளுரைத்தார். சுகாதாரப் பராமரிப்பின் மீதான தாக்குதலுக்காகவோ, புலம்பெயர்ந்த தொழிலாளர்கள் மீதான தாக்குதலுக்காகவோ, நிர்வாகத்தில் அதி-வலது தேசியவாத சக்திகள் மேலெழுந்து செல்வதற்காகவோ, அல்லது வட கொரியா, ஈரான் மற்றும் சீனாவுக்கு எதிரான போர்த் திட்டங்களுக்கு எதிராகவோ விவாதிப்பதற்கு ஜனநாயகக் கட்சியினர் அழைப்பது கிடையாது.
11. ஜனநாயகக் கட்சியினர் ஏதோ ஒரு வடிவத்திலான அரசியல் ஆட்சிக்கவிழ்ப்பின் மூலமாக ட்ரம்ப்பை அகற்றும் தமது நோக்கத்தில் வெற்றிகாண்பார்களாயின், துணை ஜனாதிபதி மைக் பென்சை அது வெள்ளை மாளிகையில் அமர்த்தும், அவர் ட்ரம்ப்பை விட மிகவும் நாசூக்கானவர், ஆனால் பிற்போக்குத்தனத்தில் அவருக்கு கொஞ்சமும் சளைத்தவரல்ல.
யர் நடுத்தர-வர்க்கத்தின் எதிர்ப்பு
12. ட்ரம்ப்-எதிர்ப்பு முகாமின் இன்னொரு பாகத்தில், நடுத்தர வர்க்கத்தின் வசதியான பிரிவுகள் வருகின்றன, குடியரசுக் கட்சிக்கான இதன் எதிர்ப்பு, மக்களின் மிக வசதியான 10 சதவீதம் பேருக்குள் இன்னும் கொஞ்சம் சாதகமான விதத்தில் செல்வம் விநியோகிக்க செய்யப்பட வேண்டும் என்பதன் மீது கவனம் குவிந்ததாக இருக்கிறது. வர்க்கப் பிளவுகளை காட்டிலும் நிறரீதியான, பால்ரீதியான மற்றும் பாலியல் ரீதியான அடையாளத்தை முன்னிலைப்படுத்துகின்ற பல்வேறு போலி-இடது அமைப்புகள் (அமெரிக்க ஜனநாயக சோசலிஸ்டுகள், சர்வதேச சோசலிஸ்ட் அமைப்பு, சோசலிச மாற்று, பசுமைக் கட்சி) உள்ளிட பிரதானமாக ஜனநாயகக் கட்சியின் சுற்றுவட்டத்தில் இயங்குகின்ற பல்வேறு அரசியல் போக்குகளால் இந்த அடுக்கு பிரதிநிதித்துவம் செய்யப்படுகிறது.
13. ஆளும் வர்க்கத்திடம் இருந்து சுயாதீனமற்று இருப்பது நடுத்தர வர்க்க அரசியலின் குணாம்சமாகும். ஜனநாயகக் கட்சியின் மீது செல்வாக்கு செலுத்தி, முதலாளித்துவ அமைப்புமுறையில் மேலோட்டமான சீர்திருத்தங்கள் செய்வதற்கு அதன் ஆதரவை வென்றெடுப்பதற்கு இது முனைகிறது. இந்த அரசியல் வெளிக்குள் இருக்கின்ற கூடுதல் இடது-தாராளவாதக் கூறுகள் சமூக சமத்துவமின்மை பற்றிய பிரச்சினைகளை குறிப்பிடுகின்ற அதேநேரத்தில், அரை-சீர்திருத்தவாத விண்ணப்பங்களை, மிகவும் கோட்பாடற்ற விதத்தில், ஜனநாயகக் கட்சிக்கும் அமெரிக்க ஏகாதிபத்தியத்தின் நோக்கங்களுக்கும் ஆதரவு கோருவதுடன் ஒன்றுகலக்கின்றன. அவர்களது சலுகைமிக்க பொருளாதார நிலையானது பெருநிறுவன இலாபங்களிலும் பங்கு விலைகளிலுமான வரலாறுகாணாத அதிகரிப்பை அடிப்படையாகக் கொண்டிருக்கிறது என்ற உண்மையுடன் இது பிணைந்ததாகும். தொழிலாள வர்க்கத்தின் மீதான ஆளும் வர்க்கத்தின் மேலாதிக்கத்தை தக்கவைத்துக் கொள்வதுதான் அவர்களது பிரதான அரசியல் செயல்பாடாகும். 2016 தேர்தலில், அவர்கள் வேர்மண்ட் செனட்டரான பேர்னி சாண்டர்ஸின் பிரச்சாரத்தை விளம்பரப்படுத்தினர், அவரோ பரந்துபட்ட சமூக எதிர்ப்பை, வோல் ஸ்ட்ரீட் மற்றும் உளவு முகமைகளது வேட்பாளரான ஹிலாரி கிளிண்டனது பிரச்சாரத்தின் பின்னால் திருப்பி விட்டார். இப்போது சாண்டர்ஸ் அமெரிக்க செனட்டில் ஜனநாயகக் கட்சி குழுவின் ஒரு முன்னிலை உறுப்பினராய் உள்ளார்.
தொழிலாள வர்க்கத்தின் எதிர்ப்பு
14. மூன்றாவதும் முற்றிலும் மாறுபட்டதுமான மோதல் உருவாகிக் கொண்டிருப்பது— ஆளும் வர்க்கத்திற்கும் வெகுஜனங்களின் பரந்த, பல்வேறு வடிவ சமூகத் துன்பங்களால் பாதிக்கப்படுகின்ற மற்றும் அரசியல் வாழ்க்கையில் இருந்து முற்றிலும் அந்நியப்படுத்தப்பட்டிருக்கின்ற தொழிலாள வர்க்கத்துக்கும் இடையிலானதாகும்.
15. அமெரிக்காவில் சமூக நெருக்கடியின் யதார்த்தமானது தொழிலாள வர்க்கத்தில் எண்ணிலட்டங்கா எதிர்ப்பு மற்றும் கிளர்ச்சி வடிவங்களுக்கான புறநிலை அடித்தளமாக இருக்கிறது. ஒபாமா நிர்வாகம் அது அதிகாரத்தை விட்டு அகன்ற சமயத்தில், அமெரிக்காவில் வாழ்க்கை முன்னொருபோதும் இருந்திராத அளவுக்கு மேம்பட்டதாய் இருந்ததாக கூறிக் கொண்டபோதிலும் கூட, உண்மையான வேலைவாய்ப்பின்மை விகிதமோ 8.6 சதவீதமாய் இருக்கிறது, ஊதியங்கள் தேங்கியிருக்கின்றன, தொழிலாளர்கள் கொடூரமான வேலை நிலைமைகளுக்கும் தீவிரமடையும் சுரண்டலுக்கும் முகம்கொடுக்கின்றனர். வருவாயில் பெருநிறுவன இலாபங்களின் பங்கு, வரலாறு கண்டிராத அளவுக்கான உச்சநிலையில் இருக்க, வருவாயில் உழைப்புக்கு செல்லும் பங்கு வரலாறுகண்டிராத பாதாள நிலைகளில் இருக்கிறது.
16. ஆரோக்கிய பராமரிப்பு நெருக்கடி தீவிரமாக இருக்கிறது, மேலும் மோசமடைந்து சென்று கொண்டிருக்கிறது. ஒபாமாகேர் திட்டம் பெருநிறுவனங்கள் சுகாதார பராமரிப்பு செலவை அவற்றின் தொழிலாளர்களுக்கு மாற்றிவிடுகின்ற முனைப்பை மேலும் தீவிரமாக்கியிருக்கிறது. தேசிய சுகாதார பராமரிப்பு தேய்ந்து செல்வதுடன், மருந்து தொற்றுகளின் சுழற்சியும் சேர்ந்து, இறப்பு விகிதங்களின் அதிகரிப்புக்கும் எதிர்பார்ப்பு ஆயுள்காலத்தின் வீழ்ச்சிக்கும் இட்டுச்சென்றிருக்கிறது. வயதான தொழிலாளர்கள் அவர்கள் ஓய்வுபெற்று விட்டால் வருமானம் பற்றாக்குறையாகி விடும் என்பதால் நீண்ட காலத்திற்கு வேலை செய்கின்றனர், இளம் தொழிலாளர்கள் சகிக்க முடியாத அளவுக்கான மாணவர் கடனின் சுமையைப் பெற்றுள்ளனர்.
17. அமெரிக்க மக்களின் ஒரு சிறு அடுக்கின் ஏகபோகமாகியிருக்கும் செல்வம் பெருவாரியான மக்களுக்கு கற்பனைக்கும் எட்டாததாய் இருக்கிறது. பொருளாதார அறிஞர் Branko Milanovic உலகளாவிய சமத்துவமின்மை என்ற தனது சமீபத்தில் வெளியாகியிருக்கும் புத்தகத்தில், அநேகம் பேருக்கு ஒரு பில்லியன் டாலர் என்பதன் அர்த்தம் என்பதும் கூட விளங்கமுடியாதிருக்கிறது என்று குறிப்பிட்டார். அத்தகையதொரு செல்வ அளவின் பரிமாணத்தை விளங்கப்படுத்துவதற்காக, அவர், ஒரு மில்லியன் டாலர் உள்ள ஒரு மனிதர், தினந்தோறும் ஆயிரம் டாலர்களை செலவழித்தால், மூன்று வருடங்களுக்குள்ளாக அவருடைய செல்வம் மறைந்து போகும். ஒரு பில்லியனர், அதே விகிதத்தில் செலவிட்டால், அவருக்கு 2,700 வருடங்கள் வரை செலவிட முடியும்! என்பதை விளக்குகிறார்.
18. இப்போது மேலேயிருக்கின்ற 1 சதவீத குடும்பங்களிடம் இருக்கின்ற அளவுக்கான செல்வம்தான் கிட்டத்தட்ட கீழேயிருக்கின்ற 90 சதவீத குடும்பங்களிடம் இருக்கிறது. கீழிருக்கும் பாதி மக்கள்தொகையிடம் இருக்கும் அளவுக்கான செல்வம் 20 தனிநபர்களிடம் இருக்கிறது. அமெரிக்காவில் 40 சதவீத குடும்பங்களில் செல்வம் பூச்சியமாகவோ அல்லது எதிர்மறையாகவோ —அதாவது சொத்தைக் காட்டிலும் கடன் அதிகமாக இருக்கும் நிலை— இருக்கிறது. செல்வம்படைத்தவர்களில் 0.1 சதவீதம் பேர் மற்றும் மக்கள்தொகையில் 0.01 பேர் தங்களது சொந்த அரசியல் காலநிலை பாதுகாப்பு அமைப்பாக செயல்படுகிறார்கள், தேர்தல்களை வாங்குவதற்கு, அரசியல்வாதிகளுக்கு கையூட்டு அளிப்பதற்கு மற்றும் அரசியல் நிகழ்முறையைக் கட்டுப்படுத்துவதற்கு அவர்களிடம் மிகப்பரந்த அளவுக்கான பணம் இருக்கிறது.
தொழிலாள வர்க்கத்தின் அரசியல் மூலோபாயம்
19. வாழ்க்கை நிலைமைகள் சகிக்க முடியாததாக ஆகிக் கொண்டிருக்கின்ற தொழிலாள வர்க்கத்தின் பரந்த பிரிவுகள் இடையே சமூக கோபம் பெருகிச் செல்வதன் பல அறிகுறிகள் தென்படுகின்றன. “வரம்பற்ற வாய்ப்புகளைக் கொண்ட மண்”, “அமெரிக்கக் கனவு” போன்று கடந்த காலத்தில் அமெரிக்காவில் வாழும் வாழ்க்கையை விவரிப்பதற்கு பயன்படுத்தப்பட்ட சொல்லாடல்கள் எல்லாம் அர்த்தமற்றவையாக ஆகிவிட்டிருக்கின்றன, ஏனென்றால் அவை யதார்த்தத்துக்கு சம்பந்தமற்றவையாக இருக்கின்றன. இருக்கின்ற சமூகமானது ஏற்கனவே பெரும் செல்வச்செழிப்புடன் இருக்கின்றவர்களின் நலன்களுக்காகவே பிரத்யேகமாக சேவைசெய்கிறது என்பது உழைக்கும் பரந்த எண்ணிக்கையிலான மக்களுக்கு மேலும் மேலும் வெட்டவெளிச்சமாகி வருகிறது. உயர்-தரக் கல்வி, ஒரு பாதுகாப்பான சுற்றுச்சூழல், கண்ணியமான வீட்டுவசதி, பாதுகாப்பான வேலை, போதுமான ஓய்வு நேரம், கட்டுப்படியாகும் மருத்துவப் பராமரிப்பு போன்ற வாழ்க்கையின் அடிப்படை அத்தியாவசியங்களுக்கான அணுகல் என்பது பிறப்பினால் தீர்மானிக்கப்படுவதாக இருக்கிறது, அதாவது ஒரு மனிதன் எந்தக் குடும்பத்தில் பிறக்கிறானோ அந்தக் குடும்பம் இருக்கின்ற வர்க்கத்தையும் பொருளாதார அந்தஸ்தையும் சார்ந்ததாக இருக்கிறது.
20. அமெரிக்காவிற்குள்ளாக தொழிலாள வர்க்கத்தின் வாழ்க்கை நிலைமைகள் இடைவிடாது தேய்ந்து செல்வதும், உலகெங்கிலும் ஆளும் வர்க்கத்தினால் நடத்தப்படுகின்ற முடிவற்ற போர்களது அர்த்தமற்ற வன்முறையும் பரந்த மக்களின் சமூக நனவிலான ஒரு ஆழமான மாற்றத்தில் பிரதிபலிக்கின்றன. அரசியல் தலைவர்களும் ஊடகங்களும் முதலாளித்துவத்தின் பெருமைக்கு எப்போதும் போற்றிப்பாடல்கள் பாடுகின்றதான ஒரு நாட்டில், சோசலிசத்தில் ஆர்வமும் ஆதரவும், குறிப்பாக இளைஞர்களிடையே எழுச்சி காண்பதை கருத்துக்கணிப்புகள் வெளிப்படுத்துகின்றன.
21. அமெரிக்காவிற்குள் மற்றும் சர்வதேச அளவில் இரண்டிலும் பெருகுகின்ற புறநிலை நெருக்கடியின் நிலைமைகளுடன், பரந்த சமூக நனவு தீவிரப்படுவது சந்திப்பதானது வர்க்கப் போராட்டத்தின் வெடிப்பில் வெளிப்பாடு காணும். வர்க்கப் போராட்டமானது பல தசாப்தங்களாக தொழிற்சங்க அதிகாரத்துவத்தாலும், ஜனநாயகக் கட்சியாலும் மற்றும் அடையாள அரசியலின் பல்வேறு வடிவங்களை முன்னெடுக்கின்ற வசதியான பிரிவுகளாலும் ஒடுக்கப்பட்ட நிலையானது முடிவுக்கு வந்து கொண்டிருக்கிறது. ஆளும் உயரடுக்கின் சமூக எதிர்ப்புரட்சியானது அமெரிக்க தொழிலாள வர்க்கத்தின் ஒரு எழுச்சியை எதிர்கொள்ள இருக்கிறது. வேலையிடங்களிலும், சமூகங்களிலும் மற்றும் ஒட்டுமொத்த நகரங்களிலும் சமூக எதிர்ப்பின் பல்வேறு வேறுபட்ட வடிவங்களும் முன்னெப்போதினும் தனித்துவமான தொழிலாள வர்க்க அடையாளத்தையும், முதலாளித்துவ-எதிர்ப்பு நோக்குநிலையையும் சோசலிசத் தன்மையையும் பெறவிருக்கின்றன. தனித்தனியான வேலையிடங்கள் மற்றும் சமூகங்களில் நடக்கும் போராட்டங்கள் தொழிலாள வர்க்கத்தின் பரந்த பிரிவுகளது ஐக்கியப்பட்ட போராட்டமாக உருமாறும்.
22. மேலும், அமெரிக்காவிற்குள்ளான வர்க்கப் போராட்டம் சர்வதேச வர்க்கப் போராட்ட வெடிப்புடன் சந்தித்துக் கொள்ளும்போது அது பேரினவாத தேசியவாதத்தின் பலவீனப்படுத்தும் செல்வாக்கைக் குறைக்கும், அமெரிக்க தொழிலாளர்கள் மத்தியில் ஆழமான ஒரு சர்வதேச வர்க்க ஐக்கிய உணர்வு உருவாக உத்வேகமளிக்கும். சொந்த நாட்டில் சமூக ஒடுக்குமுறைக்கு எதிரான போராட்டம், அமெரிக்காவின் எல்லைகளுக்கு வெளியில் போருக்கு எதிரான போராட்டம் இரண்டும் ஒரே போராட்டத்தின் இரண்டு பிரிக்கமுடியாத தொடர்புடைய அம்சங்களாய் இருப்பதை தொழிலாள வர்க்கம் காணும்.
23. அமெரிக்காவில் பரந்த மக்கள் போராட்டங்கள் திட்டநிரலில் இருக்கின்றன. ஆர்ப்பாட்ட பேரணிகளும், எதிர்ப்பு ஆர்ப்பாட்டங்களும், மற்றும் வேலைநிறுத்தங்களும் பொதுவான ஒரு தேசிய-அளவிலான தன்மையை பெறுவதற்கு முனையும். ட்ரம்புக்கும் அவர் பிரதிநிதித்துவம் செய்கின்ற அத்தனைக்கும் எதிரான தொழிலாள வர்க்கத்தின் போராட்டமானது, முதலாளித்துவ அமைப்புமுறைக்கும் அதன் அரசுக்கும் எதிரான ஒரு அரசியல்மயமான வெகுஜன இயக்கத்தை, குடியரசுக் கட்சி மற்றும் ஜனநாயகக் கட்சி இரண்டிலிருந்தும் சுயாதீனப்பட்டும் மற்றும் அவற்றுக்கு எதிராகவும், கட்டியெழுப்புவதற்கான அவசியத்தை முன்னினும் அவசரமான பணியாக முன்வைக்கும் என்பதே இந்த பகுப்பாய்வில் இருந்து பிறக்கக்கூடிய அரசியல் முடிவாகும். இந்த புறநிலையான சமூகப் போக்கானது தொழிலாள வர்க்கப் போராட்டத்தின் ஒரு நனவான மூலோபாயமாக அபிவிருத்தி செய்யப்பட வேண்டும். முதலாளித்துவத்தின் கீழான வாழ்க்கையின் பரிதாபத்துக்குரிய சமூக நிலைமைகள் அத்தனைக்கும் எதிரான போராட்டங்களை, ட்ரம்ப்புக்கும் இரண்டு பெருவணிகக் கட்சிகளுக்கும் எதிரான ஒரு சோசலிச வேலைத்திட்டத்தின் அடிப்படையிலான அரசியல் போராட்டத்துடன் இணைக்கின்ற பணியானது தொழிற்சாலைகளிலும், வேலையிடங்களிலும், உழைக்கும் வர்க்க சமூகங்களிலும், மற்றும் நாடெங்கிலும் உள்ள பள்ளிகள் மற்றும் கல்லூரிகளிலும் எழுப்பப்பட வேண்டும், அங்கு விவாதப் பொருளாக்கப்பட வேண்டும்.
24. பாரிய தொழிலாள வர்க்கப் போராட்டங்களுக்கு தயாரிப்பு செய்வதற்கு, பெருநிறுவனங்களுக்கு ஆதரவாகவும் தொழிலாள வர்க்கத்துக்கு எதிராகவும் செயல்படுகின்ற தொழிற்சங்கங்களில் இருந்து சுயாதீனப்பட்டும் அவற்றுக்கு எதிராகவும் இருக்கும் மக்களடர்த்தி மிக்க வேலையிட மற்றும் அண்டைஅருகாமை கமிட்டிகளின் ஒன்றுடன்-ஒன்று இணைந்ததாக இருக்கின்ற ஒரு வலைப்பின்னல் உருவாக்கப்படுவது அவசியமாய் இருக்கிறது. ட்ரம்ப் நிர்வாகத்திற்கு தொழிலாள வர்க்கத்தில் இருக்கின்ற பாரிய எதிர்ப்பானது மக்களின் மிகப் பரந்த எண்ணிக்கையிலானோரின் தேவைகளை நிவர்த்தி செய்யத்தக்க தெளிவான முதலாளித்துவ-எதிர்ப்பு, ஏகாதிபத்திய-எதிர்ப்பு மற்றும் சோசலிசக் கோரிக்கைகளுடன் இணைக்கப்பட வேண்டும்.
25. இந்த அறிக்கையில் முன்வைக்கப்பட்டுள்ள போராட்டத்திற்கான மூலோபாயமானது தொழிலாளர்கள், இளைஞர்கள் மற்றும் மாணவர்கள், மற்றும் முதலாளித்துவத்தை எதிர்க்கின்ற மற்றும் சோசலிசத்தின் அவசியத்தை அங்கீகரிக்கின்ற அனைவரது பிரிவுகள் அத்தனையிலும் பரவலாய் விவாதிக்கப்பட வேண்டும் என்று சோசலிச சமத்துவக் கட்சி வலியுறுத்துகிறது. இந்த அறிக்கையை சக-தொழிலாளர்களிடமும் நண்பர்களிடமும் விநியோகியுங்கள். உங்கள் கருத்துகளையும் ஆலோசனைகளையும் உலக சோசலிச வலைத் தளத்திற்கு அனுப்புங்கள். தொழிலாள வர்க்கத்தின் நலன்களை முன்னேற்றுகின்ற நோக்கத்துடனான அத்தனை சிந்தனை மிகுந்த பங்களிப்புகளையும் நாங்கள் வரவேற்கிறோம்.
26. இந்தப் போராட்டத்தின் பாகமாக விரும்புவோர் சோசலிச சமத்துவக் கட்சியில் இணைவதற்கு நாங்கள் அழைக்கிறோம். மாணவர்களும் இளைஞர்களும் சமூக சமத்துவத்திற்கான சர்வதேச இளைஞர் மற்றும் மாணவர் அமைப்பின் (IYSSE) கிளைகளை உருவாக்க வேண்டும் என்று நாங்கள் வலியுறுத்துகிறோம். அபிவிருத்தியடைந்து வரும் ஒரு புறநிலை இயக்கத்தை நனவுபூர்வமானதாக்குவதும், தொழிலாள வர்க்கத்திற்கு அதன் இலட்சியங்கள் குறித்த முன்னெப்போதினும் மிகப்பெரும் அளவிலான புரிதலை புகட்டுவதும், அபிவிருத்தி காணுகின்ற இயக்கத்தின் தன்மையைக் குறித்து தெளிவுபடுத்துவதும் சோசலிச சமத்துவக் கட்சி மற்றும் IYSSE இன் பணியாகும். தொழிற்சாலைக் கமிட்டிகளை அமைப்பதிலும் இளைஞர்கள் மற்றும் மாணவர்கள் மத்தியில் எதிர்ப்பு அமைப்புகளை உருவாக்குவதிலும் SEP ஆலோசனைகள் வழங்கும், உதவி செய்யும். தொழிலாள வர்க்கத்திலான போராட்டத்தின் வளர்ச்சியை, அரசு அதிகாரத்தைக் கையிலெடுக்கவும் பொருளாதார வாழ்க்கையை தனியார் இலாபத்திற்காய் அல்லாமல் சமூகத் தேவைகளின் அடிப்படையில் மறுஒழுங்கு செய்வதற்குமான ஒரு சோசலிச, சர்வதேசிய மற்றும் ஏகாதிபத்திய-எதிர்ப்பு இயக்கத்துடன் இணைப்பதற்கு அது போராடும்.
Joseph Kishore and David North on behalf of the Socialist Equality Party Political Committee
http://www.wsws.org/tamil/articles/2017/6-Jun/jkdn-j15.shtml

LinkWithin

Related Posts Plugin for WordPress, Blogger...

Popular Posts