Search This Blog

Sunday, 29 October 2017

கொல்கத்தாவில் மாணவர்களும் தொழிலாளர்களும் கூகுள் தணிக்கையை எதிர்க்கின்றனர்

“Google is censoring websites to block dissident views critical of the US establishment”
India: Students and workers in Kolkata oppose Google censorship

“அமெரிக்க ஆளும்வர்க்கத்தை-ஸ்தாபனத்தை- விமர்சிக்கும் கருத்து வேறுபாடுகள் கொண்ட கண்ணோட்டங்களை தடுப்பதற்காக  வலைத்தளங்களை கூகுள் தணிக்கை செய்கிறது”

சமீபத்திய வாரங்களில், நான்காம் அகிலத்தின் அனைத்துலகக் குழு / உலக சோசலிச வலைத் தளத்தின் (ICFI / WSWS) இந்திய ஆதரவாளர்கள், இந்திய மாநிலமான மேற்கு வங்கத்தின் தலைநகரம் கொல்கத்தாவில் மாணவர்கள் மற்றும் தொழிலாளர்கள் மத்தியில் உலக சோசலிச வலைத் தளம் மீதான கூகுளின் தணிக்கைக்கு எதிராக பிரச்சாரத்தை நடத்தியுள்ளனர். மேலும் அவர்கள், உலக சோசலிச வலைத் தளத்தின் சர்வதேச ஆசிரியர் குழு தலைவர் டேவிட் நோர்த் இது தொடர்பாக வெளியிட்டிருந்த பகிரங்க கடிதத்தின் பிரதிகளையும் விநியோகித்தனர்.
ஏப்ரல் 25, 2017 அன்று, கூகுள், “தரம்குறைந்த” தகவல்களாக கருதும் “சதி தத்துவங்கள்” மற்றும் “போலி செய்திகள்” போன்றவற்றை அதன் பயனர்கள் அணுகுவதை கடினமாக்க அதன் தேடுபொறிகளின் நெறிமுறைகளில் மாற்றங்களை அறிவித்தது. ஆனால் உண்மையில் நடந்தது என்ன, உலக சோசலிச வலைத் தளம் மற்றும் ஏனைய போர்-எதிர்ப்பு, முற்போக்கு மற்றும் இடதுசாரி வலைத் தளங்களுக்கான தேடல் முடிவுகள் தான் கணிசமாக குறைக்கப்பட்டது.
ICFI/WSWS ஆதரவாளர்கள், கொல்கத்தாவிலுள்ள ஜாதாவ்பூர் பல்கலைக்கழகம் மற்றும் பிரசிடென்சி பல்கலைக்கழகம் ஆகிய இரண்டு பெரிய பல்கலைக்கழகங்களுக்குச் சென்று மாணவர்களிடம் கூகுள் தணிக்கைக்கு எதிரான WSWS/ICFI இன் பிரச்சாரத்தின் முக்கியத்துவம் பற்றியும், அத்துடன் ஜனநாயக உரிமைகள் மீதான இந்திய அரசாங்கத்தின் தாக்குதல்கள் மற்றும் சீனாவுக்கு எதிரான அமெரிக்க போர் உந்துதல் பற்றியும் உரையாடினர்.
பிரசிடென்சி பல்கலைக்கழகத்தில் மாணவர்களுடன் பிரச்சாரகர் ஒருவர் உரையாடுகிறார்
பிரச்சாரகர்கள், முதலாளித்துவ ஆட்சிக்கு எதிராக எழுகின்ற தொழிலாள வர்க்கத்தின் எந்தவொரு சுயாதீனமான அரசியல் இயக்கத்தையும் தடுப்பதில் முனைப்புடன் இருக்கும் இந்திய கம்யூனிஸ்ட் கட்சி-மார்க்சிஸ்ட் (Communist Party of India-Marxist – CPM) மற்றும் இந்திய கம்யூனிஸ்ட் கட்சி (Communist Party of India – CPI) ஆகிய இந்தியாவின் பிரதான ஸ்ராலினிச கட்சிகளின் துரோகத்தனமான பாத்திரத்தைப் பற்றியே முக்கியமாக விவாதித்தனர். மேற்கு வங்கத்தில், பிராந்திய வலதுசாரி கட்சியான திரினாமூல் காங்கிரஸ் கட்சி (Trinamool Congress-TMC) மூலமாக 2011 இல் வெளியேற்றப்படுவதற்கு முன்பு வரை 34 வருடங்களாக CPM தலைமையிலான இடது முன்னணி கட்சி தான் அங்கு ஆட்சி புரிந்தது.
மாணவர்கள் WSWS/ICFI இன் பிரச்சாரத்திற்கு தங்களது ஆதரவையும் தெரிவித்து, கூகுளின் தணிக்கையை எதிர்க்கும் WSWS இன் இணையவழி மனுவில் கையெழுத்திடவும் செய்தனர். பலரும் தகவல்களை அணுகும் தங்களது உரிமையை கூகுள் தடுப்பதாக கவலைப்பட்டனர். பிரச்சாரகர்களிடம் மைனக் சர்க்கார் என்பவர் பின்வருமாறு தெரிவித்தார்: “ஒரு மூன்றாவது உலகப் போர் சாத்தியமானால் அது பேரழிவை விளைவிக்கும் என்பதால் அதைப் பற்றி மக்கள் அறிந்துகொள்வதை அவர்கள் விரும்பவில்லை போலும்.”
சர்வதேச தொழிலாள வர்க்கத்தின் போர் எதிர்ப்பு இயக்கம் ஒன்றை கட்டமைக்க ICFI/WSWS நடத்தும் பிரச்சாரம் குறித்து சௌமென் சௌத்ரி கருத்து தெரிவித்தார்: “மனிதகுலத்தை காப்பாற்றும் ஒரு சிறந்த நடவடிக்கையாக இது உள்ளது. அரசாங்கங்கள் தான் இந்த தவறான வழிநடத்துதல்களை உருவாக்கி மக்களின் கருத்துக்களில் தாக்கத்தையும் ஏற்படுத்துகின்றன. அமெரிக்க ஆளும் வர்க்கத்தை விமர்சிப்பதில் கருத்து வேறுபாடுகள் கொண்ட கண்ணோட்டங்களை தடுப்பதற்காக, அவைதான் வலைத் தளங்களையும் தணிக்கை செய்கின்றன.
பிரசிடென்சி பல்கலைக்கழகத்தில், ஆர்யமா பட்டாச்சார்யா என்பவர் பின்வருமாறு தெரிவித்தார்: “கூகுளின் இந்த நடவடிக்கை பேச்சு சுதந்திரத்தை ஒடுக்குவதாகும். ஈராக்கில் எண்ணெய் வயல்களை அமெரிக்க அரசாங்கம் தனது கட்டுப்பாட்டில் எடுத்துக்கொண்டது. ஒரு உலகளாவிய போர் நிகழுமானால், எதிர்பாராத விளைவுகளை ஏற்படுத்தக்கூடிய மிகவும்மேம்பட்ட ஆயுதங்களையும் அவர்கள் கொண்டுள்ளனர்.”
செப்டம்பர் 5 அன்று பெங்களூரில் ஒரு பெண் பத்திரிகையாளரான கௌரி லங்கேஷ் கொல்லப்பட்டதை பட்டாச்சார்யா குறிப்பிட்டார். பிரதமர் நரேந்திர மோடியின் ஆளும் பாரதிய ஜனதா கட்சி உட்பட, இந்து வலதை அம்பலப்படுத்தவும், கண்டிக்கவும் செய்ததனால் இந்துத்துவ தீவிரவாதிகளின் இலக்காக லங்கேஷ் இருந்தார். அதனால், அவர் கொலை செய்யப்பட்டது கூட இந்து வகுப்புவாதிகளின் வேலையாக இருக்குமென நம்பப்பட்டது.
பட்டாச்சார்யா மேலும் தெரிவித்தார்: “பேச்சுரிமை நசுக்கப்பட்டுவிட்டது. இது லங்கேஷுக்கு மட்டுமல்ல. சில நாட்களுக்கு முன்னர் மணிப்பூரிலும் ஒரு பத்திரிகையாளர் கொல்லப்பட்டார். இது அரசாங்கத்தின் பலத்தையே நிரூபிக்கிறது. அவர்கள் பெரும்பான்மையுடன் இருப்பதால், “இதுதான், எம்மால் செய்ய முடியும்” என்று அமெரிக்கா கூறுவது போல், அவர்களும், “இதுதான், எம்மால் செய்ய முடியும் !” என்று கூறுகின்றனர். மக்கள் விழித்துக்கொள்ளும் நேரம் வந்து விட்டது.”
பிரசிடென்சி பல்கலைக்கழக மாணவர் உஜன், மேற்கு வங்கத்தில் உள்ள ஸ்ராலினிச இடது முன்னணி மற்றும் திரினாமூல் காங்கிரஸ் போன்ற கட்சிகளைப் பற்றி பின்வருமாறு பேசினார்: “இடது (முன்னணி), கம்யூனிசத்தின் நிலைப்பாட்டை ஒருபோதும் பிரதிநிதித்துவம் செய்யவில்லை. அவர்கள் ஏழை மக்களைப் பற்றி சிந்திக்கவில்லை என்பதோடு, அவர்களது வாக்குகளைப் பற்றி மட்டுமே அக்கறை காட்டினர். அவர்கள் “இடதாக” இருப்பதாக மட்டுமே கூறிக்கொண்டனர். திரினாமூல் காங்கிரஸ் மூலமாக CPM தலைமையிலான அரசாங்கம் தோல்வியடைந்த பின்னரும், எதுவும் மாறவில்லை. அவர்கள், CPM இனைவிட வெறும் குறைந்த கல்வியறிவு பெற்றதிலேயே வேறுபாடுடையவர்களாக இருந்தனர். எந்தவித எதிர்ப்பும் அனுமதிக்கப்படவில்லை.”
மோடி அரசாங்கத்தை பற்றி கேட்டபோது, உஜன், “பெருநிறுவன ஊடகங்கள் மூலமாக அற்பத்தனமாக எப்படி விற்பது மற்றும் சந்தைப்படுத்துவது என்பதை அவர் (மோடி) அறிவார். அவரது பிஜேபி அரசாங்கத்தின் பொருளாதார மற்றும் நிர்வாக தோல்விகள் மீது கவனம் குவிப்பதை மாற்றுவதற்காக அவர் வகுப்புவாத வெறுப்பைத் தூண்டி விடுகிறார். மோடியை எதிர்த்து நிற்கும் எவரும் கீழே தள்ளப்படுகின்றனர். மேலும், அரசாங்கத்தை விமர்சிக்கும் எவரும் தேசத்திற்கு எதிர்ப்பாளராக முத்திரைகுத்தப்பட்டு வருகின்றனர்” என தெரிவித்தார்.
“பெருநிறுவன ஊடக உதவியுடன் அதிகாரத்திற்கு வந்ததிலிருந்து, அவர் பெரிய காரியங்களைச் செய்வதாக பொது மக்கள் முன்பு படம் தான் போட்டுக் காட்டுகிறார். ஆனால் உண்மையில், மோடி நாட்டின் செல்வ வளத்தை உறிஞ்சி வருகிறார் என்பதோடு, முதலீட்டாளர்கள் வசம் அதை ஒப்படைத்தும் விட்டார்” எனவும் தெரிவித்தார்.
உஜன் பத்திரிகையாளர் லங்கேஷின் கொலை பற்றியும் பேசினார். “இது மோடி அரசாங்கத்தின் பாசிசவாத இயல்பையே அடிப்படையில் வெளிப்படுத்தியது. மேலும், அவர்களை எதிர்க்கும் எவரையும் கீழே தள்ளிவிட வேண்டும்! எனவும் அதே மாதிரி, அரசாங்க விரோத கருத்துக்களைக் கொண்ட எவரையும் தேச விரோதி என முத்திரைகுத்தி தாக்கிவிட வேண்டும் எனவும் நினைக்கிறார்கள். உண்மையில், மக்களைப் பாதுகாப்பதில் தேசியவாதம் எதையும் செய்துவிடவில்லை. தேசம், எல்லைகள், கொடி மற்றும் தேசியகீதம் இவை எதுவும் மக்களைப் பற்றியதாக இல்லை.”
பாகிஸ்தானுக்கு எதிரான மோடியின் போர்குணமிக்க பிரச்சாரம் குறித்து பேசுகையில், உஜன், தேசியவாதத்தை தூண்டிவிடுவதற்கும் உழைக்கும் மக்களின் மீதான தாக்குதல்களை தீவிரப்படுத்துவதற்கும் இடையே ஒரு தொடர்பு இருந்தது எனக் குறிப்பிட்டார். “பாகிஸ்தான் நம்மை தாக்க போவதாக கூறி மக்களை பயமுறுத்த மோடி முயல்கிறார். பாகிஸ்தான் என்றாலே அவர்கள் நமது எதிரி என்று நமது நாட்டில் பகைமை தன்மை வளர்க்கப்பட்டுவிட்டது. இந்த பிரச்சாரம் வகுப்புவாத வெறுப்புக்கு பங்களிப்பு செய்கிறது.”
“தேசியவாதத்தையும், இனவாதத்தையும் தூண்டிவிடுவதன் மூலமாக, மக்களுக்கு எதிரான அவர்களின் ஆக்கிரோஷமான தாக்குதல்களிலிருந்து பொதுமக்கள் கவனத்தை திசைதிருப்ப வேண்டுமென்றே அவர்கள் முயற்சி செய்கின்றனர். இந்த வகுப்புவாத மற்றும் தேசியவாத பிரச்சினைகளில் பிரதான கவனம் செலுத்தப்பட்டாலும், பொருளாதார ரீதியாக நம்மை படிப்படியாக எப்படி இழக்கச் செய்கிறது என்பதை நாம் கவனிப்பதில்லை,” என்றவர் கூறியதோடு, “மோடி அரசாங்கம், பயங்கரவாதத்தை எதிர்ப்பதாக மோசடி செய்து அதன் கீழ் பணம் செல்லாததாக்குதல் நடவடிக்கைகளை மேற்கொண்டதோடு, அடுத்து பொருட்கள் மற்றும் சேவை வரியையும் (Goods and Service Tax-GST) அறிமுகப்படுத்தியுள்ளது” எனவும் தெரிவித்தார்.
“அரசியல் கட்சிகள் அனைத்துமே உண்மையில் முதலாளித்துவ கட்சிகளாகிவிட்டதால் அவை எதையும் நான் நம்பவில்லை. இடது மற்றும் வலது இரண்டிற்கும் இடையே அடிப்படையான வேறுபாடு எதுவுமில்லை. இனவாதத்திற்கும், முதலாளித்துவ அரசாங்கங்களுக்கும் எதிராக போராட இந்த நாட்டில் இடது மாற்று எதுவுமில்லை. ஏழைகளுக்கும், தொழிலாளர்களுக்குமான ஒரு எழுச்சி இருக்கவேண்டும், ஆனால், CPM அல்லது பிற கட்சிகளின் தலைமையின் கீழ் அதைச் செய்யமுடியாது. இந்நிலையில், புரட்சிகர இயக்கத்திற்குள் தொழிலாள வர்க்கத்தை நாம் தான் இணைக்க வேண்டும்” எனக்கூறி முடித்தார்.
அக்டோபர் 8 அன்று, ICFI ஆதரவாளர்கள், “People’s Film Collective. என்ற கலைக் குழுவால் கௌரி லங்கேஷின் நினைவாக ஒருங்கமைக்கப்பட்ட ஒரு கண்டனவாத திரைப்படத்தை திரையிடுகையில் தலையிட்டனர். அப்போது அவர்கள், லங்கேஷ் படுகொலை பற்றிய உலக சோசலிச வலைத் தள கட்டுரையின் பிரதிகளை அங்கு விநியோகித்ததோடு, கூகுள் தணிக்கைக்கு எதிரான பிரச்சாரத்தைப் பற்றியும் பங்கேற்றவர்களுடன் பேசினர்.
A.பாலாஜி, வங்கி ஊழியராக இருக்கும் இவர் பின்வருமாறு தெரிவித்தார்: “பேச்சு சுதந்திரம் என்பது எங்கும் அதிகரித்துவரும் தாக்குதலுக்கு உள்ளாகிறது. இந்த பிரச்சினைப் பற்றி நாம் இன்னும் அதிகமான விழிப்புணர்வை ஏற்படுத்த வேண்டும். அடிப்படை ஜனநாயக உரிமைகளை பாதுகாப்பதற்கான இந்த பிரச்சாரம், பள்ளிகள் உள்ளிட்ட அனைத்து பிரிவுகளையும் சார்ந்த மக்கள் மத்தியில் பரந்தளவில் வளர்ச்சியடையவேண்டும். இந்த நாட்டில், மோடி அரசாங்கம் ஜனநாயக உரிமைகள் மீது தொடர்ச்சியான தாக்குதல்களை நடத்தி வருகின்றன. இந்துத்துவ வகுப்புவாதிகளால் கௌரி லங்கேஷ் கொலை செய்யப்பட்டது கூட, பேச்சு சுதந்திரம் மீதானதொரு சமீபத்திய தாக்குதலாவே உள்ளது.”
A. வெங்கட்ரமணா, ஆசிரியரான இவர், ஸ்ராலினிச கட்சிகளின் பங்கு பற்றி கருத்து தெரிவித்தார்: “இடதுசாரிகள் தங்களை மக்களிடமிருந்து அந்நியப்படுத்திக் கொண்டுள்ளனர். வகுப்புவாதத்திற்கு எதிராகவும், அடிப்படை ஜனநாயக உரிமைகளை பாதுகாப்பதிலும் நாம் உண்மையுடன் போராட வேண்டும். ஆனால், இடதுசாரிகளின் நேர்மையற்ற தன்மையின் காரணமாக, இங்கு அவர்களது பரிதாபகரமான நிலைமையையே நாம் காண்கிறோம்.”
By Ritwik Mitter and Arun Kumar
19 October 2017
http://www.wsws.org/tamil/articles/2017/10-Oct/goog-o29.shtml

Saturday, 28 October 2017

அணுஆயுத குண்டுவிமானங்களை 24 மணிநேர தயார்நிலையில் வைத்திருக்க அமெரிக்கா தயாராகிறது

US prepares to put nuclear bombers on 24-hour alert

வட கொரியாவுடன் ஆழமடைந்து வரும் மோதல்நிலை மற்றும் ரஷ்யா மற்றும் சீனாவுடன் அதிகரித்துவரும் பதட்டங்களுக்கு மத்தியில், 1991 ஆம் ஆண்டிற்கு பின்னர் முதல் முறையாக அமெரிக்கா அணுசக்தி திறன்வாய்ந்த B-52 ரக குண்டுவீசிகளை 24 மணிநேர தயார்நிலையில் வைத்திருக்க மீண்டும் அதன் கப்பற்படையை தயார்படுத்தி வருகிறது.  
“நாங்கள் தயாராக இருக்கிறோம் என உறுதிசெய்து கொள்வதில் இது முன்னோக்கிய ஒரு படியாகும்” என்று விமானப்படைத் தலைவர் ஜெனரல் டேவிட் கோல்ட்ஃபெய்ன் Defense One செய்தி ஊடகத்திற்கு அளித்த பிரத்தியேக பேட்டி ஒன்றில் தெரிவித்தார்.
பனிப்போரின் போது, அமெரிக்க விமானப்படை மூலோபாய விமான கட்டளையகம் (US Air Force Strategic Air Command), அமெரிக்கா முழுவதிலுமான இராணுவத் தளங்களில், நிரந்தர தயாரிப்பு நிலைப்பாடாக தளத்தில் மாலுமி குழுவினர் தங்கும் வசதிகளுடன் B-52 ரக அணுசக்தி திறன்வாய்ந்த கனரக குண்டுவீசிகளை நிலைநிறுத்தி வைப்பதற்கு “கிறிஸ்துமஸ் மரம்” என அழைக்கப்படும் தயார்நிலையான பகுதிகளை தனது தளங்களில் பராமரித்து வந்தது.
லூசியானாவிலுள்ள பார்க்ஸ்டெல் விமானப்படை தளத்திற்கு பயணம் செய்தபோது கோல்ட்ஃபெய்ன், பனிப்போரின் முடிவிற்கு பின்னர் முடக்கி வைக்கப்பட்டிருந்தவற்றை புதுப்பித்தே இத்தகைய வசதிகள் உருவாக்கப்பட்டுள்ளது என்பதைத் தெளிவுபடுத்தினார்.
“ஒரு எச்சரிக்கை தோற்றப்பாங்காக B-52 ரக குண்டுவீசிகளை காட்டிக்கொள்ள பார்க்ஸ்டெல்லை தயார்செய்யும் பொருட்டு ஏற்கனவே பல்வேறு மேம்பாடுகள் அங்கே மேற்கொள்ளப்பட்டுள்ளன. மேலும், எச்சரிக்கை தளங்களுக்கு அருகிலுள்ள ஒரு பழமையான கான்கிரீட் கட்டிடமும் புதுப்பிக்கப்பட்டு வருகிறது. பனிப்போர் காலத்தில் B-52 குண்டுவீசி குழுக்கள், அங்கு தான் தங்கியிருந்து, தங்களது விமானத்தை நோக்கி ஓட எப்பொழுதும் தயாராக இருப்பர் என்பதோடு, கண நேர அறிவிப்பில் வெளியேறுவர். மேலும் அதன் உள்ளே, 100 க்கும் மேற்பட்ட குழு உறுப்பினர்களுக்கு தேவையான படுக்கை வசதிகள் ஏற்பாடு செய்யப்பட்டிருக்கும், அத்துடன் வெளிப்புறத்திலுள்ள ஒன்பது எச்சரிக்கை தளங்களில் மனித குண்டுவீச்சாளர்களை நிலைநிறுத்தும் குழுக்கள் தங்குவதற்கும் சேர்த்து அங்கு தேவைக்கு அதிகமான அறைகளும் அமைக்கப்பட்டிருக்கும்” என Defense One இல் தெரிவிக்கப்பட்டது.
மினியாட் விமானப்படைத் தளத்தில் அமைக்கப்பட்டிருந்த கிறிஸ்துமஸ் மர வடிவிலான ஓடுதளத்தில் B-52 குண்டுவீசிகள் நிலைநிறுத்தப்பட்டுள்ளது - 1991 இல் எடுக்கப்பட்ட புகைப்படம்.
“கோல்ட்ஃபெய்னும், ஏனைய மூத்த பாதுகாப்பு அதிகாரிகளும், எச்சரிக்கை ஆணை பிறப்பிக்கப்படவில்லை என்றும், ஆனால் அது நிகழக்கூடும் என்ற எதிர்பார்ப்பில் தயாரிப்புக்கள் மட்டுமே நடைபெற்று வருகின்றதென வலியுறுத்தி கூறியதாக” Defense One குறிப்பிட்டது. Defense One இன் விபரிப்பிற்கு விடையிறுப்பாக விமானப்படை, அத்தகைய ஆணை ஏதும் பிறப்பிக்கப்படவில்லை என்றும், அது வெறும் மறுபரிசீலனை தான் என்பதாக “மறுப்பு” ஒன்றையும் வெளியிட்டது. அதிலும் அந்த வசதிகள், 24 மணி நேர தயார்நிலை பயன்பாட்டிற்காக மட்டுமே புதுப்பிக்கப்பட்டு வருகின்றன என்பது போன்ற குற்றச்சாட்டுக்களை விமானப்படை குறிப்பாக மறுக்கவில்லை.
பல வழிகளில், கோல்ட்ஃபெய்னின் அறிக்கைகள் பதில்களை விட அதிகளவு கேள்விகளையே எழுப்புகின்றன. ரஷ்யா, சீனா மற்றும் அவற்றின் நட்பு நாடுகள் நிலைநிறுத்தியுள்ள உயர்தர விமான எதிர்ப்பு ஏவுகணைகளுக்கு முன்னால் இந்த B-52 ரக குண்டுவீசிகள் அளவில் பெரிய, மெதுவான வேகம் கொண்ட மற்றும் வலுகுன்றியவையாக உள்ளன. பனிப்போரின் போது, இந்த குண்டுவீசிகள், எதிர்பாரா அணுஆயுத தாக்குதல்களுக்கு பாரியளவில் பதிலடி கொடுக்கும் விதமாக நிரந்தர தயார்நிலையில் பராமரிக்கப்பட்டு வந்தன. அணுஆயுத தாக்குதல் ஆகாயத்தில் நிகழும் அந்த கணத்திலேயே அதிவிரைவாக அவற்றை எதிர்கொள்ள இந்த குண்டுவீசிகளை பிரயோகிக்கும் விதமாக “கிறிஸ்துமஸ் மரங்கள்” வடிவமைக்கப்பட்டு இருந்தன. அந்த நேரத்தில், அவர்கள் தங்கள் இலக்குகளுக்கான ஒரு சிறு வழியைக் கண்டறிந்து, டசின் கணக்கிலான பெரும் நகரங்களை சாம்பலாக்கிவிடும் திறன் கொண்டதான, ஒரு மணி நேரத்திற்குள் அதன் இலக்கை சென்றடையக்கூடிய ஒன்று அல்லது அதற்கு மேற்பட்ட அணுஆயுத சக்திவாய்ந்த கண்டம் விட்டு கண்டம் பாயும் ஏவுகணை (ICBMs) தொகுதிகளை ஏற்கனவே அங்கு நிறுவி வெடிக்க செய்யப்படவேண்டியிருக்கும்.
ஒரு எல்லைப்புற மோதலில் தற்செயலான துப்பாக்கிச்சூடு பரிமாற்றத்திற்கு பதிலடி கொடுக்கும் போதோ அல்லது மூர்க்கத்தனமாக உணர்ச்சிவசப்படும் ஜனாதிபதி ட்ரம்பின் பின் இரவு பிரமையினாலோ, அணுஆயுத சக்திவாய்ந்த நாடுகள் தாக்குதலுக்கு உள்ளானாலும் உடனடியாக அவற்றை மீள்கட்டமைக்கும் சாத்தியங்களை கொண்ட அளவில் பெரிய நாடுகளான ரஷ்யா அல்லது சீனா உடனான ஒரு முழு அளவிலான வெப்ப ஆற்றல்மிக்க அணுஆயுத பரிமாற்றத்திற்கானதொரு உலகையே அமெரிக்கா தயாரிப்பு செய்து வருகிறது என்பதாக கோல்ட்ஃபெய்ன் கருத்துக்களின் மிக நேர்த்தியான விளக்கம் இருந்தது.
அதே பாணியில், கோல்ட்ஃபெய்ன் Defense One இல், “எந்தவொரு குறிப்பிட்ட நிகழ்வுக்காகவும் திட்டமிடப்படவில்லை என்றே நான் இன்னும் இதைப் பார்க்கிறேன், என்றாலும் உலகளாவிய சூழ்நிலையின் யதார்த்தத்தை பொறுத்து நமக்கு நாமே தான் கண்டுபிடித்துக் கொள்ளவேண்டும்” எனவும் தெரிவித்தார்.
ஆனால் பிற கேள்விகளும் உள்ளன. திட்டங்கள் குறித்து விவாதிக்க கோல்ட்ஃபெய்னை பணியாளர் கூட்டு தலைவர்கள் அங்கீகரித்துள்ளனர் என்பதை விமானப்படை விரைவாக ஏன் “மறுதலித்தது”? 24 மணிநேர தயார்நிலைக்கு விமானப்படை திட்டமிடவில்லை என்றால், புனரமைப்புக்கு அங்கீகாரம் அளித்தது யார், அவற்றை நிலைநிறுத்த விமானப்படை ஏன் மறுப்பு தெரிவிக்கவில்லை?
இந்த கருத்தின் அடிப்படையில், வடக்கு டகோட்டாவில் மினியாட் விமானப்படைத் தளத்தில் இருந்து, ஒவ்வொன்றும் W80 அணுசக்தி வெடிக்கும் சாதனங்களைக் கொண்டதான ஆறு AGM-86 கடல்வழி ஏவுகணைகளை தாங்கிய, B-52 ரக குண்டுவீசி ஒன்று தளத்தை நோக்கி “தற்செயலாக” பறந்து வந்தபோது, ஆகஸ்ட் 2007 இல் நடந்ததான இன்னும் விவரிக்கப்படாத நிகழ்வில் பார்க்ஸ்டலே விமானப்படைத் தளத்தின் ஈடுபாட்டின் மதிப்பு குறிப்பிடத்தக்கது. இந்த சம்பவம், USAF செயலர் மிக்கேல் வெய்ன் மற்றும் USAF தலைமை அதிகாரி மிக்கேல் மொசேலே ஆகியோர் உள்ளிட்ட பல உயர்மட்ட விமானப்படை அதிகாரிகளின் இராஜிநாமாவிற்கு வழிவகுத்தது.
இது தொடர்பாக, கோல்ட்ஃபெய்னின் கூடுதல் கருத்துக்கள் நடுங்கச் செய்பவையாக உள்ளன. “குற்றங்களை தடை செய்யும் விதமாகவோ அல்லது போருக்காகவோ அணுஆயுதங்களை பயன்படுத்தக்கூடிய புதிய வழிகள் பற்றி சிந்திக்க அவரது படையினரை அவர் கேட்கிறார்” என Defense One தெரிவிக்கிறது. வேறு வார்த்தைகளில் குறிப்பிடுவதானால், ஹிரோஷிமா மற்றும் நாகசாகி மீதான குண்டுவீச்சு தாக்குதலுக்குப் பின்னர், விமானப்படைத் தலைவர் முதல் முறையாக அணுஆயுத பயன்பாடு கொண்ட போருக்கு உந்தும் அவரது சொந்த முன்முயற்சிகளை மேற்கொண்டு வருகிறார், மேலும் புதிய ஆயுத அமைப்புக்களை உண்மையில் களத்தில் இடம்பெறச் செய்யும் நடவடிக்கையை எடுப்பதற்கு முன்னதாகவே அவற்றை நிலைநிறுத்துவதற்கான தயாரிப்புகளை செய்து வருகிறார்.
மேலும் இது தொடர்பாக, கோல்ட்ஃபெய்னால் உந்தப்படும் அமெரிக்க அணுசக்தி படையின் ஆக்கிரோஷமான அபிவிருத்தி, அமெரிக்காவின் அணுசக்தி ஆயுதங்களின் எதிர்காலம் பற்றிய தனது அமைச்சரவை மற்றும் இராணுவ அதிகாரிகளுடனான முரண்பாடான விவாதங்களில் ஜனாதிபதி ட்ரம்பினால் முன்வைக்கப்பட்ட நிலைப்பாடுகளுடன் பிணைந்துள்ளது. பேர்போன ஜூலை 20 பென்டகன் கூட்டத்திற்கு பின்னர், எண்ணற்ற உடன்படிக்கைகளை வெளிப்படையாக மீறும் நிலைக்கு அமெரிக்காவை இட்டுச்செல்லும் ஒரு நடவடிக்கையாக, அமெரிக்க அணு ஆயுதங்களின் எண்ணிக்கையில் பத்து மடங்கு அதிகரிப்புக்கு ஜனாதிபதி ட்ரம்ப் அழைப்பு விடுத்துள்ள நிலையில், தேசிய செயலர் றெக்ஸ் ரில்லர்சன் அவரை “மூடன்” என அழைத்தார்.
அமெரிக்க அணுஆயுத படைக்கலசாலையை விரிவுபடுத்துவது பற்றிய ட்ரம்பின் பெருமைபீற்றல் அவரது சொந்த குரூர இயல்பினதாக இருந்தாலும், ஒரு புதிய வகை அணுஆயுதம் தாங்கிய கண்டம் விட்டு கண்டம் பாயும் ஏவுகணை நீர்மூழ்கிக் கப்பல்கள், ஒரு புதிய வகை ICBM மற்றும் ஒரு புதிய அணுஆயுதம் தாங்கிய கடல்வழி ஏவுகணை ஆகியவற்றை நியமிப்பதன் மூலமாக, வாஷிங்டனின் அணுஆயுத படைக்கலத்தை நவீனமயமாக்க 1 டிரில்லியன் டாலர் திட்டம் போன்ற ஒரு பெரிய பாரிய இயக்கத்தை ஏற்படுத்த உதவிய ஒபாமாவின் கீழ் பின்பற்றப்பட்ட கொள்கைகளின் தொடர்ச்சியாகவே அவை உள்ளன என்பதையே குறிக்கிறது.
வட கொரியா அத்துடன் ரஷ்யா மற்றும் சீனா ஆகிய நாடுகளுக்கு எதிராக தொடர்ச்சியான அமெரிக்க ஆத்திரமூட்டல்களுக்கு மத்தியில் விமானப்படை, ஒரு நிரந்தர தயார்நிலைக்கு ஏதுவாக மூலோபாய குண்டுவீசிகளை நிலைநிறுத்த தயாராகி வருகிறது என்பதே வெளிப்படையாகவுள்ளது.
அமெரிக்க மற்றும் தென் கொரிய கடற்படைகளுக்கு இடையே கடந்த வாரங்களில் நடைபெற்ற பாரிய கூட்டு இராணுவ பயிற்சிகள் குறித்த முனைப்புகளில், போருக்கான சாத்தியத்தை எதிர்நோக்கி தென் கொரியாவில் இருந்து பணியாளர்களை வெளியேற்றுவதற்கான திட்டங்களை உடனடியாக சோதிக்க உள்ளதாக அமெரிக்கா அறிவித்தது.
பயிற்சிகளில் ஈடுபட்டுள்ள விமானம் தாங்கி கப்பல் ஒன்றிலிருந்து வந்த அறிவிப்பின்படி, ABC’s Martha Raddatz ஞாயிறு தின “This Week” நிகழ்ச்சியில், “ஜப்பான் கடல் போர்க்கப்பல்களால் நிறைந்துள்ளது” என தெரிவித்தார். மேலும், நிகழ்ச்சி பகுதியை நிறைவு செய்யும்போது, Raddatz, மாலுமிகள் “இன்று இரவே போராடத் தயாராக இருக்க வேண்டும்” என அறிவித்தார்.
இதற்கிடையில், நேட்டோ, கிழக்கு ஐரோப்பாவில் ரஷ்யாவுடனான மோதலுக்கு தயார் செய்வதில் அதன் பிரசன்னத்தை அதிகரிக்க ஒரே நேரத்தில் முனைந்து வருகிறது. நேட்டோவின் இராணுவ படைகளை இன்னும் விரிவுபடுத்துவதற்கு அழைப்பு விடுக்கும் நேட்டோ, உள்நாடுகளுக்கான வெள்ளை அறிக்கையில் குறிப்பிடப்பட வேண்டிய உள்ளடக்கங்களைப் பற்றி, ஜேர்மனியின் Der Spiegel இதழ் இவ்வாறு குறிப்பிடுகின்றது, “1989 க்கு பிந்தைய ஆண்டுகளில் மேற்கத்திய நாடுகள் தங்களது தற்காப்பு திறன்கள் குறித்து நீண்ட காலத்திற்கு அதிகம் செலவழிக்கும் தேவை இருக்காது என உணர்ந்ததை குறிப்பிடுவதான “சமாதான பங்கீடு” என அழைக்கப்பட்ட காலம் முடிவடைந்துவிட்டது, மேலும் பனிப்போர் கால கட்டளை அமைப்புக்களுக்கு திரும்பியுள்ளது. மீண்டும் ஒருமுறை, ஒரு பெரும் இராணுவ மோதலுக்கு நேட்டோ தயாராக வேண்டும்.”
இந்த சூழலில் பார்த்தால், அணு ஆயுதம் தாங்கிய அத்தகையதொரு “பெரும் போருக்கு” அமெரிக்க விமானப்படை தயாராகி வருவது தெரிகிறது.
By Andre Damon
24 October 2017
http://www.wsws.org/tamil/articles/2017/10-Oct/nucl-o28.shtml

Thursday, 12 October 2017

ஸ்பெயின், கட்டலோனியாவில் இராணுவ ஒடுக்குமுறைக்கு தயாரிப்பு செய்கிறது

Spain prepares military crackdown in Catalonia

Image source from Internet
ஸ்பெயின் இராணுவமும் மற்றும் பொலிஸ் படைப்பிரிவுகளும் கட்டலோனியாவில் நேற்றும் தொடர்ந்து நிலைநிறுத்தப்பட்ட நிலையில் கட்டலோனியாவில் ஒரு இராணுவ ஒடுக்குமுறைக்கு அது தயாரிப்பு செய்து வருவதாக மாட்ரிட் சமிக்ஞை செய்தது.
கட்டலோனிய பிராந்திய பாராளுமன்றத்தில் பிரிவினைவாத கட்சிகள் ஒருதலைப்பட்டசமான சுதந்திர பிரகடனத்தை அறிவிக்கலாம் என்பதை எதிர்பார்த்து ஸ்பானிய அரசியலமைப்பு நீதிமன்றம் திங்கட்கிழமை நடாத்தவுள்ள கட்டலான் பிராந்திய பாராளுமன்ற கூட்டத்தை நடக்காது என அறிவித்துள்ளது. அக்டோபர் 1 அன்று கட்டலான் சுதந்திரத்திற்கான சர்வஜன வாக்கெடுப்பை தடுப்பதற்கான ஒரு காட்டுமிராண்டித்தனமான முயற்சி தோல்வி அடைந்த பின்னர், பிரதம மந்திரி மரீயானோ ரஹோய், பொடெமோஸ் கட்சி மற்றும் தொழிற்சங்க அதிகாரத்துவ தலைமையிலான மத்தியஸ்தத்திற்கான அழைப்புகளை நிராகரித்த இவ்வாறான நடவடிக்கை, அரசியலைப்புக்கு எதிரான கூட்டம் என அறிவிக்கப்பட்டதற்கு எதிராக இராணுவத்தை பயன்படுத்துவதற்கான அடித்தளத்தை இடுகின்றது.
அரசியலமைப்பு நீதிமன்றம், ஸ்பானிய சோசலிஸ்ட் கட்சியின் (PSOE),  கட்டலானிய பிரிவான, கட்டலானிய சோசலிச கட்சி (PSC) விடுத்த ஒரு குற்றச்சாட்டின்பேரிலேயே இந்நடவடிக்கையை எடுத்துள்ளது. PSOE தற்போது ஒரு இராணுவ தாக்குதலுக்காக மக்கள் கட்சியுடன் (PP) பகிரங்கமாக இணைந்து இயங்குகின்றது. கட்டலோனிய சோசலிஸ்ட் கட்சியின் புகாரை குறிப்பிட்டு, இவ்வாறான ஒன்றானது “முக்கியமானதும் பொதுவான சமூக, அரசியல் நலன்களுக்கானதும்” என்று கூறி கட்டலோனிய பாராளுமன்றத்தால் தீர்மானிக்கப்படும் எவ்விதமான நடவடிக்கையும் கட்டலோனிய சோசலிஸ்ட் கட்சி பாராளுமன்ற உறுப்பினர்களது உரிமைகளை பாதிப்பதாக கூறி, முற்றாக நிராகரிக்கவும் மிகக்குறைந்த மதிப்போ அல்லது முயற்சியும் இல்லாமல் முற்றாக தவிர்க்கப்பட வேண்டும் என குறிப்பிட்டுள்ளது. இந்த உத்தரவை மீறுவதானது, கைது மற்றும் குற்ற வழக்குகள் என்று பொருள் கொள்ளலாம் என்று எச்சரித்தது.
கட்டலோனியா எங்கிலும் பெண்கள் மற்றும் முதியவர்கள் உட்பட அமைதியான வாக்காளர்கள் மீதும் வாக்கு மையங்கள் மீதும் 16,000 பொலிஸ் நடத்திய தாக்குதல்களின் காணொளிகள் இணையத்தை நிரப்பியதும், ஞாயிறன்று உலகமே அதிர்ச்சியில் உறைந்தது. அதன் ஆரம்ப ஒடுக்குமுறை தோல்வியடைந்ததால் சீற்றங்கொண்ட மாட்ரிட், இப்போது இராணுவத்தை பயன்படுத்தி அதனினும் இரத்தந்தோய்ந்த தாக்குதலுக்கு தயாரிப்பு செய்து வருகிறது. அண்டை நாடான பிரான்சில் உள்ளதைப் போல, ஓர் அவசரகால நிலை அறிவிப்பது குறித்து ஸ்பானிய பத்திரிகைகள் விவாதித்து வருகையில், இது இராணுவ ஆட்சிக்கான நன்கு முதிர்ந்த திட்டங்களுடனும், ஐரோப்பா முழுவதிலும் அடிப்படை ஜனநாயக உரிமைகளை அகற்றுவதுடனும் பிணைந்துள்ளது என்பது முன்பினும் தெளிவாகிறது.
ரஹோயினின் சிறுபான்மை மக்கள் கட்சி (PP) அரசாங்கம் பிரதான ஐரோப்பிய ஏகாதிபத்திய சக்திகளின் ஆதரவை சார்ந்துள்ளது. ஜேர்மன், இங்கிலாந்து மற்றும் பிரான்சின் உத்தியோகபூர்வ நபர்கள் ஞாயிற்றுக்கிழமை நடந்த ஒடுக்குமுறையை பின்தொடர்ந்து மாட்ரிட்டுக்கான அவற்றின் ஆதரவை சமிக்ஞை காட்டியதும், ஐரோப்பிய ஒன்றியம் புதனன்று ஸ்பானிய ஒடுக்குமுறையை உத்தியோகபூர்வமாக மீண்டும் அங்கீகரித்தது.
ஐரோப்பிய நாடாளுமன்றத்தில் கட்டலான் நெருக்கடி மீதான விவாதத்தை தொடங்கி வைத்த, ஐரோப்பிய ஒன்றிய ஆணைக்குழுவின் முதல் துணை தலைவர் ஃபிரான்ஸ் ரிம்மர்மான்ஸ், கட்டலோனியா மக்களுக்கு எதிராக, மாட்ரிட் அதன் படைகளை பயன்படுத்தியதை சிறிதும் தயக்கமின்றி அங்கீகரித்தார். “கட்டலோனியா பிராந்திய அரசாங்கம் கடந்த ஞாயிறன்று சர்வஜன வாக்கெடுப்பை ஒழுங்கமைப்பதில் சட்டமீறலை தெரிவு செய்திருந்ததாக" அறிவித்த ரிம்மர்மான்ஸ், “எந்த அரசாங்கமாக இருந்தாலும் சட்டத்தை நிலைநிறுத்துவது அதன் கடமையாகும், அதற்கு சில சமயங்களில் பொருத்தமான அளவில் வலுவைப் பிரயோகிப்பது அவசியமாயிருக்கிறது” என்பதையும் சேர்த்துக் கொண்டார்.
நேற்று ஸ்பானிய பாதுகாப்புத்துறை அமைச்சர் María Dolores de Cospedal கூறுகையில், கட்டலோனியாவில் ஓர் இராணுவ தலையீட்டை நியாயமான விடையிறுப்பாகவே மாட்ரிட் காண்கிறது என்பதை தெளிவுபடுத்தினார். பாதுகாப்புத்துறை உயர் ஆய்வுக்கான பயிலகத்தின் ஒரு கூட்டத்தில் அப்பெண்மணி வலியுறுத்துகையில், ஸ்பெயின் இராணுவம் “அதன் பிராந்திய ஒருமைப்பாடு மற்றும் அரசியலமைப்பு ஒழுங்கமைப்பை பாதுகாக்க" பணிக்கப்பட்டுள்ளது என்றார். கட்டலான் தேசியவாதிகள், அவர்களை சட்டம் மற்றும் ஜனநாயகத்திற்கு வெளியே நிலைநிறுத்தி இருந்ததாக செவ்வாயன்று அரசர் ஆறாம் ஃபிலிப் ஓர் ஆத்திரமூட்டும் உரையில் அறிவித்த பின்னர், “ஜனநாயகத்திற்கு வெளியே இடம்பெறும் ஒவ்வொன்றும் நமது தேசத்திற்கு ஓர் அச்சுறுத்தலே,” என்பதையும் Cospedal சேர்த்துக் கொண்டார்.
ஸ்பானிய இராணுவ பிரிவுகள் ஏற்கனவே கட்டலோனியாவில் பொலிஸ் நிலைநிறுத்தலுக்கு படைத்தளவாட ஆதரவை வழங்கி வருகின்றன. கட்டலான் பிராந்திய முதல்வர் கார்லெஸ் புய்க்டெமொன்ட், திங்களன்று அவர் சுதந்திர பிரகடனம் செய்யவிருப்பதாக ஞாயிற்றுக்கிழமை ஒடுக்குமுறைக்கு பின்னர் அறிவித்ததும், ஏற்கனவே மாட்ரிட் பல மாதங்களாக இந்நடவடிக்கையை சட்டவிரோதமானதென அறிவித்துள்ள நிலையில், கட்டலான் அரசாங்கத்தைக் கைப்பற்ற மாட்ரிட்டால் அரசியல் சூழ்ச்சிகள் செய்யப்பட்டு வருகின்றன.
வாக்காளர்களை ஒடுக்க தவறியதற்கும், பிரிவினைவாதிகளுக்கு அனுதாபம் காட்டியதற்கும், கட்டலான் நீதிபதிகள் மற்றும் கட்டலான் பொலிஸ் (Mossos d’Esquadra) மீது வழக்குப்பதிய ஸ்பானிய நீதித்துறையால் நடவடிக்கை மேற்கொள்ளப்பட்டு வருகிறது. கட்டலான் பொலிஸ்துறை தலைமை அதிகாரி Josep Lluis Trapero, முன்னொருபோதும் இல்லாத வகையில், 15 ஆண்டுகால சிறைத்தண்டனை விதிக்கும் பிரிவினைவாத குற்றச்சாட்டிற்காக இன்று ஒரு நீதிமன்றத்தின் முன் ஆஜராக உள்ளார்.
CaixaBank விரைவில் மல்லோர்காவிற்கு இடம் மாற்றப்படும் என்ற செய்திகளுக்கு இடையே, வங்கிகளும் பெருநிறுவனங்களும் கட்டலோனியாவிலிருந்து அவற்றின் தலைமை அலுவலகங்களை இடம் மாற்றுவதற்கான முடிவுகள் மீதிருந்த சட்டத் தடைகளையும் நீதிமன்றங்கள் நீக்கியுள்ளன.
பொடெமோஸ் பொது செயலாளர் பப்லோ இக்லெஸியாஸ் மற்றும் புய்க்டெமொன்ட் ஆகியோரிடமிருந்து மத்தியஸ்தத்திற்கான முறையீடுகளையும் வியாழனன்று ரஹோய் நிராகரித்தார், இத்தகைய மத்தியஸ்தத்தை ஸ்ராலினிசத்தின் தொழிலாளர் ஆணைக்குழுக்கள் (CCOO) மற்றும் சமூக ஜனநாயவாதிகளது தொழிலாளர்களின் பொது சங்கம் (UGT) ஆகிய தொழிற்சங்க அதிகாரத்துவங்கள் ஆதரிக்கின்றன. இத்திட்டம் குறித்து விவாதிக்க இக்லெஸியாஸ் ரஹோய் ஐ தொலைபேசியில் அழைத்தபோது, ரஹோய் இக்லெஸியாஸ் க்கு நன்றி தெரிவித்தார் என்றாலும் "அரசை இந்தளவுக்கு கடுமையாக மிரட்டுகின்ற" எவரொருவருடனும் அவர் பேச்சுவார்த்தை நடத்த விரும்பவில்லை என்று அறிவித்தார்.
இது அதற்கு முந்தைய நாள் மாலை பொடெமோஸ் தலைவரின் கருத்துக்களை நேரடியாக நிராகரிப்பதாக இருந்தது. இக்லெஸியாஸ் செய்தியாளர்களிடம் கூறுகையில், “நம்பகமானவர்களின் குழு ஒன்று பேச்சுவார்த்தைக்கான ஒரு குழுவாக இருந்து விவாதிக்க மேசைக்கு வரவேண்டும். இதைத்தான் நான் கட்டலோனிய பிராந்திய முதல்வரிடமும் ஸ்பெயின் பிரதம மந்திரியிடமும் கூறினேன். நான் புய்க்டெமொன்ட் உடனும் ரஹோயுடனும் பேசினேன், அவர்கள் முடியாது என்று கூறவில்லை,” என்றவர் கூறியிருந்தார். ரஹோய் உடனான அவரின் உரையாடல் "சுமூகமாக" இருந்ததாகவும், ரஹோய் அந்த முன்மொழிவை "குறிப்பெடுத்துக்" கொண்டதாகவும் இக்லெஸியாஸ் தொடர்ந்து கூறியிருந்தார்.
பொடெமோஸ் தலைவர் ஸ்பெயினின் வலதுசாரி பிரதம மந்திரியுடன் பேச்சுவார்த்தைகள் நடத்தியுள்ள அதேவேளையில் தான், வலதுசாரி சக்திகள் ஸ்பெயின் முழுவதிலும் கட்டலான்-விரோத போராட்டங்களை ஒழுங்கமைத்து, தளபதி பிரான்சிஸ்கோ பிராங்கோவின் 1939-1978 காலத்திய பாசிசவாத ஆட்சியின் பாடல்களைப் பாடிக்கொண்டிருக்கின்றன.
ஒரு புதிய ஒடுக்குமுறையானது, நாடு முழுவதிலும் தொழிலாளர்களிடையே வெடிப்பார்ந்த சமூக எதிர்ப்பைத் தூண்டிவிடும் என்பதை நன்கறிந்துள்ள ஸ்பானிய பத்திரிகைகள், ஒரு பொலிஸ்-அரசு சர்வாதிகாரத்திற்கு நகர தூபமிட்டு வருகின்றன. அவை, கட்டலான் அரசாங்கத்தையே இடையில் கலைத்துவிடக்கூடிய “அணுஆயுதத்திற்கு ஒத்த விருப்பத்தெரிவு" என்றழைக்கப்படும் ஸ்பெயின் அரசியலமைப்பின் ஷரத்து 155 ஐ பயன்படுத்துவது மீது மட்டும் விவாதித்து கொண்டிருக்கவில்லை, மாறாக ஷரத்து 116 குறித்தும் விவாதித்து வருகின்றன. இது, கருத்து சுதந்திரம் மற்றும் எழுத்து சுதந்திரம், வேலைநிறுத்தத்திற்கான உரிமை, தேர்தல்கள் உள்ளடங்கலாக அடிப்படை ஜனநாயக உரிமைகளை இடைநீக்கம் செய்வதுடன், பத்திரிகை தணிக்கையையும் அனுமதிக்கிறது.
ஸ்ராலினிச அதிகாரத்துவத்தால் சோவியத் ஒன்றியம் கலைக்கப்பட்டதற்கு பிந்தைய ஒரு கால் நூற்றாண்டு ஏகாதிபத்திய போர் மற்றும் ஐரோப்பிய ஒன்றிய சிக்கன கொள்கைகளுக்கு பின்னர், ஐரோப்பிய ஜனநாயகம் உடையும் புள்ளியை எட்டியுள்ளது. 2008 வோல் ஸ்ட்ரீட் பொறிவுக்குப் பிந்தைய ஆழ்ந்த சிக்கன திட்டங்களின் ஒரு தசாப்தம் ஸ்பானிய வேலைவாய்ப்பின்மையை 20 சதவீதத்திற்கு கொண்டு வந்துள்ளதுடன், அது ஸ்பெயினின் பொருளாதாரத்தை சீரழித்து, அதன் ஆளும் உயரடுக்கை மதிப்பிழக்க செய்துள்ளது. ஸ்பெயினில் பிராங்கோயிசத்துக்குப் பிந்தைய ஆட்சியின் ஆழ்ந்த நெருக்கடிக்கு இடையே, ஆளும் வர்க்கம் ஐரோப்பா முழுவதிலும் ஜனநாயக உரிமைகளை கண்மூடித்தனமாக தாக்கி வருகின்ற நிலையில், ஸ்பானிய முதலாளித்துவ வர்க்கம் கட்டலான் நெருக்கடியை ஒரு சர்வாதிகார ஆட்சிக்குத் திரும்புவதற்காக பயன்படுத்துகிறது.
கட்டலோனியாவில் இரத்த ஆறு ஓடச் செய்வதற்கான மாட்ரிட்டின் திட்டங்கள் எதிர்க்கப்பட வேண்டும். உள்நாட்டு போர் அச்சுறுத்தல் மற்றும் பொலிஸ்-அரசு சர்வாதிகாரத்திற்கு எதிரான மற்றும் சோசலிசத்திற்கான போராட்டத்தில், கட்டலோனியாவில் மட்டுமல்ல மாறாக ஸ்பெயின் மற்றும் ஐரோப்பா எங்கிலும் தொழிலாள வர்க்கத்தை அரசியல்ரீதியில் சுயாதீனமாக, புரட்சிகரமாக அணிதிரட்டுவதே முக்கிய விடயமாகும்.
இதற்கு பொடெமோஸ் மற்றும் கட்டலான் தேசியவாதிகளிடம் இருந்து நனவுபூர்வமாக முறித்துக் கொள்வது அவசியப்படுகிறது, இவர்கள் ஒட்டுமொத்த கடந்த காலம் முழுவதிலும் வெடிப்பார்ந்த சமூக அதிருப்திக்கு இடையே தொழிலாள வர்க்க எதிர்ப்பை நிராயுதபாணியாக்கி குழப்புவதற்காக செயல்பட்டவர்களாவர். செவ்வாயன்று கட்டலோனியாவில் பெருந்திரளான இளைஞர்களும் தொழிலாளர்களும் ஒருநாள் வேலைநிறுத்தத்தில் பங்கெடுத்திருந்த நிலையில், பொடெமோஸ் மற்றும் PSOE க்கு நெருக்கமாக உள்ள முறையே CCOO மற்றும் UGT உம், கட்டலோனியாவுக்கு வெளியே எந்த ஸ்பானிய தொழிலாளர்களும் அணிதிரளாமல் இருப்பதைக் கவனமாக பார்த்துக் கொண்டன.
கட்டலான் நெருக்கடி குறிப்பாக பொடெமோஸ் இன் திவால்நிலையை அம்பலப்படுத்தி உள்ளது. பொடெமோஸ் இடைவிடாது தொடர்ச்சியாக PSOE இன் பிரமைளை ஊக்குவித்தது, அது ரஹோயை பதவியிலிருந்து நீக்குவதற்காக ஒரு கூட்டு அரசாங்கத்தை உருவாக்க PSOE க்கு அழைப்புவிடுத்து, அரசரின் உரைக்குப் பின்னர் அவசரகதியில் கட்டலோனிய ஒடுக்குமுறையை ஏற்றுக்கொள்ள நகர்ந்துள்ளது. ரஹோய்க்கு PSOE அடிபணிந்ததும், பொடெமோஸ் இப்போது PP மீது பிரமைகளைத் தூண்டிவிட்டு வருகிறது. அதுவும் ஒரு இரத்தந்தோய்ந்த இராணுவ ஒடுக்குமுறை தொடருகையிலும், ரஹோய் பார்சிலோனாவுடன் பேச்சுவார்த்தை நடத்த தமக்கு எந்த விருப்பமும் இல்லை என்று குறிப்பிட்டு வருகின்றன இத்தருணத்திலும் கூட அவ்வாறு செய்து வருகிறது.
போக்குவரத்து தொழிலாளர்கள் மற்றும் விமானநிலைய தொழிலாளர்களின் பல வேலைநிறுத்தங்களை நசுக்கியவர்களும், கட்டலானில் அடுத்தடுத்து வந்த சிக்கன கொள்கை அரசாங்கங்களை நிர்வகித்தவர்களுமான கட்டலான் தேசியவாதிகளைப் பொறுத்த மட்டில், ஒரு கட்டலான் முதலாளித்துவ அரசை உருவாக்குவதற்கு மாட்ரிட் உடன் பேச்சுவார்த்தை நடத்துவதற்கும் மற்றும் ஐரோப்பிய ஒன்றியத்துடன் உறவுகளை அபிவிருத்தி செய்யவதற்குமான அவர்களின் திட்டங்கள் வீணாகிவிட்டன.
ஓர் இராணுவ ஒடுக்குமுறைக்கான சாத்தியக்கூறுகளை முகங்கொடுத்திருப்பதோடு, புய்க்டெமொன்ட் இன் ஆதரவாளர்களிடையே பீதி பரவி வருவதாக செய்திகள் குறிப்பிடுகின்றன. பார்சிலோனாவின் நாளிதழ் La Vanguardia எழுதியது, அந்நகரின் கட்டலான் தேசியவாதிகளிடையே, “போர்குணமிக்க உத்வேகங்கள், புரட்சிகர கண்ணோட்டங்கள், தடித்தெழுத்துக்களில் கோபமும், தேசப்பற்றுமிகு தீவிரத்தன்மைகள் வலுவிழந்தபோய் ஒவ்வொருவருக்கும் கடுமையாக தலைச்சுற்றுவது போன்றவொரு உணர்வு உள்ளது.” அரசர் ஆறாம் ஃபிலிப் இன் உரை "இந்த தலைசுற்றும் உணர்வை மேலும் புத்துயிர்ப்பூட்டி உள்ளது. தற்போதைய இந்த தீவிரப்பாடு பேரழிவுகரமாக போய் முடியுமோ என்ற அச்சமும் நிலவுகிறது,” என்பதையும் அது சேர்த்துக் கொண்டது.
மாட்ரிட்டின் ஒடுக்குமுறைக்கு ஸ்பானிய தொழிலாள வர்க்கத்திடையே நிலவும் பரந்த எதிர்ப்பை அணிதிரட்டுவதற்கு திராணியற்றும், விரோதமாகவும் உள்ள கட்டலான் தேசியவாதிகளின் முதலாளித்துவ-சார்பு அரசியல், இரத்தந்தோய்ந்த தாக்குதலை மாட்ரிட் அதிகரித்து வருகையில், தொழிலாளர்களை பிளவுபடுத்த மட்டுமே சேவையாற்றுகிறது.
By Alex Lantier
6 October 2017
http://www.wsws.org/tamil/articles/2017/10-Oct/cata-o07.shtml

ஸ்பானிய மற்றும் கட்டலான் தொழிலாள வர்க்கத்திற்கான ஒரு சுயாதீனமான வர்க்க மூலோபாயம்!

After Madrid’s violent crackdown:
An independent class strategy for the Spanish and Catalan working class!

மாட்ரிட்டின் மூர்க்கமான ஒடுக்குமுறைக்குப் பின்னர்:ஸ்பானிய மற்றும் கட்டலான் தொழிலாள வர்க்கத்திற்கான ஒரு சுயாதீனமான வர்க்க மூலோபாயம்!

Image source from Internet
ஞாயிறன்று கட்டலோனியா சுதந்திரத்திற்கான சர்வஜன வாக்கெடுப்பில் கலந்து கொள்ள விரும்பிய சாமானிய கட்டலானியர்கள் மீது ஸ்பானிய அரசு தொடுத்த வன்முறை, ஸ்பெயினிலும் உலகெங்கிலும் உள்ள தொழிலாளர்கள் மற்றும் ஜனநாயக உரிமைகளை மதிக்கும் அனைவரையும் மிகச் சரியாக அதிர்ச்சிக்குள்ளாக்கியது.
ஸ்பானிய முதலாளித்துவ வர்க்கம், ஸ்பானிய புரட்சியை பாசிசவாத சப்பாத்தால் நசுக்கி எட்டு தசாப்தங்களுக்கு பின்னரும், தளபதி பிரான்சிஸ்கோ பிராங்கோவின் ஆட்சி முடிவுற்று நாற்பது ஆண்டுகளுக்குப் பின்னரும், ஸ்பானிய ஆளும் வர்க்கம் மீண்டும் காட்டுமிராண்டித்தனமான ஒடுக்குமுறையில் தஞ்சம் அடைந்து வருகிறது.
இதில் அவர்கள், ஐரோப்பிய ஒன்றியத்தின் அனைத்து சக்திகளிடம் இருந்தும் வாஷிங்டனிடம் இருந்தும் சிறிதும் தயக்கமின்றி ஆதரவைப் பெற்றுள்ளனர். கட்டலானியர்கள் அவர்களின் அரசியல் கண்ணோட்டங்களை வெளிப்படுத்துவதை தடுப்பதற்காக ஸ்பானிய அதிகாரிகள் அப்பட்டமான வன்முறையைப் பயன்படுத்தியமை, "சட்டத்தின் ஆட்சியில்" உள்ளடங்குவதாக அவை அறிவித்துள்ளன.
ஸ்பெயின் ஒடுக்குமுறையானது, ஐரோப்பா எங்கிலும் வேகமாக எதேச்சதிகார ஆட்சி வடிவங்கள் திரும்பி வருவதன் பாகமாகும். ஸ்பெயினின் வடக்கு எல்லையில் உள்ள பிரான்ஸில், புதிதாக தேர்ந்தெடுக்கப்பட்ட மக்ரோன் அரசாங்கம், வேலை பாதுகாப்பு மற்றும் சம்பளங்கள் மற்றும் தொழில் விதிமுறைகளை வெட்டும் தொழிலாளர்-விரோத தொழில் சீர்திருத்தத்தை திணித்துள்ளதுடன், பெருமளவிற்கு ஜனநாயக-விரோதமான "அவசரகால நிலை" வழிவகைகளை நிரந்தரமாக்குவதற்கு மத்தியில் உள்ளது.
ஜேர்மனியில், நாஜி மூன்றாம் குடியரசுக்குப் பின்னர் முதல்முறையாக இப்போது பாசிசவாதிகள் நாடாளுமன்றத்தில் நுழைந்துள்ள நிலையில், வெறுப்பான பேச்சுக்கள் என்றழைக்கப்படுவதை கண்காணிப்பது என்ற பெயரில் சமூக-ஊடக சேவை வழங்குனர்களை தணிக்கை செய்ய நிர்பந்திக்கும் ஒரு சட்டம் இப்போது நடைமுறைக்குக் கொண்டு வரப்பட்டுள்ளது.
கடந்த ஞாயிறன்று அதன் மூர்க்கமான ஒடுக்குமுறையை தொடர்ந்து, ஸ்பெயினின் மக்கள் கட்சி (PP) அரசாங்கமும் மற்றும் ஆளும் உயரடுக்கும், முன்னெப்போதும் பயன்படுத்தப்பட்டிராத அந்நாட்டின் அரசியலமைப்பில் உள்ள ஷரத்து 155 ஐ கையிலெடுக்க இப்போது துடித்துக் கொண்டிருக்கின்றனர். அரசாங்கம் சார்பான ஸ்பானிய ஊடகங்களிலேயே கூட "அணுஆயுதத்திற்கு ஒத்த விருப்பத்தெரிவாக" வர்ணிக்கப்படும் ஷரத்து 155, கட்டலோனியாவின் சுயாட்சியை நீக்கவும், அதன் தேர்ந்தெடுக்கப்பட்ட பிராந்திய அரசாங்கத்தை கலைக்கவும், மத்திய அரசாட்சியைத் திணிக்கவும் மாட்ரிட்க்கு அதிகாரமளிக்கும்.
ஸ்பானிய ஒருமைப்பாடு என்ற பதாகையின் கீழ், முற்றுமுதலான பாசிசவாதிகள் உட்பட மிகவும் வலதுசாரி சக்திகள் அணிதிரட்டப்பட்டு வருகின்றனர். பிராங்கோவின் முடியாட்சி மீட்சியிலிருந்து அவரது மகுடம் தரிக்க பெற்ற பேரரசர் ஆறாம் ஃபிலிப், செவ்வாயன்று மாலை ஓர் உரை வழங்கினார், அதில் அவர் "அரசின் அதிகாரங்களுக்கு சகிக்கவியலாதளவிற்கு விசுவாசமின்றி" இருப்பதற்காக கட்டலான் அதிகாரிகளைக் குற்றஞ்சாட்டினார்.
ஒரு சுதந்திர முதலாளித்துவ தேசிய-அரசிலிருந்து பிரிந்துசென்று, அனைத்திற்கும் மேலாக உடனடியாக ஐரோப்பிய ஒன்றியம் மற்றும் நேட்டோ அங்கத்துவத்தைப் பெற முயலக்கூடிய கட்டலான் முதலாளித்துவ வர்க்கத்தின் முயற்சியை உலக சோசலிச வலைத் தளம் எதிர்க்கிறது என்பதை அது தெளிவுபடுத்தி உள்ளது. ஆனால் இதை நாம் ஸ்பானிய அரசை பாதுகாக்கும் நிலைப்பாட்டில் இருந்தோ, முதலாளித்துவ ஸ்பெயினின் பிராந்திய ஒருமைப்பாடு என்ற நிலைப்பாட்டில் இருந்தோ அல்ல, ஒரு சோசலிச சர்வதேசவாத முன்னோக்கின் அடித்தளத்தில் ஸ்பெயினிலும் மற்றும் ஐரோப்பா முழுவதிலும் உள்ள தொழிலாளர்களை ஐக்கியப்படுத்தி போராடுவதற்காக, தொழிலாள வர்க்க நிலைப்பாட்டிலிருந்து, இடதிலிருந்து எதிர்க்கிறோம்.
கட்டலான் சுதந்திரத்திற்கு எதிராக இன்று அணிதிரட்டப்பட்டு வருகின்ற இதே அரசு எந்திரமும் வலதுசாரி கூறுபாடுகளும், மத்திய கிழக்கிலும் அதற்கு அப்பாலும் ஏகாதிபத்திய போர்களில் பங்கேற்பதற்கும் மற்றும் 2008 க்குப் பின்னர் இருந்து ஸ்பானிய ஸ்தாபகத்தின் அனைத்து பிரிவுகளாலும் நடைமுறைப்படுத்தப்பட்டுள்ள கடுமையான சிக்கன திட்டநிரலைத் தொடரவும், மீள்ஆயுதமயமாக்கலை முன்னோக்கி அழுத்தமளிக்கவும் வரவிருக்கும் நாட்களில் ஒட்டுமொத்த ஸ்பானிய தொழிலாள வர்க்கத்திற்கு எதிராக நிலைநிறுத்தப்படும்.
ஸ்பெயின் தொழிலாளர்கள் இந்த நெருக்கடியில் சுயாதீனமாக தலையீடு செய்வதன் மூலமாக, அவர்களின் வர்க்க நலன்களை வலியுறுத்த வேண்டும். இதன் அர்த்தம், மாட்ரிட்டின் நடவடிக்கைகளை உறுதியோடு எதிர்ப்பதும், ஐக்கிய ஐரோப்பிய சோசலிச அரசுகளுக்குள் தொழிலாளர்களின் ஸ்பெயினுக்காகவும், சிக்கன கொள்கைகள் மற்றும் போருக்கு எதிரான ஒரு பொதுவான போராட்டத்தில் தங்களுடன் இணைத்து கொள்வதற்காகவும் கட்டலோனியாவில் உள்ள அவர்களின் வர்க்க சகோதர சகோதரிகளை வலியுறுத்துவதும் ஆகும்.
பிராந்திய முதல்வரான கார்லெஸ் புய்க்டெமொன்ட் (Carles Puigdemont) தலைமையில், கட்டலான் முதலாளித்துவ வர்க்கத்தின் சுதந்திரத்திற்கு ஆதரவான கன்னை, தொழிலாள வர்க்கம் மீதான அதன் விரோதத்தில் மாட்ரிட் இல் உள்ள அதன் விரோதிகளை விட எந்தவிதத்திலும் குறைந்ததில்லை.
உண்மையில் இப்போதைய இந்த சுதந்திர முயற்சியை அவர்கள் தொடங்கியதற்கான முக்கிய காரணமே, சிக்கனக் கொள்கைகளை நடைமுறைப்படுத்துவதில் அவர்கள் வகித்த சொந்த பாத்திரம் மீது அதிகரித்து வரும் சமூக எதிர்ப்பை திசைதிருப்பி விடுவதற்கே ஆகும்.
சுய-நிர்ணயம் என்ற பெயரில், அவர்கள் தற்பெருமையோடு தங்களின் சொந்த வர்க்க நோக்கங்ளைப் பின்தொடர்ந்து வருகின்றனர்—அனைத்திற்கும் மேலாக மாட்ரிட் ஒரு மத்தியஸ்தராக சேவையாற்றாதவாறு, ஐரோப்பிய ஒன்றியம் மற்றும் வாஷிங்டனுடன் அவர்களின் சொந்த உடன்படிக்கைகளை ஏற்படுத்திக் கொள்ள விரும்புகின்றனர்.
ஸ்பெயினின் செல்வச்செழிப்பு குறைந்த பிராந்தியங்களுக்கு உதவ கட்டலோனியா நிறைய வரி வருவாய் வழங்கி வருகிறது என்பதே அவர்களின் பிரதான குற்றச்சாட்டுகளில் ஒன்றாக உள்ளது.
மாட்ரிட் இன் இரத்தந்தோய்ந்த ஒடுக்குமுறைக்கு விடையிறுப்பதில், ஐரோப்பிய ஒன்றியத்தை மத்தியஸ்தம் செய்ய முறையிட்டுள்ள புய்க்டெமொன்ட், கட்டலோனியாவின் பிராந்திய நாடாளுமன்றம் அடுத்த திங்களன்று ஒரு சுதந்திர பிரகடனம் மீது வாக்களிக்குமென அறிவித்தார்.
இவ்விரு நடவடிக்கைகளுமே, கட்டலானிலும் சரி ஸ்பெயினிலும் சரி, தொழிலாள வர்க்கத்தின் நலன்கள் மற்றும் அபிலாஷைகளுக்கு எதிர்முரணாக உள்ளன என்பதோடு, அடிப்படையில் ஜனநாயக விரோதமானதும் ஆகும்.
முதலாவது விடயத்தைப் பொறுத்த வரையில், கட்டலான் தேசியவாதிகள் புரூசெல்ஸ், பேர்லின் மற்றும் பாரீஸிற்கான அவர்களின் விசுவாசத்தை எடுத்துக்காட்ட முயன்று வருகின்றனர். அதாவது ஐரோப்பா எங்கிலும் உழைக்கும் மக்களை வறுமைக்குட்படுத்திய 2008 க்கு பிந்தைய கடுமையான சிக்கன நடவடிக்கைகளுக்கு தலைமை தாங்கியவர்களும், உலக அரங்கில் தங்களின் ஏகாதிபத்திய நலன்களை இன்னும் ஆக்ரோஷமாக பின்தொடர ஓர் ஐரோப்பிய இராணுவத்தை அபிவிருத்தி செய்து ஐரோப்பாவை மீள்இராணுவமயப்படுத்த தற்போது உறுதி பூண்டிருப்பவர்களுமான, ஐரோப்பிய மூலதனத்தின் மிகவும் சக்திவாய்ந்த பிரிவுகளுக்கு அவர்களின் விசுவாசத்தை எடுத்துக்காட்ட முயல்கின்றனர்.
இரண்டாவது நடவடிக்கையை பொறுத்த வரையில், பிரிவினையை பெரும்பான்மை கட்டலானியர்கள் விரும்பவில்லை என்பதை கருத்துக்கணிப்புகள் மீண்டும் மீண்டும் எடுத்துக்காட்டியுள்ள நிலைமைகளின் கீழ், கட்டலான் தேசியவாதிகள் அதற்கு அழுத்தமளிக்க, ஸ்பெயினின் ஜனநாயக-விரோத தலையீடு மீது நிலவும் புரிந்துகொள்ளத்தக்க மக்கள் கோபத்தைச் சாதகமாக்கிக் கொள்ள முயன்று வருகின்றனர்.
மாட்ரிட் மற்றும் கட்டலான் இருதரப்பு தேசியவாதிகளும் வெகுஜனங்களை துருவமுனைப்படுத்தி, தேசியவாத முறையீடுகளுடன் அவர்களின் போட்டி முகாம்களுக்குப் பின்னால் நிறுத்திக் கொள்ள உத்தேசிக்கின்றன.
ஐபீரிய தீபகற்பத்தை உள்நாட்டு போருக்குள் சிக்க வைக்கும் அபாயகரமான இத்தகைய அபிவிருத்திகளை முகங்கொடுத்துள்ள, கட்டலான் மற்றும் ஸ்பானிய தொழிலாளர்களின் ஒருமித்த தாரக மந்திரமாக இருக்க வேண்டியது — தொழிலாள வர்க்கத்தின் சுய-நிர்ணயத்திற்காக! என்பதாகும். ஸ்பானிய மற்றும் கட்டலான் முதலாளித்துவ வர்க்கத்தின் சகல கன்னைகளும் தொழிலாள வர்க்கத்தின் நலன்களை ஈவிரக்கமின்றி எதிர்க்கின்றன என்பதை புரிந்து கொள்வதன் அடிப்படையில், தொழிலாள வர்க்கம் அதன் சொந்த மூலோபாயத்தை முன்னெடுக்க வேண்டும்.
தொழிலாள வர்க்கம், கட்டலோனியாவிலிருந்து ஸ்பானிய பாதுகாப்பு படைகளை உடனடியாக திரும்ப பெற வேண்டுமென்ற கோரிக்கை உட்பட, முதலாளித்துவ ஸ்பெயினின் அதிகாரத்திற்குள் கட்டலோனியாவை பலவந்தமாக தக்க வைப்பதற்கான எந்தவொரு முயற்சியையும் மற்றும் எல்லா முயற்சிகளையும் எதிர்க்க வேண்டும். தங்களின் பிரிவினைவாத திட்டங்களை நடைமுறைப்படுத்த ஸ்பானிய அரசின் பிராந்திய எந்திரத்தைப் பயன்படுத்துவதற்கான கட்டலான் முதலாளித்துவ வர்க்கத்தின் முயற்சிகளை கட்டலான் தொழிலாளர் எதிர்க்க வேண்டும் என்பதோடு, முதலாளித்துவ வர்க்கத்தின் சகல கன்னைகளது சிக்கன கொள்கைகள் மற்றும் போர்-சார்பான திட்டநிரலை சவால்செய்வதில் ஸ்பெயின் எங்கிலுமான தொழிலாளர்களுடன் அணிதிரள வேண்டும்.
தொழிலாளர்களும் இளைஞர்களும் இந்த சுயாதீனமான வர்க்க மூலோபாயத்திற்காக போராடுகையில், போட்டி முதலாளித்துவ கன்னைகளில் ஒன்றுடனோ அல்லது இரண்டு தரப்புடனுமோ தொழிலாள வர்க்கத்தைப் பிணைத்து வைப்பதற்காக, பப்லோவாத International Viewpoint போன்ற பல்வேறு போலி-இடது சக்திகளின் முயற்சிகள் குறித்து எச்சரிக்கையாக இருக்க வேண்டும். கட்டலான் தேசியவாதிகளுக்கு ஒரு முற்போக்கான மூடிமறைப்பை வழங்குவது, பொடெமோஸை பெருமை பாராட்டுவது ஆகிய முயற்சிகளும் இதில் உள்ளடங்கும். இரண்டாவதாக கூறப்பட்டதானது (அதாவது பொடெமோஸ்), ஸ்பானிய அரசு துண்டாடப்படாமல் காப்பாற்றும் பொருட்டு ஒரு மாற்று அரசாங்கத்தை முதலாளித்துவ வர்க்கத்திற்கு வழங்க, மக்கள் கட்சி அரசாங்கத்தின் ஒடுக்குமுறையை வரவேற்றுள்ள சோசலிஸ்ட் கட்சியை தன்னுடன் கூட்டு சேர வேண்டுமென அறிவுறுத்துவதன் மூலம், ஸ்பானிய முதலாளித்துவத்திற்கு அது மீண்டும் அதன் விசுவாசத்தை நிரூபித்துள்ளது.
இப்போதைய இந்த நெருக்கடியானது, பிராங்கோவுக்கு பிந்தைய பலவீனமான ஆட்சிக்கும் மற்றும் ஸ்பானிய முதலாளித்துவத்திற்கும் ஒரு தொழிலாள வர்க்க சவாலை தடுக்கும் நோக்கில் செய்யப்பட்ட எதிர்புரட்சிகர-ஏற்பாட்டின் பாகமாக, 1978 இல் ஸ்ராலினிசவாதிகள் மற்றும் சமூக-ஜனநாயகவாதிகளின் ஒத்துழைப்புடன் மறுஒழுங்கு செய்யப்பட்ட ஸ்பானிய அரசின் உண்மையான குணாம்சத்தை அம்பலப்படுத்திக் காட்டியுள்ளது. இவ்வாரத்தின் சம்பவங்கள் எடுத்துக்காட்டி உள்ளவாறு, ஒரு நாடாளுமன்ற மூடுதிரையுடன், பிராங்கோ ஸ்தாபித்த ஒடுக்குமுறை எந்திரமே இப்போதும் பெருமளவிற்கு சேதமின்றி நீடிக்கிறது.
ஆனால் இது வெறுமனே ஒரு ஸ்பானிய நெருக்கடி கிடையாது. இது ஒட்டுமொத்த ஐரோப்பிய ஒன்றியத்தை சுற்றி வளைத்துள்ள அமைப்புரீதியிலான நெருக்கடியின் பாகமாகவும், விளைவாகவும் இரண்டுமாகவும் உள்ளது, அதாவது இது பெருமந்தநிலை மற்றும் இரண்டாம் உலக போருக்குப் பிந்தைய உலக முதலாளித்துவத்தின் மிகப்பெரும் நெருக்கடியில் வேரூன்றி உள்ளது.
ஐரோப்பிய ஒன்றியமானது, ஒரு ஜனநாயக மற்றும் “சமூக” ஐரோப்பாவின் சமாதானமான ஒருங்கிணைவு என்ற வாதங்கள், 2008 நெருக்கடியின் தாக்குதல்களால் சிதைந்து போயுள்ளன.
ஐரோப்பிய ஒன்றியம் எவ்வாறானதாக இருந்ததோ அவ்வாறே அம்பலப்பட்டு நிற்கிறது: அது ஐரோப்பிய மூலதனத்தின் இலாபங்களை அதிகரிப்பதற்கும், தொழிலாள வர்க்கத்தை ஒடுக்குவதற்கும், உலகளாவிய சந்தைகள் மற்றும் புவிசார் அரசியல் செல்வாக்கிற்காக போட்டியிடுவதற்கும் ஒரு கருவியாகவும், அத்துடன் போட்டித்தன்மை மற்றும் மூலோபாய ஆதாயங்களுக்காக போட்டியிடுவதற்காக ஐரோப்பாவின் எதிர்விரோத தேசிய மற்றும் பிராந்திய முதலாளித்துவ கன்னைகளுக்குமான ஒரு அரங்கமாகவும் உள்ளது.
அடுத்தடுத்து வெற்றி பெற்று வந்த சோசலிஸ்ட் கட்சி மற்றும் மக்கள் கட்சி அரசாங்கங்கள் ஐரோப்பிய ஒன்றியத்துடன் கருத்தொன்றி நடைமுறைப்படுத்தி உள்ள சிக்கன கொள்கைகளால், ஸ்பெயின் சீரழிக்கப்பட்டுள்ளது.
ஐரோப்பா எங்கிலும் உள்ள தொழிலாள வர்க்கம், அதன் சமூக மற்றும் ஜனநாயக உரிமைகள் மீதான தாக்குதலை கடுமையாக எதிர்க்கின்றன. ஆனால் தொழிற்சங்கங்கள், சமூக-ஜனநாயக கட்சிகள், ஸ்ராலினிச கட்சிகள், முன்னாள்-ஸ்ராலினிச கட்சிகள் மற்றும் போலி-இடது கட்சிகள் திட்டமிட்டு வர்க்க போராட்டத்தை நசுக்கி உள்ளன. அதிகாரத்தில் இருக்கையில், வெளிவேஷத்திற்கு "இடதாக" காட்டிக்கொள்பவை நலன்புரி அரசில் என்ன எஞ்சியுள்ளனவோ அவற்றை அழிக்க தாக்குமுகப்பாக இருந்துள்ளன என்பதோடு, புலம்பெயர்வோருக்கு எதிரான தப்பெண்ணங்களை உண்டாக்கி தொழிலாள வர்க்கத்தைப் பிளவுபடுத்த முனைந்தன. தொழிலாளர்களின் அதிருப்தியை வாய்மூட செய்ய முடியாமல் எழும் எதிர்ப்பின் போது, அவை போராட்டங்களைத் தனிமைப்படுத்தியதோடு, ஒரு தேசியவாத, முதலாளித்துவ-சார்பான, ஐரோப்பிய ஒன்றிய சார்பான முன்னோக்கிற்குள் அவர்களை அடைத்துள்ளன.
விசேடமாக இவ்விடயத்தில் குறிப்பிடத்தக்கது சிரிசாவின் அனுபவமாகும், இந்த போலி-இடது கட்சி, சிக்கன நடவடிக்கைக்கான தொழிலாள வர்க்க எதிர்ப்பலையின் மீது ஜனவரி 2015 இல் அதிகாரத்திற்கு வந்திருந்தது. தனிச்சலுகை கொண்ட உயர்மட்ட வர்க்கங்களின் ஒரு கட்சியாக, அது, சிக்கன நடவடிக்கைகளுக்கு எதிராக ஐரோப்பிய தொழிலாள வர்க்கத்தை அணிதிரட்டும் எந்தவொரு முயற்சியையும் எதிர்த்ததுடன், ஐரோப்பிய ஒன்றியம் எனும் நிதி மூலதனத்தின் நிதியியல் செல்வந்த தட்டுக்களதும் மற்றும் எதேச்சதிகாரத்தினதும் கருவியாக இருந்தது. அவர்களின் சிக்கன நடவடிக்கை முறையீடுகளை சற்றே மிதமாக்குவதற்கான அவர்களின் வேண்டுகோள்களை பேர்லினும் புரூசெல்ஸூம் நிராகரித்தபோது, சிரிசா திணித்த வெட்டுக்கள், அதன் சமூக-ஜனநாயக முன்னோடிகள் மற்றும் வெளிப்படையான வலதுசாரி முன்னோடிகளது வெட்டுக்களையும் மிகவும் கடந்து சென்றது.
தொழிலாள வர்க்கம் அரசியல்ரீதியில் முடங்கிப் போயுள்ள நிலையில், சுருங்கிவரும் கேக் (cake) ஒன்றை துண்டிட்டு பங்கிடுவதன் மீது போட்டி முதலாளித்துவ வர்க்க குழுக்களிடையே எழுந்துள்ள முன்பினும் அதிக கடுமையான மோதல்களால் ஐரோப்பா குணாம்சப்பட்டுள்ள நிலையில், அங்கே தேசியவாத சக்திகள் மீட்டுயிர் பெற்றுள்ளன, அவற்றில் பல வெளிப்படையாக நவ-பாசிசவாத குணாம்சத்தைக் கொண்டுள்ளதுடன், அவற்றால் சமூக அதிருப்தியை சாதகமாக்கி கொள்ளவும் முடிந்துள்ளது.
இரண்டு உலக போர்கள், பெருமந்த நிலை மற்றும் பாசிசத்திற்கு இட்டுச் சென்ற இந்த இலாபகர அமைப்புமுறையின் இன்றியமையா முரண்பாடுகள் அவர்களிடையே மீண்டும் புத்துயிர்ப்படைகையில், ஐரோப்பிய முதலாளித்துவம் கண்கூடாகவே அதன் அடியில் அழுகிக் கொண்டிருக்கிறது.
ஐரோப்பிய ஒன்றியம் எனும் 21 ஆம் நூற்றாண்டு பைத்தியக்கார கூடத்திற்கு எதிரான எதிர்ப்பில், தொழிலாள வர்க்கம் அதன் சொந்த மூலோபாயத்தை முன்னெடுக்க வேண்டும்: அதாவது, ஐக்கிய ஐரோப்பிய சோசலிச அரசுகளுக்கான போராட்டத்தில், ஐரோப்பிய ஒன்றியத்திற்கு எதிராகவும், அதில் உள்ளடங்கியுள்ள சகல வலதுசாரி அரசாங்கங்கள், ஐரோப்பிய வங்கிகள் மற்றும் பெருவணிகங்கள் என இவற்றிற்கு எதிராகவும் ஒரு பொதுவான போராட்டத்தில் தொழிலாளர்களை அணிதிரட்டி, தொழிலாள வர்க்கத்தின் ஒரு எதிர்-தாக்குதலை அபிவிருத்தி செய்ய வேண்டும். தொழிலாளர்களின் ஐரோப்பாவானது, சமூக-பொருளாதார வாழ்வை தொழிலாள வர்க்கம் மீதான சுரண்டலை அதிகரிப்பதற்காக அல்லாமல், பொருளாதார ஒருங்கிணைப்பு மற்றும் தொழில்நுட்ப முன்னேற்றங்களை பயன்படுத்தி உழைக்கும் மக்களின் ஜனநாயக கட்டுப்பாட்டின் கீழ், சமூகத் தேவைகளை பூர்த்தி செய்வதற்காக மறுஒழுங்கமைக்க பயன்படுத்தும்.
ஸ்பெயினில் இந்த சமூக சர்வதேசியவாத மூலோபாயத்திற்கான போராட்டத்திற்கு, ஏகாதிபத்திய ஐரோப்பிய ஒன்றியத்தால் ஒப்புதல் வழங்கப்பட்டு மாட்ரிட் அரசாங்கத்தால் கட்டவிழ்த்துவிடப்பட்ட வன்முறைக்கு எதிரான சமரசமற்ற எதிர்ப்பு, அவசியமாகிறது.
இந்த அடித்தளத்தில் மட்டுந்தான், கட்டலான் முதலாளித்துவ வர்க்க தேசியவாதிகளுக்கு எதிராக அவசியப்படும் அரசியல் போராட்டத்தை தொடுக்க முடியும், இவ்விதத்தில் மட்டுந்தான் ஒரு சர்வதேசியவாத நோக்குநிலைக்கு தொழிலாள வர்க்கத்தின் முற்போக்கான பிரிவுகளையும் இளைஞர்களையும் அணிதிரட்ட முடியும்.
Keith Jones
5 October 2017
http://www.wsws.org/tamil/articles/2017/10-Oct/span-o06.shtml

Monday, 25 September 2017

இந்தியாவும் ஜப்பானும் அவர்களது சீன எதிர்ப்பு “மூலோபாய கூட்டுழைப்பை” வலுப்படுத்துகின்றனர்

India and Japan strengthen their anti-China “strategic partnership”

கடந்த வாரம் ஜப்பான் பிரதம மந்திரி ஷின்ஜோ அபே இந்தியாவிற்கு இரண்டு நாள் விஜயம் மேற்கொண்டதை டோக்கியோவும் புது தில்லியும், இந்திய பசிபிக் பிராந்தியம் முழுவதிலுமான பரந்த இராணுவ பாதுகாப்பு ஒத்துழைப்புக்கு திட்டமிடவும், மேலும் ஆபிரிக்காவில் சீன செல்வாக்கை எதிர்கொள்ள கூட்டு பொருளாதார மற்றும் மூலோபாய முயற்சிகளை முன்னெடுப்பதற்கும் ஏற்புடையதான அவர்களது சீன எதிர்ப்பு “மூலோபாய கூட்டுழைப்பை” மேலும் வலுப்படுத்த பயன்படுத்திக் கொண்டன.
ஜப்பானின் பிரதான மூலோபாய பங்காளியான அமெரிக்கா, கொரிய தீபகற்பத்தின் மீதானதொரு “முன்கூட்டி தாக்கும் போர்” ஐ ஆரம்பிக்க திரும்ப திரும்ப அச்சுறுத்தி வருகின்ற நிலைமையின் கீழ், மேலும் அச்சுறுத்தும் வகையில், வட கொரியாவை அதன் அணுஆயுதத் திட்டத்தை கைவிட செய்வதற்கு கட்டாயப்படுத்தும் வகையில் ஜப்பான் எடுத்துவரும் முயற்சிகளில் அதனுடன் இணைந்து நெருக்கமாக பணியாற்ற வகைசெய்யும் இந்தியாவின் ஒரு உறுதிமொழியை இது உள்ளடக்கியது. மேலும், ஜப்பானிய மறுஆயுதமயமாக்கலை விரைவு படுத்தவும், மற்றும் ஆக்கிரமிப்பு, இராணுவவாத வெளியுறவுக் கொள்கையை தொடர்கின்ற டோக்கியோ மீதான எஞ்சியுள்ள அரசியலமைப்பு கட்டுப்பாடுகளை நீக்கவும் வட கொரியாவுடனான அமெரிக்க தூண்டுதலிலான நெருக்கடியை அபே சுரண்டி வருகிறார்.
அபேயும் இந்திய பிரதம மந்திரி நரேந்திர மோடியும் அவர்களது பொது அறிவிப்புகளிலும், கடந்த வியாழனன்று நடந்த உச்சிமாநாட்டின் முடிவில் அவர்கள் வெளியிட்ட நீண்ட அறிக்கையிலும் சீனாவைப் பற்றி குறிப்பிடுவதை மிகநுட்பமாக தவிர்த்தனர். ஆனால், இந்திய ஜப்பானிய கூட்டணியை வலுப்படுத்துவதற்கான முக்கிய உந்துதல் காரணியாகவும், அவர்களது உந்துதலுக்கான இலக்காகவும் சீனா தான் இருக்கிறது என்பதில் யாருக்கும் எந்தவொரு ஐயப்பாடும் இல்லை. 
உச்சிமாநாட்டை எதிர்நோக்கிய நிலையில், புது தில்லி சீனாவுடனான அதன் 73-நாள் எல்லை சச்சரவு மற்றும் போர் நெருக்கடிக்கும் விடையிறுப்பாக ஜப்பானுடனான அதன் உறவுகளை அதிகரிக்கும் என்பதாக விவாதிக்கக்கூடிய தலையங்கங்கள் மற்றும் கருத்தாக்கங்களால் இந்திய ஊடகங்கள் நிரம்பி இருந்தன. 
பூட்டான் சிறிய நாடு என்பதற்கு அப்பாற்ப்பட்டு அந்த பிராந்தியத்தை புது தில்லி பாதுகாப்பதாக உரிமை கோரும் நிலையில், டோக்லாம் பீடபூமி மீதான பதட்டம் நிறைந்த இராணுவ நிலைப்பாட்டின் போது அதனை வெளிப்படையாக ஆதரித்த ஒரே நாடாக ஜப்பான் இருந்ததென பரவலாக அத்தகைய விளக்கவுரை வலியுறுத்தியது.
Indian Express ஐ பொறுத்தவரை, டோக்லாம் மோதல் நிலைப்பாடு சம்பந்தமான விவாதத்தை மோடியுடன் தனிப்பட்ட முறையில் அபே எழுப்பினார் என்பதோடு, நெருக்கடியின் போது “களத்தில் அவரது ஸ்திரப்பாடு” குறித்து அவரை “பாராட்டவும் செய்தார்” என்று தெரிவிக்கிறது.   
மோடியும் அபேயும் அவர்களது கூட்டறிக்கையில், அவர்களது “பூகோள” கூட்டுழைப்பை வலியுறுத்தி பலகை முழுவதிலும் இந்திய ஜப்பானிய இராணுவ மூலோபாய ஒத்துழைப்பை வலுப்படுத்தும் திட்டங்களை உருவகப்படுத்தினர். “கண்காணிப்பு மற்றும் ஆளில்லா கணினி தொழில்நுட்பம், மற்றும் பாதுகாப்புத்துறை ஒத்துழைப்பு போன்ற துறைகளில் பாதுகாப்பு உபகரணங்களையும், தொழில்நுட்ப ஒத்துழைப்பையும் மேம்படுத்தும் விதத்தில்” இணைந்து பணியாற்ற இரு நாடுகளும் உறுதி பூண்டுள்ளன. அத்துடன், 2018 இல் இந்திய இராணுவம் மற்றும் ஜப்பானின் தரை சுயபாதுகாப்பு படையினருக்கும் (Japan’s Ground Self-Defense Forces) இடையில் “கூட்டு களப்பயிற்சிகளையும்” அதிகரிப்பதற்கான சாத்தியக்கூறுகளைப் பற்றி ஆராயவும் அவர்கள் ஒப்புக் கொண்டுள்ளனர்.  
அறிக்கையில் குறிப்பிட்டது போல, ஜப்பான், அதன் அதிநவீன US-2 நீர்நில பயன்பாட்டுக்குரிய விமானத்தை இந்தியாவிற்கு விற்க தயாராக இருப்பதை வலியுறுத்துவதற்கு இந்த உச்சிமாநாட்டை பயன்படுத்தியது. டோக்கியோவின் மிகப்பெரிய வெளிநாட்டு ஆயுத விற்பனையை முடிவு செய்துள்ளதை அபேயும் மோடியும் அறிவிக்கக்கூடுமென வதந்திகள் நிலவிய போதிலும், பல இந்திய மற்றும் ஜப்பானிய மூலோபாயவாதிகளுக்கு பெரும் ஏமாற்றமளிக்கும்விதமாக US-2 குறித்த விற்பனை பேரங்கள் தொடர்கின்றபோது, புது தில்லி பெரும் தொழில்நுட்ப பரிமாற்றங்களுக்கு தூண்டில்போடுவது வெளிப்படையாக உள்ளது.
மோடியும் அபேயும், அமெரிக்கா மற்றும் ஆஸ்திரேலியா உடனான இந்திய-ஜப்பானிய “முத்தரப்பு ஒத்துழைப்பு” குறித்த “புதுப்பிக்கப்பட்ட உத்வேகத்தை” வரவேற்றதோடு, “இந்த கூட்டுறவு கட்டமைப்புகளின் மூலோபாய முக்கியத்துவத்தை வலியுறுத்தினர்,” மேலும் அவற்றை விரிவாக்கம் செய்வதில் இணைந்து செயலாற்றவும் ஒப்புக்கொண்டனர். இந்த அறிக்கை, சமீபத்தில் நடத்தப்பட்ட வருடாந்திர இந்திய-அமெரிக்க-ஜப்பானிய கூட்டு மலபார் கடற்படைப் பயிற்சி மிகப்பெரிய அளவிலான இந்திய பெருங்கடல் போர் பயிற்சியாக இருந்ததென ட்ரம்ப் நிர்வாகம் பாராட்டியதையும் பிரத்யேகமாக குறிப்பிட்டுள்ளது.  
இந்தியா தனது பாரம்பரிய பரம எதிரியான பாகிஸ்தானை மூலோபாய ரீதியாக தனிமைபடுத்த முனையும் அதன் பிரச்சாரத்திற்கு டோக்கியோவும் வலுவான ஆதரவளித்தது. காஷ்மீரில் இந்திய எதிர்ப்பு கிளர்ச்சியில் தீவிரமாகவுள்ள பாகிஸ்தானை தளமாகக் கொண்ட இஸ்லாமிய குழுக்களை எதிர்த்து போராட ஏதுவாக புது தில்லியுடன் இணைந்து செயலாற்ற ஜப்பான் உறுதியளித்துள்ளதோடு, இஸ்லாமாபாத், “2008 நவம்பரில் மும்பையில் நடந்த தாக்குதல் மற்றும் இந்தியா வசமுள்ள காஷ்மீரில் உள்ள பதான்கோட்டில் 2016 இல் நடந்த பயங்கரவாத தாக்குதல் ஆகியவை உள்ளிட்ட தீவிரவாத தாக்குதல்களுடன் தொடர்புடைய குற்றவாளிகளை நீதிக்கு முன்பு கொண்டுவர வேண்டும்” என்ற இந்திய கோரிக்கையையும் அங்கீகரித்தது.  
வட கொரியா மீதான கூட்டு அறிக்கையின் பத்திகள், “வட கொரியாவின் அணுஆயுத மற்றும் ஏவுகணை திட்டங்களை ஆதரித்த அனைத்து கட்சிகளும்” அதன் விளைவுகளுக்கும் “விடையிறுக்க பொறுப்பானவர்கள்” என்று மோடியும், அபேயும் வலியுறுத்துவதை குறிப்பிடுவதோடு, பாகிஸ்தானில் ஒரு மறைமுக தாக்குதலையும் பெய்ஜிங்கில் ஒரு வெளிப்படையான தாக்குதலையும் உள்ளடக்கியது. பாகிஸ்தான் வட கொரியாவுடன் அதன் சொந்த அணுஆயுத திறன்களை அபிவிருத்தி செய்வதில் ஒத்துழைத்திருப்பதாக இந்தியா நீண்ட காலமாக குற்றம்சாட்டியது.
மக்கள் சீன குடியரசு, சீனாவுக்கு எதிரான அமெரிக்க இராணுவ மூலோபாய தாக்குதலில் புது தில்லியின் ஒருங்கிணைப்புக்கும், மேலும் இந்திய ஜப்பானிய உறவுகளுக்கு இணையாக, இஸ்லாமாபாத் உடனான வளர்ந்துவரும் அதன் சொந்த மூலோபாய பங்காண்மையை வலுப்படுத்துவதன் மூலமாக விடையிறுத்துள்ளது குறிப்பிடத்தக்கது.
மீண்டும் பெயர் குறிப்பிடாமல், மோடி-அபே அறிக்கை, பாகிஸ்தான் (50 பில்லியன் டாலர் மதிப்பு கொண்ட சீனா பாகிஸ்தான் பொருளாதார வழித்தடம் மூலமாக) முக்கிய பங்கு வகிக்கும் சீனாவின் இணைப்பு மற்றும் பாதை முன்னெடுப்பு திட்டத்தை தாக்கியது. ஆசியாவுக்கும் ஆப்பிரிக்காவுக்கும் இடையிலான மற்றும் இந்தியாவின் வடகிழக்குப் பகுதிக்கும் தென்கிழக்கு ஆசிய பகுதிக்கும் இடையிலான தொடர்பை மேம்படுத்த உள்கட்டமைப்பை கட்டமைப்பதில் இந்தியாவும் ஜப்பானும் ஒத்துழைக்கும் என்பதாகவும் இதில் உறுதியளிக்கப்பட்டது. 40 பில்லியன் டாலர் மதிப்பிலான ஆசிய ஆபிரிக்க வளர்ச்சி வழித்தடம் (Asia-Africa Growth Corridor) அமைக்கும் திட்டம் இனிமேல் தான் அதிகாரப்பூர்வமாக தொடங்கப்பட வேண்டும் என்றாலும் கூட இந்தியாவும் ஜப்பானும் அது தொடர்பாக தற்போது பணியாற்றி வருகின்றன. 
சீனா, பங்களாதேஷ் மற்றும் பர்மா எல்லையை ஒட்டிய ஒரு பொருளாதார பின்னடைவு கொண்ட பகுதியான இந்தியாவின் வடகிழக்கில் உள்கட்டமைப்பை உருவாக்க உதவ ஜப்பானுக்கு விடுக்கப்பட்ட இந்தியாவின் அழைப்பு இந்திய ஜப்பானிய உறவுகளின் வலிமையை அடிகோடிட்டுக் காட்டுகிறது. இந்தியா, எண்ணற்ற இந்திய எதிர்ப்பு இனவாத தேசியவாத எழுச்சிகளின் தளமாக இருக்கும், சீனாவுடனான அதன் எல்லை மோதலின் மையமாக இருக்கும், மற்றும் நாட்டின் பிற பகுதிகளுடன் குறுகிய வழித்தடங்கள் மூலமாக மட்டுமே இணைக்கப்பட்டு இருக்கும் அதன் வடகிழக்கு பகுதியை, குறிப்பாக முக்கியமானதாகவும், மூலோபாய ரீதியாக பாதிக்கப்படக்கூடியதாகவும் கருதுகிறது. 
இந்திய திட்டங்கள் தென் கிழக்கு ஆசியாவுடனான அதன் வர்த்தக மற்றும் மூலோபாய உறவுகளை விரிவுபடுத்திக் கொள்வதற்கு வடகிழக்கு பகுதியின் அபிவிருத்தி முக்கியமானதாக இருக்கிறது. வாஷிங்டன், டோக்கியோ இரண்டுமே, தென் சீனக் கடல் மோதலில் எப்போதும் புது தில்லி ஆழ்ந்து ஈடுபடுவதற்கான அவற்றின் முயற்சிகளின் ஒரு பகுதியாக இந்தியாவின் “கிழக்கு நடவடிக்கை” கொள்கைக்கு ஆதரவளிக்க பலமுறை உறுதியளித்துள்ளன. இந்தியாவுடன் ASEAN நாடுகளில் ஏற்கனவே இருக்கும் மலிவு உழைப்பு உற்பத்தி வழிகளை இணைக்க ஜப்பானும் ஆர்வம் கொண்டுள்ளது.
அபே மோடி உச்சிமாநாட்டிற்கு பெய்ஜிங் இன் பிரதிபலிப்பு அமைதியானதாக இருந்தது. பதிலடி ஓசையற்றதாக்கப்பட்டது. டோக்லாம் நெருக்கடிக்கு பின்னர் இந்தியாவுடனான உறவுகளை மறுஒழுங்கமைவு செய்ய அது முனைந்து வருகின்ற நிலையிலும், அத்துடன், மிக முக்கியமாக, கொரிய தீபகற்பம் மீதான நெருக்கடியை அமெரிக்கா குழப்புகின்ற சூழலில் அதனிடம் இருந்து வரும் கடுமையான மூலோபாய அழுத்தத்திற்கு உட்படுகின்ற நிலையிலும் இது ஆச்சரியத்துக்கு உட்படுத்தும் விடயமில்லை.
சீன வெளியுறவு அமைச்சக செய்தித் தொடர்பாளர் ஹுவா சுனிங், தென்கிழக்கு ஆசியாவிற்கு இந்தியாவின் நுழைவாயிலாக இருக்கும் வடகிழக்கின் அபிவிருத்தியில் ஜப்பானின் உதவியை நாடும் இந்தியாவின் திட்டங்களுக்கு விதிவிலக்கு எடுத்துக்கொண்டார் என்று கூறப்பட்டது. மேலும், “மூன்றாம் நபர்” யாரும் “எந்தவொரு வடிவத்திலும் பிராந்திய இறையாண்மை குறித்த சீனாவிற்கும் இந்தியாவிற்கும் இடையிலான சச்சரவுகளில் தலையிட” முடியாது என்று ஹுவா தெரிவித்தார்.
மோடி-அபே உச்சிமாநாட்டின் திட்டநிரலில் முக்கியத்துவம் வாய்ந்ததாக இருந்த நெருக்கமான இராணுவ மூலோபாய உறவுகளை உருவாக்கும் அதே வேளையில், ஜப்பானும் இந்தியாவும் அவர்களது வர்த்தக உறவுகளை உத்வேகத்துடன் ஆரம்பிப்பதில் ஆர்வமாக இருந்தன. இந்தியாவிற்கான ஜப்பானின் ஏற்றுமதி இன்னும் தேக்கநிலையில் உள்ளது என்பதோடு, ஜப்பானுக்கான இந்தியாவின் ஏற்றுமதி 2013-14 இல் 6.81 பில்லியன் அமெரிக்க டாலராக இருந்தது 2016-17 இல் வெறும் 3.85 பில்லியன் டாலராக குறைந்து, இவைகள் சமீபத்திய வருடங்களில் மேலும் நலிந்துவிட்டன. 
உச்சிமாநாட்டின் சிறப்பம்சமாக, 508 கிலோ மீட்டர் மும்பை-அகமதாபத் அதிவேக இரயில் திட்டத்திற்கான கட்டமைப்பை தொடங்க குஜராத் மாநிலத்தில் உள்ள மோடியின் வீட்டில் வைத்து ஒரு அற்புதமான விழா நடைபெற்றது. இந்தியாவின் முதல் அதிவேக இரயில் பாதையை உருவாக்குவதற்கான சீனாவின் முயற்சியை வெற்றி கொள்ள தீர்மானித்து, ஜப்பான், 50 வருடங்களாக அதன் திட்டத்திற்கான மொத்த செலவு மதிப்பீடான 17 பில்லியன் அமெரிக்க டாலர் கடன் தொகையில் 80 சதவிகிதத்திற்கும் அதிகமான தொகையை 0.1 சதவிகித சலுகை வட்டி வீதத்துடன் நிதியளிப்பு செய்து வருகிறது. 
குஜராத்தில் புதிய மாருதி சுசூகி வாகன தொழிற்சாலையை திறந்துவைக்கும் நிகழ்வில் சுசூகியின் தலைவர் ஒசாமூ சுசூகியுடன் மோடியும் அபேயும் கலந்துகொண்டனர். வெளிநாட்டு முதலீட்டாளர்களுக்கு நிரூபிக்கும் வகையில் இந்தியா முழுவதும் நிலவுகின்ற மலிவுகூலி உழைப்பு நிலைமைகள் மீதான எந்தவித சவாலையும் இந்திய அரசு இரக்கமின்றி ஒடுக்கும் விதமாக, அரசியல் ஸ்தாபகம், பொலிஸ் மற்றும் நீதிமன்றங்களும் ஜோடிக்கப்பட்ட குற்றச்சாட்டுக்களின் பேரில் 13 மாருதி சுசூகி தொழிலாளர்களுக்கு ஆயுள் தண்டனை விதித்து சிறையில் அடைத்துள்ளன. இந்த 13 பேரும், மாருதி சுசூகியின் மானேசர், ஹரியானா கார் அசெம்பிளி ஆலையில் மிகக் குறைந்த ஊதியம் மற்றும் ஆபத்தான ஒப்பந்தத் தொழிலாளர் வேலைகள் ஆகியவற்றை எதிர்ப்பதில் முன் நின்றனர்.
மோடி மற்றும் அபே இருவரும், சீனாவுக்கு போட்டியாக இந்தியாவை ஒரு மலிவு உழைப்பு உற்பத்தித் தொடரின் மையமாக உருவாக்க உதவும் ஜப்பானின் மூலதனத்தில் பொருளாதார பங்காண்மையுடனான இந்திய-ஜப்பானிய இராணுவ மூலோபாய கூட்டணியை சீராக்க ஆர்வமாக உள்ளனர். இந்தியாவின் Economic Times பத்திரிகையின் சமீபத்தியதொரு தலையங்கம், சீனாவில் வழங்கப்படும் கூலியில் ஐந்தில் ஒரு பங்கு தான் இந்திய தொழிலாளர்களின் கூலியாக உள்ளது என்றும், உற்பத்தியில் இந்தியாவை ஒரு உலக சக்தியாக உருவாக்கும் மோடியின் திட்டங்களை உணர்த்துவதற்கான கருவியாகவே இந்த ஊதிய வித்தியாசம் பேணப்பட்டுவருகின்று என்றும் விவாதிக்கின்றது. 
தொழிலாளர்கள் எச்சரிக்கையாக இருக்க வேண்டும்: இந்திய ஜப்பானிய கூட்டணியின் இந்த உறுதிப்பாடு, சீனாவிற்கு எதிராக அமெரிக்க ஏகாதிபத்தியம் அதன் பொறுப்பற்ற மற்றும் தீங்கு விளைவிக்கும் தாக்குதல்களை மட்டுமே ஊக்குவிக்கும் என்பதோடு, ஜப்பானிய ஏகாதிபத்தியம் மற்றும் இந்திய முதலாளித்துவ வர்க்கம் போன்ற பெரும் சக்திகளின் வேட்கையையும் தீவிரப்படுத்தும்.
By Wasantha Rupasinghe and Keith Jones
18 September 2017
http://www.wsws.org/tamil/articles/2017/9-Sept/injp-s25.shtml

Friday, 1 September 2017

கூகுளுக்கு ஒரு பகிரங்க கடிதம்: இணைய தணிக்கையை நிறுத்து! உலக சோசலிச வலைத் தளத்தை இருட்டடிப்பு செய்வதை நிறுத்து!

An open letter to Google: Stop the censorship of the Internet! Stop the political blacklisting of the World Socialist Web Site!

சுந்தர் பிச்சை
தலைமை செயலதிகாரி
Google, Inc.

லாரன்ஸ் பேஜ்
தலைமை செயலதிகாரி/ இயக்குனர்
Alphabet, Inc.

செர்ஜி ப்ரின்
தலைவர்/இயக்குனர்
Alphabet, Inc.

எரிக் ஸ்மித்
இயக்குனர் குழுவின் சிறப்பு தலைவர்
Alphabet, Inc.

கனவான்களே:
“உலகின் தகவல்களை ஒழுங்கமைத்து, உலகளவில் அனைவரும் அணுகக்கூடியவாறு அவற்றை பயனுள்ள முறையில் ஆக்குவதே" ஆரம்பத்திலிருந்து கூகுளின் குறிக்கோள் அறிக்கையாக இருந்தது. அதன் உத்தியோகபூர்வ நடத்தை விதிகள், கூகுளின் பிரபல இலட்சிய வாசகமான “தீயவராக இருக்காதே,” என்பதில் பிரகடனப்படுத்தப்பட்டது. சமீபத்திய ஆண்டுகளில், நீங்கள் நிச்சயமாக உங்கள் பாதையை தவறவிட்டுள்ளீர்கள். இப்போது நீங்கள் உலகின் தகவல்களை மறைப்பதிலும், அந்த நிகழ்முறையில், பெரும் தீய செயல்களைச் செய்வதிலும் ஈடுபட்டுள்ளீர்கள்.
அரசியல் விமர்சனங்களுக்காக தேடுபொறியின் தேடல்முடிவுகளை சீன அரசாங்கம் தணிக்கை செய்ததற்காக, கூகுள் சீனாவை மையமாக கொண்ட அதன் தேடுபொறியை உத்தியோகபூர்வமாக நிறுத்திய போது, திரு. ப்ரின் பகிரங்கமாக அறிவிக்கையில், கூகுளைப் பொறுத்த வரையில், “இணையத்தில் வெளிப்படைத்தன்மையை பேணுவதற்காக எவ்வாறு நாம் சிறப்பாக போராடலாம் என்பதே எப்போதும் ஒரு விவாதமாக இருந்துள்ளது. இணையத்தில் வெளிப்படைத்தன்மை மற்றும் தகவல் சுதந்திரத்தின் கோட்பாடுகளைப் பேணுவதற்கு இதுவே நாங்கள் செய்யக்கூடிய மிகச்சிறந்த விடயமென்று நாங்கள் நம்புகிறோம்” என்றார்.
2013 இல், திரு. ஸ்மித் பர்மாவிற்கு விஜயம் செய்தபோது, அவர் அந்நாட்டில் சுதந்திர மற்றும் வெளிப்படைத்தன்மை கொண்ட இணைய பயன்பாட்டுக்கு ஆதரவாக பேசினார். கூகுளின் சமீபத்திய நடவடிக்கைகளின் வெளிச்சத்தில், திரு. ப்ரின் மற்றும் திரு. ஸ்மித்தின் அறிக்கைகள் முற்றிலும் பாசாங்குத்தனமானதாக தெரிகிறது.
கூகுளும் உட்குறிப்பாக அதன் தாய் நிறுவனமான Alphabet, Inc. உம், இணைய அரசியல் தணிக்கையில் ஈடுபட்டுள்ளன. நீங்கள் முன்னர் எதை பகிரங்கமாக கண்டித்தீர்களோ அதையே நீங்கள் செய்து கொண்டிருக்கிறீர்கள்.
சோசலிச, போர்-எதிர்ப்பு மற்றும் இடதுசாரி வலைத் தளங்களை பொதுமக்கள் அணுகுவதையும் மற்றும் அவர்களுக்கு விழிப்புணர்வு ஏற்படுத்துவதையும் தடுக்க கூகுள் அதன் இணைய தேடல்களில் மோசடி செய்து வருகிறது. உலக சோசலிச வலைத் தளம் (www.wsws.org) பாரியளவில் இலக்கு வைக்கப்பட்டுள்ளது என்பதுடன், உங்கள் தணிக்கை வழிமுறைகளால் அது மிக அதிகமாக பாதிக்கப்பட்டுள்ளது. கூகுள் மூலமாக WSWS க்கு வருபவர்களின் எண்ணிக்கை இவ்வாண்டு ஏப்ரல் க்குப் பின்னர் இருந்து அண்மித்து 70 சதவீதம் வீழ்ச்சி அடைந்துள்ளது.
இந்தளவிற்கான தணிக்கை என்பது அரசியல் இருட்டடிப்பாகும். உங்கள் நிறுவனம் வெளிவிட விரும்பாத செய்திகளை முடக்குவதும் மற்றும் உங்களுக்கு உடன்பாடில்லாத கருத்துக்களை ஒடுக்குவதுமே கூகுள் தணிக்கை நெறிமுறையின் வெளிப்படையான உள்நோக்கமாக உள்ளது. ஒரு வர்த்தக நிறுவனமாக கூகுளின் தனியுரிமைகள் என்னவாக இருந்தாலும், அரசியல் இருட்டடிப்பு என்பது ஒரு சட்டபூர்வ நடைமுறை கிடையாது. இது ஏகபோக அதிகாரத்தின் ஒட்டுமொத்த துஷ்பிரயோகமாகும். நீங்கள் செய்து கொண்டிருப்பது என்னவென்றால் பேச்சு சுதந்திரம் மீதான ஒரு தாக்குதலாகும்.
ஆகவே WSWS ஐ இருட்டடிப்பு செய்வதை நிறுத்துமாறும், உங்களது புதிய பாரபட்சமான தேடல் கொள்கைகளால் எதிர்விதமாக பாதிக்கப்பட்டுள்ள அனைத்து இடதுசாரி, சோசலிச, போர்-எதிர்ப்பு மற்றும் முற்போக்கு வலைத் தளங்கள் மீதான தணிக்கையைக் கைவிடுமாறும், உங்களையும் கூகுளையும் நாங்கள் கேட்டுக் கொள்கிறோம்.
WSWS சர்வதேச ட்ரொட்ஸ்கிச இயக்கத்தின் இணையவழி செய்தி பத்திரிகையாகும். இது இணையத்தில் மிகப் பரவலாக வாசிக்கப்படும் சோசலிச பிரசுரமாக விளங்குகிறது. 1998 இல் WSWS ஆரம்பிக்கப்பட்டதில் இருந்து, இது ஒரு டஜனுக்கும் அதிகமான மொழிகளில் அரசியல், வரலாறு, விஞ்ஞானம் மற்றும் கலாச்சாரம் ஆகியவற்றின் மீது 60,000 க்கும் அதிகமான கட்டுரைகளைப் பிரசுரித்துள்ளது. இதுவொரு முக்கியமான, தனிச்சிறப்பார்ந்த புத்திஜீவித ஆதாரவளமாக திகழ்கிறது.
WSWS இன் கட்டுரைகள் எண்ணற்ற வலைத் தளங்களில் மறுபிரசுரம் செய்யப்படுகின்றன மற்றும் உலகெங்கிலுமான அச்சு பத்திரிகைகளிலும் பிரசுரிக்கப்படுகின்றன. WSWS இல் பிரசுரிக்கப்படும் ஆவணங்கள் அவ்வபோது பல்கலைக்கழக ஆய்விதழ்களிலும் மேற்கோளிடப்படுகின்றன மற்றும் கல்லூரி பாடத்திட்டத்திலும் இடம் பெற்றுள்ளன. வரலாற்றாளர்கள் James McPherson மற்றும் Allen Guelzo போன்ற முன்னணி அமெரிக்க மேதைகளும், மற்றும் ஷேக்ஸ்பியர் வல்லுனர் James Shapiro உம் உலக சோசலிச வலைத் தளத்திற்கு பேட்டி அளித்துள்ளனர். இத்தளத்தில் பிரசுரமாகும் திரைப்பட மற்றும் நாடக விமர்சனங்கள் மிகப்பெரிய சர்வதேச பின்தொடரலை ஈர்த்துள்ளன. உலக பிரசித்தி பெற்ற திரைப்பட இயக்குனர்கள் —ஒருசிலரை பெயரிட்டு கூறுவதானால், Wim Wenders, Mike Leigh, Richard Linklater, Bertrand Tavernier, மற்றும் Abbas Kiarostami— உலக சோசலிச வலைத் தளத்துடன்அவர்களின் படைப்புகள் குறித்து விவாதித்துள்ளனர். WSWS இல் பிரசுரிக்கப்பட்ட கட்டுரைகளும் மற்றும் சொற்பொழிவுகளும், உலக சோசலிச வலைத் தளத்துடன்எந்த தொடர்பும் இல்லாத பதிப்பாளர்களால் உருவாக்கப்பட்ட நூல் திரட்டுக்களில் உள்ளடங்கி உள்ளன.
பெருநிறுவன கட்டுப்பாட்டு ஊடகங்களால் போதுமானளவிற்கு கவனம்செலுத்தாத அல்லது முழுமையாக கைவிடப்பட்ட தொழிலாளர் போராட்டங்கள் மற்றும் சமூக பிரச்சினைகள் மீதான செய்திகளையும் உலக சோசலிச வலைத் தளம் வழங்குகிறது.
எமது கோட்பாட்டுரீதியிலான போர் எதிர்ப்பு, சமூக சமத்துவமின்மை மீதான எமது கவனம், அரசியல் மற்றும் இதழியல் நேர்மையின் எமது உயர்ந்த தரத்தின் விளைவாக, உலக அரசியல் சம்பவங்கள், பூகோளமயப்பட்ட பொருளாதாரம், சர்வதேச சோசலிசம், இருபதாம் நூற்றாண்டு வரலாறு, ரஷ்ய புரட்சி மற்றும் அதற்கு அடுத்து நடந்தவை, மற்றும் சமகால மார்க்சிசம் ஆகியவற்றின் மீது சர்ச்சைக்கிடமற்ற ஒரு அதிகாரபூர்வ பிரசுரமாக திகழ்கிறது. இனவாதம், இனவெறி மற்றும் பாசிசத்திற்கு எதிரான போராட்டத்தில் இது ஒரு முன்னணி சர்வதேச குரலாக விளங்குகிறது.
இந்தாண்டின் ஆரம்ப வாக்கில், Alexa இன் உலகளாவிய பட்டியலில் 36,525 ஆம் இடத்தையும், அமெரிக்காவில் 16,679 ஆம் இடத்தையும் WSWS எட்டியிருந்தது. இந்த வசந்தகாலத்தில், WSWS ஐ பார்வையிட்ட மாதாந்தர பயனர்களின் எண்ணிக்கை 900,000 ஐ தாண்டியது. ஏப்ரல் 2017 இல், எங்கள் தரவுகளின்படி, 422,460 பயனர்கள் கூகுள் தேடல் வழியாக WSWS ஐ வந்தடைந்திருந்தனர்.
கூகுள், இந்தாண்டின் ஏப்ரல் தொடக்கத்தில், சோசலிச, இடதுசாரி, போர்-எதிர்ப்பு பிரசுரங்களில் இருந்து பயனர்களை திசைதிருப்பி, அதற்கு பதிலாக அரசு மற்றும் பெருநிறுவன மற்றும் ஊடக ஸ்தாபகத்தின் (சான்றாக, நியூ யோர்க் டைம்ஸ்வாஷிங்டன் போஸ்ட், இதர பிற) கண்ணோட்டங்களை நேரடியாக வெளிப்படுத்தும் பிரதான பிரசுரங்கள் மற்றும், மிதவாத இடது என்று "நம்பப்படுகின்ற" மற்றும் அவற்றின் விமர்சனங்கள் தீங்கற்றவை என்று கருதப்படுகின்ற (சான்றாக, ஜனநாயக கட்சியின் ஒரு கன்னையாக செயல்படுகின்ற அமெரிக்க ஜனநாயக சோசலிஸ்ட்களின் வலைத் தளம் மற்றும் Jacobin Magazine போன்ற) ஒரு சிறிய எண்ணிக்கையிலான வலைத் தளங்களை நோக்கி திருப்பிவிடுவதற்கு, அதன் தேடல் முடிவுகளில் மோசடி செய்ய தொடங்கியது.
இந்த நடவடிக்கைகளுக்கு சாக்குபோக்காக, கூகுள் அறிவிக்கையில், “அங்கீகரிக்கத்தக்க விபரங்களை அதிகமாக மேற்புறத்திற்கு கொண்டு வருவதற்காக" அதன் தேடுபொறி நெறிமுறையில் அது மாற்றம் செய்து வருவதாக குறிப்பிட்டது, இந்த வாசகம், இணைய தணிக்கைக்காக, குறிப்பாக ஸ்தாபக ஊடகங்களால் வரையறுக்கப்பட்ட கருத்தொற்றுமைக்கு வெளியில் இருக்கும் அரசியல் கண்ணோட்டங்களை தணிக்கை செய்ய சர்வாதிகார ஆட்சிகளது முயற்சிகளை நினைவுக்குக் கொண்டு வருகிறது.
தேடுபொறி பொறியியல் துறைக்கான கூகுள் துணை தலைவர் பென் கோம்ஸ், ஏப்ரல் 25 அன்று ஒரு வலைப்பதிவில் அரசியல் தணிக்கையை திணிப்பதை நியாயப்படுத்த முயன்றார். "அப்பட்டமாக தவறாக வழிநடத்தும், தரங்குறைந்த, அத்துமீறிய அல்லது அடிமட்டத்திற்கு பொய் தகவல்களை பரப்பும் இணைய தகவல்களான 'போலி செய்தி நடைமுறைகளுக்கு' விடையிறுப்பாக நெறிமுறையில் மாற்றம் செய்யப்பட்டதாக அவர் வாதிட்டார்.
கோம்ஸ் இன் தகவல்படி, வலைத் தளங்களின் "தரத்தை" நியாயப்படுத்த கூகுள் சுமார் 10,000 “மதிப்பீட்டாளர்களை" நியமித்திருந்துள்ளது. “தவறாக வழிநடத்தும் தகவல்களை உள்ளடக்கியதாக" மற்றும் "ஆதரவற்ற சதி தத்துவங்களாக" கருதப்படும் வலைத் தளங்களை "தடுக்க" இந்த மதிப்பீட்டாளர்கள் பயிற்றுவிக்கப்பட்டுள்ளார்கள். இந்த மதிப்பீட்டாளர்களால் கரும்புள்ளி குத்தப்பட்டவை, சமீபத்திய தொழில்நுட்ப அபிவிருத்திகளின் துணையோடு, எதிர்கால தேடல் முடிவுகள் முழுவதிலும், அப்போதைக்கு அப்போதே, தானியங்கி முறையில் தணிக்கை நடத்தும் ஒரு நெறிமுறையை அபிவிருத்தி செய்ய பயன்படுத்தப்படும் என்பதை கோம்ஸ் விளக்கினார்.
தேடுபொறி நெறிமுறையில் கூகுள் என்ன தொழில்நுட்ப மாற்றங்கள் செய்திருந்தாலும் சரி, தேடல் முடிவுகளில் இடது-எதிர்ப்பு நிலைப்பாடு இருப்பதை மறுக்க முடியாது. கூகுள் தணிக்கை நடவடிக்கைகளின் மிகவும் மலைப்பூட்டும் விளைவு என்னவென்றால், சோசலிசம், மார்க்சிசம் அல்லது ட்ரொட்ஸ்கிசம் மீது ஆர்வம் காட்டும் தேடல் விசாரணைகளைச் செய்யும் பயனர்கள் உலக சோசலிச வலைத் தளத்தை நோக்கி இப்போது திருப்பிவிடப்படுவதில்லை என்பதுதான். தேடல் கோரிக்கை முடிவுகளில் இருந்து கூகுள் WSWS ஐ "மறைத்து" வருகிறது. சான்றாக, இந்தாண்டு மே மாதம் "லியோன் ட்ரொட்ஸ்கி" என்பதன் கூகுள் தேடல்கள் 5,893 வலைப் பக்க தொடுப்புகளை (தேடல் முடிவுகளில் WSWS ஐ சுட்டிக்காட்டும் திரிகள்) கொண்டு வந்தது. ஜூலையில், இதே தேடல், 1938 இல் லியோன் ட்ரொட்ஸ்கியால் ஸ்தாபிக்கப்பட்ட சர்வதேச இயக்கத்தின் இணைய பதிப்பான WSWS இன் ஒரு வலைப்பக்க தொடுப்பைக் கூட சுட்டிக்காட்டவில்லை.
சோசலிசம்வர்க்கப் போராட்டம்வர்க்க மோதல்சோசலிச இயக்கம்உலகில் சமூக சமத்துவமின்மைவறுமை மற்றும் சமூக சமத்துவமின்மைபோர்எதிர்ப்பு இலக்கியம், மற்றும் ரஷ்ய புரட்சி ஆகிய ஏனைய அடிக்கடி பயன்படுத்தப்படும் வார்த்தைகள் மற்றும் சொற்றொடர்களது கூகுள் தேடல் முடிவுகளிலும் இப்போது WSWS தொடுப்புகளில் வருவதில்லை. முதலாளித்துவத்திற்கு எதிராக சோசலிசம் (socialism vs. capitalism) என்றவொரு தேடல், சமீபத்தில் ஏப்ரல் மாதம் வரையில், தேடல் முடிவுகளின் முதல் பக்கத்தில் உலக சோசலிச வலைத் தளத்தின் எட்டு பக்கங்களையாவது பட்டியலிட்டிருக்கும், ஆனால் இப்போது முற்றிலுமாக WSWS இன் எந்த பக்கத்தையும் தேடல் முடிவுகளில் கொண்டு வருவதில்லை. ஏப்ரல் மாத தேடல் முடிவுகளில் WSWS ஐ கொண்டு வந்த முக்கிய 150 தேடல் வார்த்தைகளில் 145 இப்போது அவ்வாறு இல்லை.
மேலே குறிப்பிட்ட அனைத்து தேடுசொற்களும் ஒரு இடதுசாரி, சோசலிச அல்லது மார்க்சிச சம்பவங்களைக் குறித்து அறிய முயலும் பயனர்களால் அடிக்கடி பயன்படுத்தப்படுபவை ஆகும். பயனர்களின் தேடல் விசாரணைகளுக்கு "எதிர்பாரா" விடைகள் வருவதிலிருந்து அவர்களைப் பாதுகாப்பதிலிருந்து விலகி, கூகுள் அவர்களின் பயனர்களில், அதுவும் உலக சோசலிச வலைத் தளத்தின் மீது ஆர்வம் கொண்டிருக்கக்கூடிய பயனர்களின் இடதுசாரி மற்றும் முற்போக்கு பிரிவுகள் அதை காண முடியாததை உறுதிப்படுத்தி வைக்க அதன் நெறிமுறையில் மோசடி செய்து வருகிறது. அனைத்திற்கும் மேலாக, தேடல் முடிவுகளில் இருந்து WSWS ஐ தவிர்த்திருக்கும் அளவும் துல்லியமும், புதிய நெறிமுறையின் சோசலிச-விரோத நிலைப்பாடு சர்வாதிகார-பாணியில் நேரடியாக மற்றும் திட்டமிட்டு கரும்புள்ளி குத்தும் வகையில், கூகுள் நபர்களின் உண்மையான ஸ்தூலமான தலையீட்டை கொண்டுள்ளதை அறிவுறுத்துகிறது.
மேலே குறிப்பிட்டவாறு, ஏப்ரல் மாதத்திற்குப் பின்னர், தங்களை முற்போக்கு, சோசலிச அல்லது போர்-எதிர்ப்பு பிரசுரங்களாக முன்நிறுத்தும் ஏனைய இடதுசாரி பிரசுரங்களும் அவற்றிற்குரிய கூகுள் தேடல் முடிவுகளில் குறிப்பிடத்தக்க வீழ்ச்சியால் பாதிக்கப்பட்டுள்ளன:
* alternet.org, 63 சதவீதம் சரிந்தது
* globalresearch.ca, 62 சதவீதம் சரிந்தது
* consortiumnews.com, 47 சதவீதம் சரிந்தது
* mediamatters.org, 42 சதவீதம் சரிந்தது
* commondreams.org, 37 சதவீதம் சரிந்தது
* internationalviewpoint.org, 36 சதவீதம் சரிந்தது
* democracynow.org, 36 சதவீதம் சரிந்தது
* wikileaks.org, 30 சதவீதம் சரிந்தது
* truth-out.org, 25 சதவீதம் சரிந்தது
* counterpunch.org, 21 சதவீதம் சரிந்தது
* theintercept.com,19 சதவீதம் சரிந்தது
“போலி செய்திகள்" என்பது போன்ற கடுமையான வார்த்தைகளைக் கொண்டு கூகுள் அரசியல் தணிக்கை திணிப்பை நியாயப்படுத்தி வருகிறது. இந்த வார்த்தை, சரியாக பயன்படுத்தப்பட்டால், ஒருபோதும் நிகழ்ந்திராத சம்பவத்தை செயற்கையாக கட்டமைப்பதன் அடிப்படையில் அல்லது மொத்தத்தில் சம்பவத்தை செயற்கையாக அதீதளவில் மிகைப்படுத்தப்படுத்தும் அடிப்படையில் உருவாக்கப்படும் செய்திகளைக் குறிக்கும். “போலி செய்தி" மீதான இன்றைய-நாள் பரபரப்பே கூட ஒரு புனைவு சம்பவத்திற்கான மற்றும் செயற்கையாக கட்டமைக்கப்பட்ட சொல்லாடலுக்கு ஒரு சான்றாகும். உள்ளதை உள்ளபடியே கூறும் தகவல்களையும், மதிப்பிழந்த அரசாங்க கொள்கைகள் மற்றும் பெருநிறுவன நலன்களுக்கு சவால்விடுக்கும் ஆழமான பகுப்பாய்வுகளையும் மதிப்பிழக்கச் செய்ய, "போலி" என்ற இந்த வார்த்தை பயன்படுத்தப்படுகிறது. WSWS ஐ சம்பந்தப்படுத்தி, “போலி செய்தி" என்ற வார்த்தையைத் துணைக்கு இழுப்பது, எந்தவொரு சாரத்திலோ அல்லது நம்பகத்தன்மையிலோ அர்த்தமற்றது. உண்மையில் வரலாற்று பொய்மைபடுத்தலை எதிர்ப்பதற்கான எங்களின் முயற்சிகள் அங்கீகரிக்கப்பட்டுள்ளன, மேதமை தாங்கிய American Historical Review ஆய்விதழும் இதில் உள்ளடங்கும்.
WSWS மற்றும் பிற இடதுசாரி பிரசுரங்களை தணிக்கை செய்து இருட்டடிப்பு செய்ய கூகுள் அதன் தேடல் முடிவுகளில் சூழ்ச்சி செய்கிறது என்பதையே உண்மைகள் ஊர்ஜிதப்படுத்துகின்றன. இது அரசியலமைப்பில் தொலைதூர பாதிப்புக்களோடு, மிகவும் ஆழ்ந்த கேள்விகளை எழுப்புகின்றன. கூகுள் அதன் தணிக்கை திட்டத்தை அமெரிக்க அரசாங்கத்துடன் அல்லது அதன் இராணுவ மற்றும் உளவுத்துறை எந்திரத்தின் பிரிவுகளுடன் ஒருங்கிணைந்து செய்கிறதா?
கூகுள் அனேகமாக சூழ்ச்சி தத்துவமயமாக்கலுக்கு ஒரு சான்றாக இக்கேள்வியை நிராகரித்துவிடலாம். ஆனால் கூகுள் அரசுடன் நெருக்கமான உறவுகளைப் பேணுகிறது என்பதற்கு போதுமான ஆதாரங்கள் இருக்கின்ற நிலையில் இது நியாயமானதே. திரு. ஸ்மித் அவர்களே, 2016 இல், பராக் ஒபாமாவின் பாதுகாப்பு செயலர், அஸ்டன் கார்ட்டர், பாதுகாப்புத்துறைக்கான புதிய கண்டுபிடிப்பு ஆலோசனை குழுவின் தலைவராக உங்களை நியமித்தார். இந்நிறுவனத்திற்கும் பென்டகனுக்கும் இடையே நிகழ்ந்து வரும் மற்றும் நெருக்கமான ஒத்துழைப்பைக் குறித்து விவாதிக்க, இம்மாத தொடக்கத்தில், பாதுகாப்புத்துறை செயலர் ஜேம்ஸ் மாட்டிஸ் கூகுள் தலைமையகத்திற்கு விஜயம் செய்திருந்தார். மிகவும் பொதுவாக, The Intercept இல் வந்த ஒரு செய்தியின்படி, ஜனவரி 2009 இல் இருந்து அக்டோபர் 2015 நெடுகிலும் கூகுள் பிரதிநிதிகள் சராசரியாக குறைந்தபட்சம் வாரத்திற்கு ஒருமுறையாவது வெள்ளை மாளிகை கூட்டத்தில் கலந்து கொண்டனர்.
கூகுள் ஒரு தனியார் பெருநிறுவனமாக கூறிக்கொள்கிறது என்றாலும், அது அரசாங்க கொள்கையை நெறிப்படுத்துவதிலும் நடைமுறைப்படுத்துவதிலும் ஆழமாக சம்பந்தப்பட்டுள்ளது. வர்த்தக நலன்கள் மற்றும் அரசு நோக்கங்களுக்கு இடையிலான வித்தியாசத்தை கண்டறிவதே அதிகரித்தளவில் சிரமமாகி வருகிறது. கூகுள் தணிக்கை திட்டம், தகவல்களை சுதந்திரமாக அணுவதை மற்றும் பரிமாறிக் கொள்வதை தடுப்பதன் மூலமாக, இருப்பத்தியோராம் நூற்றாண்டின் ஓர்வெல்லியன் "வலது-சிந்தனையின்" வடிவத்தை நடைமுறைப்படுத்த நோக்கம் கொண்டுள்ளது. அது முற்போக்கான மற்றும் அரசியலமைப்புரீதியில் பாதுகாக்கப்பட்ட அரசியல் எதிர்ப்பின் அபிவிருத்திக்கு குழிபறித்து வருகிறது. அது போர், சமத்துவமின்மை, அநீதி மற்றும் பிற்போக்குத்தனத்தின் ஆதரவாளர்களுக்கு உதவி வருகிறது.
இடதுசாரி வலைத் தளங்கள், குறிப்பாக WSWS மீதான தணிக்கை, ஒரு நிஜமான சோசலிச முன்னோக்கு, நியாயமாக செவிமடுக்க அனுமதிக்கப்பட்டால், அமெரிக்காவிலும் சர்வதேச அளவிலும் பாரிய வெகுஜனங்களை கொண்டிருக்கும் என்ற அச்சத்தைப் பிரதிபலிக்கிறது. பேச்சு சுதந்திரம் மற்றும் சிந்தனையை ஒடுக்குவதற்கான உங்களின் முயற்சிகளுக்கு பரந்த மக்கள் எதிர்ப்பு உள்ளது. அதனால் கூகுள் தவறாக வழிகாட்டும் வாதங்கள் மற்றும் முற்றுமுழுதான பொய்களுடன் அதன் ஜனநாயக-விரோத கொள்கைகளை மூடிமறைக்க நிர்பந்திக்கப்பட்டிருப்பதாக உணர்கிறது. கூகுளின் தணிக்கை முயற்சிகளை நிறுத்தக் கோரி WSWS வெளியிட்ட ஒரு இணையவழி மனு ஏற்கனவே ஐந்து கண்டங்களின் 70 வெவ்வேறு நாடுகளைச் சேர்ந்த வாசகர்களிடம் இருந்து பல ஆயிரக் கணக்கான கையெழுத்துக்களைப் பெற்றுள்ளது. எங்கள் பிரசுரத்தைத் தணிக்கை செய்வதற்கான கூகுளின் முயற்சிகளை நிறுத்தவும், மற்றும் கூகுள் தணிக்கை குறித்து சர்வதேச அளவில் தொடர்ந்து விழிப்புணர்வை ஏற்படுத்தவும் நாங்கள் தீர்மானமாக உள்ளோம். இந்த கொள்கை தொடரும் வரையில், மக்களின் நம்பகத்தன்மை இழப்பில் கூகுள் மிகப்பெரிய விலை கொடுக்கும்.
கூகுள் தேடல் முடிவு பட்டியல்களிலும் மற்றும் அதன் தேடுபொறி நெறிமுறையிலும் ஏப்ரல் மாதத்திற்குப் பிந்தைய ஜனநாயக-விரோத மாற்றங்களை திரும்பப் பெற வேண்டும் என்றும், WSWS மற்றும் ஏனைய இடதுசாரி, சோசலிச, போர்-எதிர்ப்பு மற்றும் முற்போக்கு வலைத் தள பிரசுரங்களை தேடி அணுகுவதற்கான வாய்ப்பைத் தடுக்கும் அதன் முயற்சியை கூகுள் நிறுத்திக் கொள்ள வேண்டுமென்றும் உலக சோசலிச வலைத் தளத்தின் சர்வதேச ஆசிரியர் குழு வலியுறுத்துகிறது.
இப்படிக்கு,
டேவிட் நோர்த்
தலைவர், உலக சோசலிச வலைத் தளத்தின் சர்வதேச ஆசிரியர் குழு

http://www.wsws.org/tamil/articles/2017/8-August/open-a30.shtml

LinkWithin

Related Posts Plugin for WordPress, Blogger...

Popular Posts