Search This Blog

Monday, 16 May 2016

இந்தியாவில் நூற்றுக்கணக்கானோர் வெப்ப அலையால் இறக்கின்றனர்

Hundreds die in Indian heat wave

இந்தியாவெங்கிலும் நிலவுகின்ற முன்கண்டிராத பெரும் வெப்பநிலையால் சமீப வாரங்களில் 300க்கும் அதிகமானோர் கொல்லப்பட்டிருக்கின்றனர். இவர்களில் அநேகமானவர்கள் விவசாயக் கூலிகளும் மற்ற வறிய மக்களும் ஆவர். தெலுங்கானாவும் (249 பேர் இறப்பு) ஆந்திரப் பிரதேசமும் (45 பேர் இறப்பு) மிகவும் பாதிக்கப்பட்ட மாநிலங்களாய் உள்ளன.
பலியானவர்களில் பலரும் இறக்க நேர்ந்ததற்குக் காரணம், 38 டிகிரி செல்சியசுக்கும் (100 டிகிரி பாரன்ஹீட்) அதிகமாக வெயில் கொளுத்துகின்ற கொடுமையான நிலைமைகளிலும் அவர்களுக்கு வேலை செய்வதைத் தவிர வேறு வழியில்லாமல் இருந்ததாகும். வறட்சி பாதித்த மேற்கு மாநிலமான மகாராஷ்டிராவில் 12 வயது சிறுமி ஒருவர் குடிநீர் கொண்டுவருகையில் வெப்பத்திற்குப் பலியானார்.
வெயிலால் பாதிக்கப்பட்டிருக்கும் தொழிற்சாலை மற்றும் கட்டுமானத் தொழிலாளர்கள் மற்றும் விவசாயத் தொழிலாளர்களின் பரந்த மக்கள் ஒரு சாத்தியமில்லாத தெரிவுக்கு முகம்கொடுத்திருக்கின்றனர்: அவர்கள் வீட்டில் சும்மா உட்கார முடியாது, ஏனென்றால் அவர்களது தினக் கூலியை நம்பித் தான் அவர்களது குடும்பம் இருக்கிறது; ஆயினும் அவர்கள் வேலைக்குப் போனால் வெப்பத்திடம் இருந்து அவர்களுக்கு பாதுகாப்பு இல்லை, துரிதமாய் வெப்ப அதிர்ச்சிக்கு முகம்கொடுக்கின்றனர்.
இந்த துயரத்தைக் குறித்த அதிக செய்திகளும் கூட வருவதில்லை, பெரும்பான்மையான மரணங்கள் நடக்கின்ற குக்கிராமப் பகுதிகளுக்கு தங்களது செய்தியாளர்களை அனுப்ப ஒரு சில செய்தி நிறுவனங்களைத் தவிர மற்றவை தயாராய் இல்லை என்பதும் இதற்கு ஒரு காரணம்.
குடிநீர் பற்றாக்குறை ஒரு முக்கியப் பிரச்சினையாக இருக்கிறது. இரண்டு ஆண்டுகளாக பருவமழை சராசரிக்கும் குறைவாக இருந்து வந்ததைத் தொடர்ந்து இந்தியாவின் 29 மாநிலங்களில் பத்து மாநிலங்கள் வறட்சி நிலையை அறிவித்திருக்கின்றன.
”20 நாளைக்கு ஒருமுறை தான் எங்களுக்கு தண்ணீர் விநியோகிக்கப்படுகிறது, வாரத்திற்கு ஒருமுறை குளித்தாலே அது ஆடம்பரமான விடயம் தான்” என்றார் மத்தியப் பிரதேசத்தைச் சேர்ந்த ஒரு விவசாய செயல்பாட்டாளரான மாணிக் கதாம். தண்ணீருக்கு அடிபிடி சண்டை ஏற்படுவதைத் தடுக்க போலிசே குடங்களை நிரப்பித் தருவதாகவும், கிராம மக்களுக்கு ஒரு நாளைக்கு 20 நிமிடங்கள் தான் தண்ணீர் வழங்கப்படுகிறது என்றும் அவர் செய்தியாளர்களிடம் தெரிவித்தார்.
அதிகரித்துச் செல்லும் வெப்பநிலைகள் வறட்சி நிலைமைகளை மேலும் சிக்கலாக்கியிருக்கின்றன, குடிநீர் பற்றாக்குறை நாடெங்கும் 330 மில்லியன் மக்கள் வரை பாதிக்க அச்சுறுத்துகிறது. இது இந்தியாவின் மக்கள்தொகையில் நாலில் ஒரு பங்காகும். இந்தியாவின் மத்தியப் பிரதேச மாநிலத்தில் 42,829 கிராமங்களும், கிழக்கத்திய மாநிலமான ஒடிசாவில் 29,077 கிராமங்களும் தெற்கில் கர்நாடகா மாநிலத்தில் 22,759 கிராமங்களும் பாதிக்கப்பட்டுள்ளன.
வெப்ப அலை பயிர்களுக்கும் சேதம் விளைவித்து, அது தானிய விலைகளை மேலும் அதிகப்படுத்தி, மக்கள் மீது இன்னும் பெரும் துயரத்தைத் திணித்துக் கொண்டிருக்கிறது. வடமேற்கு இந்தியாவெங்கும் நிலவுகின்ற வெப்ப அலை நிலைமைகள் தானியங்கள் மற்றும் தோட்டப் பயிர் விளைச்சலையும் கால்நடை வளர்ப்பையும் பாதிக்கிறது. மேற்கு மற்றும் தென் இந்தியப் பகுதிகளான மகாராஷ்டிரா, தெலங்கானா மற்றும் ஆந்திரப் பிரதேசத்தில் பருவமழை தாமதமானது நெல், பருத்தி, பருப்பு மற்றும் சிறுதானிய விதைப்பில் இருந்து விவசாயிகளைத் தடுத்து வைத்துள்ளது.
பத்தாயிரக்கணக்கிலான ஆடுமாடுகள் இறந்து போனதால், பலருக்கும் வாழ்வதற்கு இன்றியமையாத வாழ்வாதாரம் இல்லாது போயுள்ளது - இந்த நிலை பல இடங்களிலும் விவசாயிகளைத் தற்கொலைக்குத் தள்ளியிருக்கிறது. அல் ஜசீராவின் ஒரு செய்தியின் படி, தக்காணச் சமவெளிப் பகுதியில், கிழக்கு மகாராஷ்டிரப் பகுதியான மராத்வாடாவில், 1,100க்கும் அதிகமான விவசாயிகள் சென்ற ஆண்டில் தற்கொலை செய்து கொண்டனர், அத்துடன் இந்த ஆண்டின் முதல் மூன்று மாதங்களில் மேலும் 216 பேர் தங்கள் உயிர்களை மாய்த்துக் கொண்டனர்.
அதிகாரிகளைப் பொறுத்தவரை, நரேந்திர மோடி மற்றும் அவரது இந்து மேலாதிக்கவாத பாரதிய ஜனதாக் கட்சியின் தலைமையிலான மத்திய அரசாங்கமும் சரி பல்வேறு மாநில அரசாங்கங்களும் சரி, வெப்ப அலைக்கும் வறட்சிக்கும் இந்திய ஆளும் வர்க்கத்தின் வழக்கமான அலட்சியமான பாணியில் தான் பதிலிறுப்பு செய்துள்ளனர்.
சில இந்திய மாநிலங்களில் அதிகாரிகள் மிகத் தாமதமாகவே மக்களை வெளியில் செல்லாமல் இருக்க எச்சரிக்கைகள் அளித்தனர், நாளின் வெப்பமிகுந்த நேரங்களில் கட்டுமானப் பணிகளை தடை செய்தனர், அத்துடன் குழந்தைகள் வெயிலால் பாதிக்கப்படா வண்ணம் அவர்களது கோடை விடுமுறையை நீட்டிக்க சில பள்ளிகளுக்கு உத்தரவிட்டனர் என்று ஊடகங்கள் தெரிவிக்கின்றன. ஆயினும், இந்த பொதுச் சுகாதார அறிவிப்புகள் மிக குக்கிராமப் பகுதிகளில் இருக்கும் பரந்த பிரிவு மக்களுக்கு சென்று சேர்வதில்லை. அத்துடன் தொழிலாளர்களுக்கு கூலி இழப்புக்கு எந்த ஈடும் செய்யப்படுவதில்லை என்பதால் அவர்கள் வேலைக்குச் செல்லவில்லை என்றால் அவர்களும் அவர்களது குடும்பங்களும் பட்டினியாகக் கிடக்க வேண்டியிருக்கும்.
சென்ற ஆண்டில் வெப்ப அலையில் இந்தியாவில் 2,422 பேர் இறந்தனர். இருதசாப்தத்திற்கும் அதிகமான காலத்தில் வெப்பத்தால் உயிரிழந்ததில் இது அதிகப்பட்ச எண்ணிக்கையாகும். இந்தியாவின் தேசிய மற்றும் மாநில அரசாங்கங்கள் சம்பிரதாய கவலைகளை வெளிப்படுத்தின, ஆனால் வெப்ப அலை தணிந்த உடனேயே இறப்பு எண்ணிக்கை மறக்கப்பட்டு விட்டது. இந்த மற்றும் இதற்கு முந்தைய இதேபோன்ற அழிவுகளை உதாசீனம் செய்த அதிகாரிகள், இந்த ஆண்டின் தீவிரமான மற்றும் நீடித்த வெப்பத்தை முன்னெதிர்பார்ப்பதற்கும் அதன் விளைவுகளுக்குத் தயாரிப்பு செய்யவும் தவறினர்.
மறுபடியும் மக்கள் தங்களைத் தாங்களே காப்பாற்றிக் கொள்ள வேண்டிய நிலைக்குத் தள்ளப்பட்டனர். வணிகப் பிரபுக்களும் நடுத்தர வர்க்கத்தின் வசதியான அடுக்குகளும் குளிரூட்டல் வசதியுடனான வசதியான வீடுகளில் வாழ்கின்றனர். ஆனால் மறுபக்கத்தில் தொழிற்சாலைத் தொழிலாளர்களும் நகர்ப்புற ஏழைகளும், நெருக்கியடிக்கும் இடங்களில் வெப்பத்தைத் தாங்கியாக வேண்டும். ஏர் கண்டிஷனர்களின் அதிக விலை காரணமாக, நடுத்தர வர்க்க வீடுகளிலும் கூட, 2013 நிலவரப்படி பாதி வீடுகளில் மட்டும் தான் குளிரூட்டும் வசதி இருக்கிறது.
வறட்சியைப் பொறுத்தவரை, நவீன நீர்ப்பாசனத்தை உருவாக்கத் தவறியமை இந்தத் தாக்கத்தை பெரிதாக்கியிருக்கிறது. வருடந்தோறும் விளைச்சலுக்குப் பயன்படுகின்ற சுமார் 142 மில்லியன் ஹெக்டேர் நிலப்பரப்பில், பாதிக்கும் குறைவாய், சுமார் 64 மில்லியன் ஹெக்டேர்களுக்குத் தான் உறுதியான பாசன வசதி இருக்கிறது. அடுத்தடுத்து வந்த இந்திய அரசாங்கங்களும் உள்நாட்டு மற்றும் சர்வதேச மூலதனத்திற்கு ஆதரவான உள்கட்டமைப்புத் திட்டங்களுக்கே முன்னுரிமையளித்ததால், பல நீர்ப்பாசனத் திட்டங்கள் தசாப்தக்கணக்கில் இழுபறியில் இருக்கின்றன.
இந்தியாவின் எழுச்சியாகச் சொல்லப்படுவது குறித்து மேற்கத்திய ஊடகங்கள் கொண்டாடுகின்ற அதேநேரத்தில், நாட்டின் 1.2 பில்லியன் மக்களில் வறுமைப்பட்ட பெரும்பகுதியின் மிக அடிப்படையான சமூகத் தேவைகளையும் கூடப் பூர்த்திசெய்யும் திறன் கொஞ்சமும் இல்லாததாக இந்திய முதலாளித்துவம் இருக்கிறது என்பதே அப்பட்டமான உண்மையாக இருக்கிறது.
பிரிட்டனிடம் இருந்து இந்தியா சுதந்திரம் பெற்றதன் பின்னான சுமார் 70 ஆண்டுகளின் காலத்தில், தொழிலாள வர்க்கம் மற்றும் கிராம மக்களின் பரந்த மக்களுக்கு கண்ணியமான ஆரோக்கியப் பராமரிப்பையும் பொது உள்கட்டமைப்பையும் கூட உருவாக்கித் தருவதற்கு இந்திய முதலாளித்துவம் தவறியிருக்கிறது.
இந்திய மக்கள்தொகையில் அறுபத்தியொன்பது சதவீதம் பேர் போதுமான சுகாதார வசதிகளுக்கு அணுகலின்றி இருக்கின்றனர். இந்திய அரசு, மொத்தமாய் அத்தனை மட்டங்களிலும் சேர்த்து, மொத்த உள்நாட்டு உற்பத்தியில் 6 சதவீதத்திற்கும் குறைவான தொகையையே சுகாதாரப் பராமரிப்பு மற்றும் கல்விக்காகச் செலவிடுகிறது.
1000 பேருக்கு 0.5 மருத்துவமனைப் படுக்கையே சராசரியாக இருக்கிறது, இந்த எண்ணிக்கை ரஷ்யாவில் 9.1 ஆகவும் சீனாவில் 3 ஆகவும் இருக்கிறது. இந்தியாவில் மொத்த உள்கட்டமைப்பு முதலீடுகளில் வெறும் 0.21 சதவீதம் மட்டுமே சுகாதாரத் துறையில் இருப்பதாக IndiaSpend இன் அரசாங்கத் தரவு மீதான ஒரு பகுப்பாய்வு தெரிவிக்கிறது.
இந்திய நிதி அமைச்சரான ஜேட்லி 2015-16 நிதியாண்டில் உள்கட்டமைப்புத் துறையிலான இந்திய அரசாங்கத்தின் செலவினத்தில் 700 பில்லியன் ரூபாய் அதிகரிக்கப்பட்டிருப்பதாக அறிவித்திருந்தாலும், இந்திய அரசாங்கம் பல துறைகளிலும் சமூகச் செலவினங்களை வெட்டிக் கொண்டிருக்கிறது. சுகாதார ஆய்வு மற்றும் எய்ட்ஸ் கட்டுப்பாடு உள்ளிட சுகாதாரப் பராமரிப்புக்கான ஒதுக்கீடு 15 சதவீதம் வரை குறைக்கப்பட்டு வெறும் 331.5 பில்லியன் ரூபாய்களாக (5.4 பில்லியன் டாலர்கள்) குறைக்கப்பட்டது, கல்வித் துறை ஒதுக்கீடு 16 சதவீதம் வரை குறைக்கப்பட்டது.
By Kanda Gabriel
11 May 2016
http://www.wsws.org/tamil/articles/2016/may2016/heat-m12.shtml

Wednesday, 11 May 2016

ஏகாதிபத்திய போருக்கும், தமிழ் தேசியவாதத்தின் வங்குரோத்துக்கும் எதிராக சோசலிசத்திற்கான போராட்டம்.

The socialist struggle against war and the bankruptcy of Tamil nationalism


நான்காம் அகிலத்தின் அனைத்துலகக் குழுவின் பிரான்ஸ் ஆதரவாளர்கள் மே 15 ம் திகதி பாரிசில் ஒரு பொதுக்கூட்டத்தினை ஒழுங்கு செய்துள்ளனர். பேச்சாளர்கள் இலங்கையிலும் ஆசியாவிலும் கூர்மையடையும் போர் ஆபத்தின் மத்தியில் தமிழ் தேசியவாத கட்சிகளின் வங்குரோத்து தொடர்பாகவும், தமிழ் தொழிலாளர்களும், ஐரோப்பிய தொழிலாளர்களும் போரையும் சிக்கன நடவடிக்கைகளையும் எப்படி எதிர்ப்பது என்பது தொடர்பாகவும் உரையாற்றுவார்கள். தமிழ் சமூகத்தினதும் அத்தோடு ஏனைய தேசிய இனங்களினதும் தொழிலாளர்கள், இளைஞர்கள், புத்திஜீவிகளை கலந்து கொள்ளுமாறு அழைக்கின்றோம்.
நீண்ட காலமாக ஐரோப்பாவில் தமிழ் புலம்பெயர்ந்தோரினது அரசியல் வாழ்க்கையில் ஆதிக்கம் செலுத்திய தமிழ் தேசியவாத கட்சிகள் மதிப்பிழந்து விட்டன. இலங்கையில் தமிழ் தேசிய கூட்டமைப்பினால் தலைமை தாங்கப்படும் அவர்களின் கூட்டு சிந்தனையாளர்கள் கடந்த வருடம் ஜனாதிபதி மைத்திரிபால சிறிசேன, பிரதமர் ரணில் விக்கிரமசிங்க ஆகியோரை பதவியில் அமர்த்திய அமெரிக்க ஆதரவு ஆட்சிமாற்றத்தின் வெட்கங்கெட்ட ஆதரவாளர்களாகி விட்டனர்.
நான்காம் அகிலத்தின் அனைத்துலகக் குழுவின் இலங்கை பிரிவான சோசலிச சமத்துவக் கட்சியின் துணை செயலாளர் தீபால் ஜெயசேகர கூட்டத்தின் பிரதம உரையை வளங்குவார். மாறி மாறி ஆட்சிக்கு வந்த கொழும்பு அரசாங்கங்களின் தமிழர் விரோத இனவாத யுத்தத்திற்கு எதிராக சோசலிச, சர்வதேசிய அடித்தளத்திலான சோசலிச சமத்துவ கட்சியின் சிங்கள, தமிழ், முஸ்லீம் தொழிலாளர்களை ஐக்கியப்படுத்தும் போராட்டத்தில் அவர் கிட்டத்தட்ட மூன்று தசாப்தங்களாக ஒரு தலைமைப் பாத்திரத்தினை வகித்து வருகின்றார்.
மே 15 ல் ஜெயசேகர, வாஷிங்டன் ஒரு அமெரிக்க சார்பு ஆட்சியினை கொழும்பில் நிர்மாணித்தது, எப்படி ஆசியா முழுமைக்குமான நாடுகளுடன் இணைந்து சீனாவினை சுற்றி வளைப்பதன் மூலம் போருக்கு தயார் செய்யும் அதனது பரந்த திட்டத்தின் ஒரு பாகம் என்பதை விளங்கப்படுத்துவார். இலங்கை, அனைத்து ஏகாதிபத்திய சக்திகளினதும் போருக்கான உந்துதலின் உலக அரசியல் நீர்ச்சுளிக்குள் இழுக்கப்பட்டு இருக்கின்றது.
சோசலிச சமத்துவக் கட்சியின், இலங்கை, இந்திய உபகண்ட தொழிலாளர்களை போருக்கெதிராக ஐக்கியப்படுத்தும் போராட்டம், நான்காம் அகிலத்தின் அனைத்துலகக் குழுவின் போருக்கு எதிராக சோசலிசத்திற்கான உலக தொழிலாளர்களை க்கியப்படுத்தும் போராட்டத்தின் ஒரு பிரிக்க முடியாத பாகமாக இருக்கின்றது. இந்த போராட்டத்தின் படிப்பினைகள் ஐரோப்பாவில் தமிழ் தொழிலாளர்களுக்கு மட்டுமன்றி ஏகாதிபத்தியத்தினால் கட்டவிழ்த்து விட்ட போர் முன்னெடுப்புகளுக்கும், சிக்கன நடவடிக்கைகளுக்கும் எதிராக போராட முனையும் முழு ஐரோப்பிய தொழிலாள வர்க்கத்திற்கும் இன்றியமையாதது.

காலம்: 15.05.2016, நேரம்: பிற்பகல் 3:00
இடம்: Auberge de Jeunesse HI Yves Robert
20, esplanade Nathalie Sarraute (en face du 43 rue Pajol)
75018 Paris
Métro: Marx Dormoy, Ligne 12 - La Chapelle, Ligne 2 - Riquet, Ligne 7

http://www.wsws.org/tamil/articles/2016/may2016/meet-m05.shtml

Monday, 9 May 2016

இந்திய துறைமுகங்கள் மற்றும் இராணுவத் தளங்களை அமெரிக்க இராணுவம் பிரயோகிக்க அனுமதிக்கும் உடன்பாட்டை இந்திய உயரடுக்கு வரவேற்கிறது

Indian elite welcomes deal to allow US military to use ports and bases


அமெரிக்க இராணுவம் மீள்எரிபொருள் நிரப்புவதற்கும், பழுது பார்ப்பதற்கும் மற்றும் நிறுத்தி வைப்பதற்கும் உரிய இடமாக இந்திய விமானத் தளங்களை மற்றும் துறைமுகங்களை வழமையாக பிரயோகிக்க அனுமதிப்பதற்கு புது டெல்லி கோட்பாட்டுரீதியில் உடன்படுகிறது என்ற கடந்த வார அறிவிப்பை இந்திய உயரடுக்கு மனதார வரவேற்றுள்ளது.
ஒரே முக்கிய அதிருப்தி எதிர்கட்சியான காங்கிரஸ் கட்சி மற்றும் இந்திய ஸ்ராலினிச மார்க்சிஸ்ட் கம்யூனிஸ்ட் கட்சியிடமிருந்து (சிபிஎம்) வந்துள்ளது. அத்தகைய ஒரு உடன்படிக்கை இந்தியாவை அமெரிக்காவின் உத்தியோகப்பூர்வ இராணுவ கூட்டாளியாக்க வழிவகுக்கும் என்ற வெளிப்படையான புள்ளியை அவை குறிப்பிடுகின்றன, இது இந்திய முதலாளித்துவத்தின் "மூலோபாய சுய அதிகாரத்தை"—அதாவது அதன் சுதந்திர நடவடிக்கையை நெருக்கடிக்கு உள்ளாக்குமென அவை வாதிடுகின்றன.
அமெரிக்க பாதுகாப்புத்துறை செயலர் அஷ்டன் கார்ட்டரின் சமீபத்திய இந்திய விஜயத்தின் இறுதி நாளான ஏப்ரல் 12 அன்று ஒரு கூட்டு பத்திரிகையாளர் கூட்டத்தில், அவரும் அவரது இந்திய சமபலமான மனோகர் பாரிக்கரும் அறிவிக்கையில், புது டெல்லியும் மற்றும் வாஷிங்டனும் தளவாடங்கள் பரிவர்த்தனை புரிந்துணர்வு உடன்படிக்கையை (LEMOA) இறுதி செய்ய "கோட்பாட்டுரீதியில்" உடன்பட்டிருப்பதாக அறிவித்தனர்.
அத்தகைய ஒரு உடன்படிக்கை ஒரு தசாப்தமாக அல்லது அதற்கும் அதிகமான காலத்தில் அமெரிக்காவின் ஒரு பிரதான நோக்கமாக இருந்துள்ளது. இது சீனாவை மூலோபாயரீதியில் தனிமைப்படுத்த, சுற்றி வளைக்க மற்றும் அவசியமானால் அதற்கு எதிராக போர் தொடுக்க அமெரிக்க ஏகாதிபத்தியத்தின் உந்துதலில் இந்தியாவை ஒரு "முன்னிலை" நாடாக ஆக்குவதை நோக்கிய ஒரு பிரதான படியாகும்.
மே 2014 இல் பதவிக்கு வந்ததில் இருந்து, இந்தியாவின் பாரதீய ஜனதா கட்சி (பிஜேபி) தலைமையிலான அரசாங்கம் முன்பினும் அதிகமாக முழுமையாக அமெரிக்காவின் சீன-விரோத "ஆசிய முன்னெடுப்புக்குள்" ஒருங்கிணைந்துள்ளது.
"கடல் போக்குவரத்து பாதுகாப்புக்கும்" மற்றும் கிழக்கு ஆசியாவில் "சுதந்திர கடல் போக்குவரத்து" மற்றும் "விமான போக்குவரத்துக்கும்" சீனாவை ஒரு அச்சுறுத்தலாக சித்தரித்து, தென் சீனக் கடல் மீதான வாஷிங்டனின் ஆக்ரோஷமான தொனியையே பிரதம மந்திரி நரேந்திர மோடியும் அவரது அரசாங்கமும் மீண்டும் மீண்டும் கிளிப்பிள்ளையைப் போல கூறி வருகின்றனர். மோடி அரசாங்கம் அமெரிக்காவுடன் மற்றும் ஆசிய-பசிபிக், ஜப்பான் மற்றும் ஆஸ்திரேலியாவில் அதன் பிரதான கூட்டாளிகளுடனான இருதரப்பு மற்றும் முத்தரப்பு இராணுவ பாதுகாப்பு உறவுகளையும் அதிகரித்துள்ளது. இதில் வருடாந்தர இந்தோ-பசிபிக் கடற்படை பயிற்சியில் (மலபார் பயிற்சி) ஜப்பானை ஒரு பங்காளியாக ஆக்கியமை, மற்றும் இந்தோ-பசிபிக் "கடல் போக்குவரத்து பாதுகாப்பு பேச்சுவார்த்தையைத்" தொடங்கியமை ஆகியவையும் உள்ளடங்கும். இந்தியாவின் கிழக்கை நோக்கிய நடவடிக்கை (Act East) கொள்கையை (அதாவது தென்கிழக்கு ஆசியாவுடன் பொருளாதார மற்றும் இராணுவ-பாதுகாப்பு உறவுகளை அபிவிருத்தி செய்வதற்கான அதன் உந்துதலை) அமெரிக்காவின் "முன்னெடுப்பு" அல்லது "மீள்சமன்படுத்தலுடன்" ஒருங்கிணைக்கவும் மற்றும் இராணுவ தளவாட அமைப்புமுறைகளைக் கூட்டாக உற்பத்தி செய்வது மற்றும் கூட்டாக அபிவிருத்தி செய்வதற்கான வாஷிங்டனின் முன்வரலையும் பிஜேபி அரசாங்கம் ஆர்வத்துடன் ஏற்றுக் கொண்டுள்ளது.
இந்தியாவின் பெருநிறுவன ஊடகங்கள் மற்றும் எண்ணற்ற இராணுவ-மூலோபாய பகுப்பாய்வாளர்கள் அமெரிக்காவுடன் LEMOA உடன்படிக்கையை இறுதி செய்வதென்ற மோடி அரசாங்கத்தின் தீர்மானத்தைப் பாராட்டியுள்ளனர். அவர்கள், அமெரிக்க ஏகாதிபத்தியத்துடனான ஒரு விரிவாக்கப்பட்ட இராணுவ-மூலோபாய பங்காண்மையானது பாகிஸ்தான் மற்றும் சீனாவிற்கு எதிராக இந்தியாவின் கரங்களைப் பலப்படுத்தும் என்றும் தெற்காசியா, இந்திய பெருங்கடல் மற்றும் அதற்கு அப்பாலும் அதன் வல்லரசாகும் அபிலாஷைகளைப் புது டெல்லி எட்டுவதற்கு உதவும் என்றும் வாதிடுகிறார்கள். அவர்கள் கூறியுள்ள ஒருசில ஆட்சேபணைகள், மத்தியக் கிழக்கு மற்றும் ஆபிரிக்காவில் சட்டவிரோத போர்கள் நடத்துவதில் சர்வதேச சட்டத்தை அவமதிக்கும் அமெரிக்காவின் பொறுப்பற்ற நடவடிக்கைகளையோ அல்லது அணுஆயுத ரஷ்யா மற்றும் சீனாவுக்கு எதிரான அதன் பொறுப்பற்ற மூலோபாய நடவடிக்கைகளுடனோ சம்பந்தப்பட்டதில்லை. அதற்கு மாறாக அவர்களது கவலை எல்லாம், தசாப்தகாலமாக பாகிஸ்தான் இராணுவத்துடனான அமெரிக்காவின் பங்காண்மையின் மீதுள்ளது, பாகிஸ்தான் விடயத்தில் உண்மையில் வாஷிங்டன் இந்தியாவின் "கரங்களைச் சுதந்திரமாக விடாது" என்பதற்காக அவர்கள் சீறுகிறார்கள்.
டைம்ஸ் ஆஃப் இந்தியா ஏப்ரல் 14 தலையங்கத்தில், “மூலோபாய மற்றும் இராணுவ விவகாரங்களில் அமெரிக்காவுடன் இன்னும் நெருக்கமாக ஈடுபடுவதற்கும் மற்றும் வேகத்தை அதிகரிப்பதற்கும் சரியாக முடிவெடுத்ததற்காக" மோடி அரசாங்கத்தைப் பாராட்டியது. “சமநிலைப்படுத்தும் நடவடிக்கை: அமெரிக்கா உடனான தளவாடங்களின் உடன்படிக்கை இந்தியாவின் மூலோபாய சுயஅதிகாரத்தை முடமாக்குவதைக் காட்டிலும் விரிவாக்குகிறது" என்று தலைப்பிடப்பட்ட அந்த தலையங்கம் ஸ்ராலினிஸ்டுகள் மற்றும் காங்கிரஸ் கட்சியின் விமர்சனங்களுக்கு ஒரு தெளிவான மறுமொழியாக இருந்தது.
அரசாங்கத்திடமிருந்து அவர்களுக்கான வழிகாட்டலைப் பெற்று, டைம்ஸ் ஆஃப் இந்தியா தலையங்க குழு LEMOA இன் முக்கியத்துவம் மற்றும் தர்க்கத்தைக் குறைத்துக்காட்ட முயன்றது. அது "அமெரிக்க துருப்புகளை இந்திய மண்ணில் நிலைநிறுத்துவதை உள்ளடக்கியதல்ல" என்ற அஷ்டன் கார்ட்டரின் கூற்றை மீண்டும் வலியுறுத்திய அது, அதேவேளையில் அவை நிலைநிறுத்தப்படலாம் என்றவர் ஒப்புக் கொண்டதை உதறிவிடுகிறது.
மிக முக்கியமாக, தளிர்விட்டுவரும் இந்தோ-அமெரிக்க இராணுவ-மூலோபாய கூட்டணியின் உண்மையான இலக்காக சீனாவை அடையாளம் காண்பதில் டைம்ஸ் மிகவும் ஒளிவுமறைவின்றி இருந்தது. அமெரிக்காவுடனான நெருக்கமான பங்காண்மையானது, "சீனா இந்திய பெருங்கடலில் ஒரு கடல்போக்குவரத்து சக்தியாக வளர்வதற்கு ஏற்கனவே முயற்சித்து வருகின்ற நேரத்தில், இந்தியாவிற்குத் தவிர்க்கவியலாத நிர்பந்தமாகும்" என்றது வாதிட்டது. “சீனாவின் வெளிநாட்டு வர்த்தகத்தில் 65 சதவீதம் இந்திய பெருங்கடல் வழியாக கடந்து செல்கின்றன. இப்பகுதியில், முக்கியமாக மலாக்கா ஜலசந்தியில், இந்தியா கடல் போக்குவரத்து மேலாதிக்கத்தைப் பேணுவது மத்திய காலத்திற்கு இந்தியாவின் மூலோபாய சுயஅதிகாரத்தைப் பேணுவதற்கு முக்கியமாகும்,” என்றது தொடர்ந்து குறிப்பிட்டது.
சீனாவின் வெளிநாட்டு வர்த்தகத்திற்கு இந்திய பெருங்கடல் மற்றும் மலாக்கா ஜலசந்தி முக்கியமானது என்ற குறிப்பானது, சீனாவுடனான ஒரு போர் நடவடிக்கையில் அல்லது போர் நெருக்கடி சமயத்தில் மலாக்கா ஜலசந்தி போன்ற முக்கிய இந்திய பெருங்கடலின் திணறடிக்கும் முனைகளைக் கைப்பற்றுவதன் மூலமாக சீனா மீது ஒரு பொருளாதார முற்றுகையைத் திணிப்பதற்கான வாஷிங்டனின் திட்டங்களுடன், இந்திய உயரடுக்கு, முழுமையாக இந்திய மக்களின் முதுகுக்குப் பின்னால், எந்தளவிற்கு அணி சேர்ந்துள்ளது என்பதை எடுத்துக்காட்டுகிறது.
இந்திய மூலோபாய பகுப்பாய்வாளர் சி. ராஜமோகன் இந்தியன் எக்ஸ்பிரஸில் பிரசுரித்த ஒரு கருத்துரையில், இந்து மேலாதிக்க பிஜேபி தலைமையிலான அரசாங்கம் “அமெரிக்காவுடன் வெளிப்படையாக சர்ச்சைக்குரிய உடன்படிக்கை ஒன்றில் கையெழுத்திடும் தன்னம்பிக்கை" கொண்டிருப்பதற்காக அதை பாராட்டினார், அதேவேளையில் "அமெரிக்காவுடன் ஒரு நியாயமான ஒளிவுமறைவற்ற உடன்படிக்கையைக் 'கோட்பாட்டுரீதியில்' முடிவெடுக்க" இந்தியா "ஒரு தசாப்தத்திற்கும் அதிகமான காலம்" எடுத்ததற்காக அவர் வருத்தப்பட்டார்.
டைம்ஸ் ஆஃப் இந்தியாவைப் போலவே, மோகனும் இந்தியா தன்னைத்தானே இந்தியப் பெருங்கடல் சக்தியாக நிறுவிக் கொள்வதற்கான முக்கியத்துவம் மீது கவனத்தைக் குவித்திருந்தார்—இந்த நோக்கத்திற்கு, ஜோர்ஜ் டபிள்யு புஷ் மற்றும் ஒபாமா இருவரின் கீழ், வாஷிங்டன் மீண்டும் மீண்டும் அமெரிக்க ஆதரவை அறிவித்துள்ளது. இந்திய படைகளும் அமெரிக்க இராணுவத் தளங்களைப் பயன்படுத்துவதற்குப் பரஸ்பர உரிமைகளை வழங்கும் LEMOA உடன்படிக்கை, “இந்தியப் பெருங்கடல் மற்றும் அதற்கு அப்பாலும் புது டெல்லி அதன் பரந்து விரிந்த நலன்களைப் பாதுகாக்க வேண்டியிருக்கும் போது அத்தருணத்தில் துணைகண்டத்தின் கடல்களிலிருந்து வெகுதூரத்தில் செயல்பட வேண்டியிருந்தால், இந்திய இராணுவப் படைகளுக்கு, குறிப்பாக கடற்படைக்கு உதவியாக இருக்கும்" என்று மோகன் குறிப்பிட்டார்.
மூத்த காங்கிரஸ் கட்சி தலைவரும், முந்தைய காங்கிரஸ் தலைமையிலான அரசாங்கத்தில் 2006-2014 இல் பாதுகாப்பு அமைச்சராக இருந்தவருமான ஏ.கே. அந்தோணி, LEMOA இல் கையெழுத்திடுவதென்ற மோடி அரசாங்கத்தின் தீர்மானம் “இந்தியாவின் வெளியுறவு கொள்கை மற்றும் மூலோபாய சுயஅதிகார சுதந்திரம் முடிவுறுவதன் தொடக்கம்” என்றும், “ஒரு பேரழிகரமான தீர்மானம்” என்றும் வரையறுத்தார்.
இந்த உடன்படிக்கை படிப்படியாக அமெரிக்கா-தலைமையிலான இராணுவ அணிக்குள் இந்தியா இணைவதில் போய் முடியுமென்று அவர் எச்சரிக்கிறார். பாதுகாப்பு மந்திரியாக அவரது நீண்ட பதவி காலத்தின் போது அந்தோணி இந்த தளவாட பரிவர்த்தனை ஒத்துழைப்பு உடன்படிக்கை மீது அமெரிக்காவுடன் நீண்ட பேச்சுவார்த்தைகளில் ஈடுபட்டவராவார், பின்னர் இறுதியில் அவற்றை புறக்கணித்தார், ஏனென்றால் அவரும் இராணுவ-பாதுகாப்பு ஸ்தாபகத்தின் முக்கிய பிரிவுகளும் அது இந்தியாவை வாஷிங்டனின் மூலோபாய நிகழ்ச்சிநிரலுக்குப் பின்னால் அணிதிரட்டுமென்ற தீர்மானித்திற்கு வந்தனர். அவ்விதத்தில் LEMOA இன் தாக்கங்களைக் குறித்தும், அதை பிரயோகித்து இந்தியாவை சீனாவிற்கு எதிரான அமெரிக்க-தலைமையிலான இராணுவ கூட்டணிக்குள் இழுக்கும் வாஷிங்டனின் திட்டங்கள் குறித்தும் அந்தோணிக்கு நன்கு பரிச்சயம் உண்டு.
ஸ்ராலினிச சிபிஎம், ஏப்ரல் 13 இல் பிரசுரித்த ஒரு பொலிஸ்பீரோ அறிக்கையில் குறிப்பிடுகையில், “இந்திய கடற்படை மற்றும் விமானப்படை தளங்களின் அடிப்படை வசதிகளை அமெரிக்க இராணுவப் படைகள் பயன்படுத்த அனுமதிக்க ஒப்புக் கொண்டதன் மூலமாக மோடி அரசாங்கம் அமெரிக்காவுடன் இராணுவ கூட்டுறவை ஆழப்படுத்தும் அபாயகரமான படியை எடுத்துள்ளது,” என்று குறிப்பிட்டது. “பாதுகாப்பு அமைச்சர் கூறுவதைப் போல கிடையாது, அமெரிக்க கப்பல்கள் மற்றும் விமானங்களுக்கான மீள்எரிபொருள் நிரப்புவதற்கும், பராமரிப்பு மற்றும் பழுதுபார்ப்பு வசதிகளுக்கும் இந்திய மண்ணில் வழமையாக அமெரிக்க இராணுவப் படை சிப்பாய்களை நிலைநிறுத்த வேண்டியிருக்கும்,” என்பதையும் அது சேர்த்துக் கொண்டது.
“தொலைதொடர்பு மற்றும் தகவல் பாதுகாப்பு புரிந்துணர்வு உடன்படிக்கை (CISMOA) மற்றும் அடிப்படை பரிவர்த்தனை மற்றும் கூட்டுறவு உடன்படிக்கை (BECA) ஆகிய ஏனைய இரண்டு உடன்படிக்கைகள்" பரிசீலனையில் இருப்பதாக இந்திய பாதுகாப்பு மந்திரி பாரிக்கர் குறிப்பிட்டதைச் சுட்டிக்காட்டி, சிபிஎம் தொடர்ந்து குறிப்பிடுகையில், “இவை இந்திய ஆயுத படைகளின் கட்டளையகம் மற்றும் கட்டுப்பாட்டு உள்கட்டமைப்பை அமெரிக்க இராணுவப் படைகளுடன் ஒருங்கிணைக்கும். இவ்வாறு செய்வதன் மூலமாக, பிஜேபி அரசாங்கம் கோட்டைக் கடந்து செல்கிறது, இது சுதந்திரத்திற்குப் பின்னர் வேறெந்த அரசாங்கமும் செய்திராததது—இந்தியாவை முழுமையாக அமெரிக்காவின் முழு அளவிலான இராணுவக் கூட்டாளியாக மாற்றுகிறது,” என்றது.
LEMOA ஐ எதிர்ப்பதில் காங்கிரஸ் கட்சியும் ஸ்ராலினிஸ்டுகளும், இந்திய உயரடுக்கினது பிரிவுகளின் கவலைகளுக்குக் குரல் கொடுக்கின்றனர். ஷிங்டனுடன் மிகவும் நெருக்கமான ஒரு மூலோபாய கூட்டணி இந்திய முதலாளித்துவ வர்க்கத்தின் புவிசார் மூலோபாய நலன்களுக்குக் குழிபறிக்குமென இவர்கள் கருதுகிறார்கள்.
இவர்களது எதிர்ப்புக்கும் உண்மையான ஏகாதிபத்திய-எதிர்ப்பிற்கும் எந்த சம்பந்தமும் இல்லை. போருக்கும் மற்றும் அமெரிக்க ஏகாதிபத்தியத்தின் சூறையாடும் நடவடிக்கைகளுக்கும் ஆழ்ந்த எதிர்ப்பைக் கொண்டுள்ள தொழிலாள வர்க்கம் மற்றும் கிராமப்புற உழைப்பாளர்களிம் மீது எப்படி அரசியல் கட்டுப்பாட்டைப் பேணுவது என்பது உட்பட, முழுமையாக அவர்களது எதிர்ப்பு, இந்திய முதலாளித்துவ வர்க்க நலன்களை எவ்வாறு சிறப்பாக முன்னெடுப்பது என்பதை சுற்றியே சுழல்கிறது.
காங்கிரஸ் கட்சி மற்றும் ஸ்ராலினிசவாதிகள் இப்போது அமெரிக்காவின் "ஒரு முழுமையான இராணுவ கூட்டாளியாக" இந்தியா மாறி வருவதற்கு அவர்களின் எதிர்ப்பை தம்பட்டமடித்தாலும், அவை இரண்டுமே புது டெல்லி மற்றும் வாஷிங்டனுக்கு இடையிலான முன்பினும் விரிவான இராணுவ-பாதுகாப்பு உறவுகளை அபிவிருத்தி செய்வதில் ஒரு முன்னிலை பாத்திரம் வகித்துள்ளன.
பத்தாண்டு கால காங்கிரஸ் தலைமையிலான ஐக்கிய முற்போக்கு கூட்டணி (UPA) அரசாங்கத்தின் போது தான், இந்தியா அமெரிக்க ஏகாதிபத்தியத்துடன் ஒரு “உலகளாவிய மூலோபாய பங்காண்மையை” முழுமைப்படுத்தியது, அத்துடன் புதிய இந்திய ஆயுத தளவாட ஒப்பந்தங்களுக்கு அமெரிக்கா மிக முக்கிய விற்பனையாளராக மாறியது. ஸ்ராலினிச சிபிஎம் மற்றும் அதன் இடது முன்னணி, 2004 இல் ஐக்கிய முற்போக்கு கூட்டணியை உருவாக்க உதவியதுடன், முழுமையாக நான்காண்டுகளுக்கு அதன் நாடாளுமன்ற பெரும்பான்மைக்காக ஐ.மு.கூட்டணிக்கு ஆதரவு வழங்கியது. இதே காலகட்டத்தின் போது தான் காங்கிரஸ் இந்தோ-அமெரிக்க அணுஆயுதத்திற்கு அல்லாத அணுசக்தி உடன்படிக்கைக்குப் பேரம்பேசியது, இந்த உடன்படிக்கை அமெரிக்க ஏகாதிபத்தியம் மற்றும் இந்திய முதலாளித்துவத்திற்கு இடையிலான கூட்டணி வளர்ச்சியைப் பலப்படுத்தியது.
ஐயத்திற்கிடமின்றி ஸ்ராலினிசவாதிகள் இப்போது, மோடி அரசாங்கத்திற்கு அதிகரித்து வரும் சமூக எதிர்ப்பை, இந்திய முதலாளித்துவ வர்க்கத்தின் பாரம்பரிய கட்சியான காங்கிரஸ் கட்சிக்குப் பின்னால் திருப்பிவிடுவதன் மூலமாக அரசியல்ரீதியில் அதை ஒடுக்கும் அவர்களது முயற்சிகளை நியாயப்படுத்துவதற்காக, வாஷிங்டனுடன் இன்னும் நெருக்கமான இராணுவ-மூலோபாய உறவுகளுக்கு பிஜேபி அரசாங்கம் திரும்பியிருப்பதைப் பயன்படுத்திக் கொள்ள முயல்கிறார்கள்.
ஏற்கனவே ஸ்ராலினிஸ்டுகள் மேற்கு வங்க மாநில தேர்தல்களில் காங்கிரஸ் கட்சியுடன் ஒரு தேர்தல் கூட்டணி அமைத்துள்ளனர்.
மிக முக்கியமாக LEMOA உடன்படிக்கையை எதிர்ப்பதில் சிபிஎம் பொலிட்பீரோ அறிக்கை, இந்தியாவின் "தேசிய இறையாண்மையை" மற்றும் "மூலோபாய சுயஅதிகாரத்தை" மோடி அரசாங்கம் சமரசப்படுத்துவதாக குற்றஞ்சாட்டி, முற்றிலுமாக முதலாளித்துவ வர்க்கத்தின் தேசிய நலன்களது நிலைப்பாட்டிலிருந்து அந்த உடன்படிக்கையைக் கண்டிப்பதுடன், இந்த அடிப்படையிலேயே ஆளும் வர்க்கத்திற்குள் ஆதரவைத் திரட்ட முயல்கின்றனர். “சகல அரசியல் கட்சிகளும் மற்றும் தேசப்பற்றுமிக்க பிரஜைகளும்" “அமெரிக்காவுக்கு அடிபணிவதை எதிர்க்க" வேண்டும் என்று ஸ்ராலினிஸ்டுகள் அறிவிக்கின்றனர்.
இந்த பிற்போக்குத்தனமான நிலைப்பாட்டை வைத்துக் கொண்டு, ஸ்ராலினிசவாதிகள் போர் அபாயத்தின் மீதும் மற்றும் எந்தளவிற்கு வாஷிங்டனை இந்தியா ஆதரித்துள்ளது என்பதன் மீதும் குற்றகரமாக மவுனமாக இருக்கிறார்கள், ஐக்கிய முற்போக்கு கூட்டணியின் (UPA) கீழ் அதை பதவியில் தக்க வைப்பதில் அவர்கள் அமெரிக்க ஏகாதிபத்திய ஆக்ரோஷத்தை ஊக்குவித்துள்ளார்கள் என்பதும் இதில் உள்ளடங்கும். அமெரிக்க மூலோபாய நடவடிக்கைக்குள் மற்றும் சீனாவிற்கு எதிரான போர் திட்டங்களில் இந்தியா எவ்வாறு ஒருங்கிணைக்கப்பட்டு வருகிறது என்பதனையோ அல்லது தென் சீனக் கடலில் மற்றும் ஆசிய-பசிபிக்கின் வேறு இடங்களில் அமெரிக்க ஆத்திரமூட்டல்கள் எவ்வாறு அப்பிராந்தியத்திலும் மற்றும் உலகெங்கிலுமான மக்களுக்கு கணக்கிட முடியாத விளைவுகளுடன் ஓர் இராணுவ மோதலைத் தூண்டிவிடும் என்பதனையோ அவர்கள் அம்பலப்படுத்துவதில்லை.
காங்கிரஸ் மற்றும் ஸ்ராலினிசவாதிகளுக்கு அப்பாற்பட்டு, தமிழ்நாட்டில் உள்ள அஇஅதிமுக மற்றும் திமுக, ஆந்திர பிரதேசத்தில் உள்ள தெலுங்கு தேச கட்சி மற்றும் ஐக்கிய ஜனதா தளம் போன்ற மாநில அளவிலான மற்றும் இந்தியாவில் தேசியளவிலான ஏனைய சகல அரசியல் கட்சிகளும் LEMOA உடன்படிக்கையில் கையெழுத்திட்ட பிஜேபி அரசாங்கத்தின் திட்டங்களைக் குறித்து மவுனமாக உள்ளன. இது ஆளும் வர்க்கத்தின் அனைத்து தரப்பும் அமெரிக்க ஏகாதிபத்தியத்துடன் நெருக்கமான மூலோபாய உறவுகளை ஆதரிப்பதையும் மற்றும் இந்தியாவின் சொந்த வல்லரசாகும் அபிலாஷைகளை இன்னும் ஆக்ரோஷமாக வலியுறுத்துவதையும் சுட்டிக்காட்டுகிறது.
By Deepal Jayasekera
20 April 2016
http://www.wsws.org/tamil/articles/2016/apr2016/indi-a22.shtml

Sunday, 8 May 2016

இந்தியா, சீன அழுத்தத்தின் கீழ், உகூர் பிரிவினைவாதி டொல்குன் இசாவிற்கான நுழைவனுமதியை இரத்து செய்கிறது

Under Chinese pressure, India cancels visa to Uyghur separatist Dolkun Isa


சீனாவின் சின்ஜியாங் உகூர் சுயாட்சி (Xinjiang Uyghur) பிராந்தியத்தின் ஒரு பிரிவினைவாதியும், நாட்டிலிருந்து வெளியேற்றப்பட்டவருமான உகூர் தலைவர் டொர்குன் இசாவிற்கு (Dolkun Isa) புது டெல்லி நுழைவனுமதி வழங்கியதை அடுத்து, இந்தியாவிற்கும் சீனாவிற்கும் இடையே ஒரு இராஜாங்க பிரச்சினை வெடித்தது.
இந்த முடிவு பெய்ஜிங்கிடமிருந்து ஓர் ஆத்திரமான எதிவினையைத் தூண்டியது. இசா கைது செய்யப்படுவதற்காக "இன்டர்போல் மற்றும் சீனப் பொலிஸின் சிவப்பறிக்கையில் வைக்கப்பட்ட ஒரு பயங்கரவாதியாவார்,” என்று கடந்த வியாழனன்று சீனாவின் வெளியுறவுத்துறை அமைச்சகம் குறிப்பிட்டது. “அவரை நீதியின் முன் கொண்டு வருவது தொடர்புபட்ட நாடுகளினது கடமைப்பாடாக உள்ளது,” என்றது குறிப்பிட்டது.
முனீச் நகரை மையமாக கொண்ட உலக உகூர் காங்கிரஸ் (World Uyghur Congress - WUC) நிர்வாக தலைவர் இசாவிற்கு வழங்கி இருந்த நுழைவனுமதியை இந்தியா, திங்களன்று, பெய்ஜிங் இன் அழுத்தத்தின் கீழ், இரத்து செய்தது. நாடுகடந்த திபெத்திய அரசாங்கத்தின் அரசியல் குழுவின் இருப்பிடமாகவும் மற்றும் திபெத்திய புத்த மத தலைவர் தலாய் லாமாவின் இருப்பிடமான தர்மசாலா நகரில் ஏப்ரல் 30-மே 1 இல் நடக்கவிருந்த சீன எதிர்ப்பு குழுக்களது கூட்டத்தில் இசா கலந்து கொள்ள இருந்தார். எவ்வாறிருப்பினும் இந்திய அதிகாரிகள் இந்து பத்திரிகைக்கு கூறுகையில், அந்த நுழைவனுமதி இசா பொது கூட்டங்களில் கலந்த கொள்ள அனுமதிக்காது, மேலும் இசா சரியான காரண வகையில் அதை விண்ணப்பித்தால் மீண்டும் வழங்கப்படலாம் என்றனர்.
சீனாவை தனிமைப்படுத்த மற்றும் அதற்கு எதிரான போருக்காக தயாரிப்பு செய்ய வாஷிங்டன் "ஆசியாவில் முன்னிலையை" வடிவமைத்திருப்பதற்கு இடையே, சீனப் பிரிவினைவாதிகளுக்கு ஆதரவளிப்பதற்கு புது டெல்லி முடிவெடுத்திருப்பது, மேலெழுந்துவரும் வெடிப்பார்ந்த சர்வதேச பதட்டங்களை குறிக்கிறது. இந்த பொறுப்பற்ற அமெரிக்க "முன்னிலை", கடுமையான சர்வதேச பதட்டங்களுக்கு எரியூட்டும் வகையில், சிரியாவில் நேட்டோவின் பினாமி போர் மற்றும் இந்தோ-பாகிஸ்தானிய மோதல் போன்ற ஏனைய மோதல்களுடன் சேர்ந்து வருகிறது,
லிபியா மற்றும் சிரியாவில் அல்கொய்தா இணைப்பு கொண்ட இஸ்லாமிய பயங்கரவாத படைகளை ஆதரித்து ஆட்சி மாற்றத்திற்கான போர்களைத் தூண்டிவிட்ட பின்னர், அமெரிக்க ஏகாதிபத்தியமும் அதன் கூட்டாளிகளும், உலகின் இரண்டாவது மிகப்பெரிய பொருளாதாரமும் ஓர் அணுஆயுத சக்தியுமான சீனாவிற்கு எதிராக அதேபோன்ற அணுகுமுறைகளை பிரயோகிக்கலாமா என பரிசீலித்து வருகின்றன. உத்தியோகப்பூர்வமாக அங்கீகரிக்கப்பட்ட 55 சிறுபான்மை இனங்களைக் கொண்ட ஒரு நாடான சீனாவிற்குள் வெடிப்பார்ந்த இன மற்றும் பிராந்திய பிளவுகள் இருப்பதை வாஷிங்டன் நன்கறியும்.
சிரிய ஜனாதிபதி பஷர் அல்-அசாத்தின் ஆட்சியை கவிழ்க்க சண்டையிட்டு வரும் நேட்டோ-ஆதரவிலான இஸ்லாமிய போராளிகள் குழுக்களில் உகூர் முஸ்லீம்கள் பெரியளவில் பங்கெடுத்திருப்பதன் மீது பெய்ஜிங் கவலை கொண்டுள்ளது. ஏப்ரல் 25 இல் அல் ஜசீரா குறிப்பிடுகையில், “சிரியாவில், உகூர்கள் அவர்களது சொந்த பிரிவுகளை உருவாக்கி உள்ளார்கள், அத்துடன் உஜ்பெக்கியர்கள், தஜிக்கியர்கள், க்ரிஜிஸ்கியர்கள் மற்றும் ஏனையவர்கள் உள்ளடங்கிய ஏனைய மத்திய ஆசிய பிரிவுகளுடனும் கூட்டு சேர்ந்துள்ளனர். அவர்கள் பெரும்பாலும் அல் கொய்தா இணைப்பு கொண்ட அல் நுஸ்ரா முன்னணிக்காக சண்டையிடுகிறார்கள்,” என்று குறிப்பிட்டது.
சிரிய போர்கள் முடிவுற்றதும், இந்த போராளிகள் அவர்களது சொந்த நாடுகளில் போர்களைத் தூண்டிவிட திரும்பலாம். செப்டம்பரில் ஒரு முன்னாள் பெண்டகன் மற்றும் அரசுத்துறை அதிகாரியான கிறிஸ்டினா லின் எழுதுகையில், அசாத், நேட்டோ ஆதரவிலான இஸ்லாமியர்கள் வசம் தோல்வி அடைந்தால், "பின்னர் மத்தியக் கிழக்கின் இதயதானத்தில் ஒரு புதிய மற்றும் நன்கு ஆதாரங்களைக் கொண்ட சிரிய செயல்பாட்டு மையத்தின் ஆதரவுடன், ரஷ்யாவின் செசன்யா, சீனாவின் சின்ஜியாங் மற்றும் இந்தியாவின் காஷ்மீர் போராளிகள் அவர்களது ஜிஹாத்தைத் தொடர, அவர்களது சொந்த நாட்டை நோக்கி பார்வையைத் திருப்புவார்கள்,” என்றார்.
இந்த கொள்கை அசாதாரணமான வகையில் பொறுப்பற்றதாகும். பிரதான சக்திகள் சீனாவில் பிரிவினைவாதத்தைப் பட்டவர்த்தனமாக ஊக்குவிப்பதற்கு அது இராணுவ பலத்தைப் பிரயோகிக்கும் என்று அச்சுறுத்தி, அது வன்முறையானரீதியில் எதிர்நடவடிக்கை எடுக்கக்கூடும் என்பதை பெய்ஜிங் தெளிவுபடுத்தி உள்ளது. 2005 சீன தேசிய மக்கள் காங்கிரஸின் (NPC) போது அந்த ஆட்சி, தாய்வானின் எந்தவொரு சுதந்திர பிரகடனத்திற்கு விடையிறுப்பாக போருக்குள் இறங்க சூளுரைத்து, ஒரு "பிரிவினைவாத-தடை சட்டத்தை" நிறைவேற்றியது. தாய்வானின் சுதந்திர பிரகடனம் சீனாவின் பிரிவினைவாத போக்குகளுக்கான பரந்த சர்வதேச ஊக்குவிப்புக்குச் சமிக்ஞை ஆகிவிடுமென அது அஞ்சுகிறது.
இந்தியா ஒரு வல்லரசு அந்தஸ்தைப் பெற வாஷிங்டனுடனான அதன் உறவை பக்கபலமாக கொள்ள முனைந்துள்ள வேளையில், இசாவிற்கு நுழைவனுமதி வழங்குவதென்ற இந்தியாவின் முடிவானது, அமெரிக்க ஏகாதிபத்தியத்தின் பிற்போக்குத்தனமான சூழ்ச்சிகளுடன், குறிப்பாக ஆசியாவில் "முன்னிலை" உடன் இந்திய வெளியுறவுக் கொள்கை அதிகரித்தளவில் அணிசேர்வதை சுட்டிக்காட்டுகிறது. சீனாவை இலக்கில் வைத்த அமெரிக்க படைகளை புது டெல்லி ஏற்கனவே அதன் மண்ணில் நிலைநிறுத்த பரிசீலித்து வருவதுடன் சேர்ந்து, இப்போது அது அப்பிராந்தியத்தில் கட்டுப்படுத்தவியலா நிறைய இன மோதல்களில் தன்னைத்தானே சிக்க வைத்து கொள்கிறது.
சீனாவின் வடமேற்கு சுயாட்சி பிராந்தியமான சின்ஜியாங், துர்கிக் மொழி பேசும் பெரும்பான்மை முஸ்லீம் உகூர் இன சிறுபான்மையினரின் தாயகமாக உள்ளது. சின்ஜியாங் குறிப்பிடத்தக்க இனவாத கலகங்களைக் கண்டுள்ளது, இவற்றில் நூற்றுக் கணக்கானவர்கள் உயிரிழந்துள்ளனர். 1949 புரட்சிக்குப் பின்னர் சீனக் கம்யூனிஸ்ட் கட்சி ஆட்சியின் கீழ் வந்ததில் இருந்து ஒடுக்குமுறையை முகங்கொடுத்துள்ளதாக WUC இல் உள்ள உகூர் பிரிவினைவாதிகள் கூறுகின்றனர்.
1980 களின் போக்கில் சீனாவில் முதலாளித்துவத்தை மீட்டமைத்ததில் இருந்து முன்பினும் அதிகமாக ஹன் சீன தேசியவாதத்தை ஊதிவிடுவதை சார்ந்திருந்த சீன அரசாங்கம், சின்ஜியாங்கில் கலகங்களை மற்றும் பயங்கரவாத நடவடிக்கைகளை தூண்டிவிடுவதாக உலக உகூர் காங்கிரஸை குற்றஞ்சாட்டுகிறது.
உலக உகூர் காங்கிரஸ் என்பது அமெரிக்க மற்றும் ஐரோப்பிய ஏகாதிபத்தியத்தின் ஒரு பிற்போக்குத்தனமான கருவியாகும். அது நேரடியாக ஜனநாயகத்திற்கான தேசிய நிதியுதவி (NED) அமைப்பிடமிருந்து நிதியுதவிகளைப் பெறுகிறது, இந்த அமைப்பிற்கான பிரதான நிதியுதவியாளர் அமெரிக்க அரசாங்கமாகும். அதன் வலைத்தள தகவல்களின்படி, வெளியில் தெரியாத "மனித உரிமைகள் ஆராய்ச்சி மற்றும் ஆலோசனை திட்டங்களுக்காக" NED அமைப்பு 2015 இல் மட்டும் உலக உகூர் காங்கிரஸிற்கு 215,000 டாலர் வழங்கியது.
உலக உகூர் இளைஞர் காங்கிரஸ் (WUYC) மற்றும் கிழக்கு துர்கிஸ்தான் தேசிய காங்கிரஸ் (ETNC) உட்பட பல்வேறு நாட்டுக்கு வெளியிலிருக்கும் உகூர் குழுக்களை உள்ளடக்கி, உலக உகூர் காங்கிரஸ் ஜேர்மனியின் முனீச்சில் 2014 இல் நிறுவப்பட்டது. அமெரிக்காவில் வசிக்கும் உலக உகூர் காங்கிரஸின் தலைவர் உட்பட அதன் தலைவர்களில் பெரும்பான்மையினர் வெளிநாடுகளில் வாழ்கின்றனர், இசா ஜேர்மனியிலும் மற்றும் ஏனையவர்கள் ஆஸ்திரேலியா, பெல்ஜியம், டென்மார்க், பிரான்ஸ், ஜப்பான், பிரிட்டன் மற்றும் ஸ்வீடனிலும் உள்ளனர்.
ஒரு வணிக பெண்மணியான காதீர், அவரது நில/கட்டிட பேரத்துறை சொத்துக்கள் மூலமாக மற்றும் ஒரு பன்னாட்டு பெருநிறுவனத்தில் அவரது பங்குடைமையைக் கொண்டும் 1980 களில் ஒரு மில்லியனர் ஆனவர். ஜூன் 2007 இல் பிராக் இல் நடத்தப்பட்ட ஜனநாயகம் மற்றும் பாதுகாப்பிற்கான மாநாட்டில், காதீர் அப்போதைய அமெரிக்க ஜனாதிபதி ஜோர்ஜ் டபிள்யு. புஷ்ஷை இரகசியமாக சந்தித்தார். அப்பெண்மணி போன்றவர்களை "அவர்களது இராணுவ ஆயுதங்களை விட அல்லது மண்ணுக்கடியில் உள்ள எண்ணெய்யை விட மிக மிக மதிப்பார்ந்தவர்கள்" என்று புஷ் பாராட்டியவராவார்.
இசாவை பொறுத்த வரையில், கடந்த மாதம் தான் அவர் வாஷிங்டனில் பாதிக்கப்பட்டவர்களுக்கான கம்யூனிச ஞாபகார்த்த அமைப்பின் ஒரு விருதை பெற்றிருந்தார்.
எண்ணெய், எரிவாயு மற்றும் அரிய பூமி கனிமங்களைக் கொண்டுள்ளதும் மற்றும் மூலோபாயரீதியில் யுரேஷியாவின் மையத்தில் அமைந்துள்ளதுமான சின்ஜியாங் (Xinjiang) ஐ வாஷிங்டன் அதன் மூலோபாய நலன்களுக்கு அத்தியாவசியமானதாக பார்க்கிறது. ரஷ்யா, கஜகிஸ்தான், கிர்கிஸ்தான், தஜிகிஸ்தான், ஆப்கானிஸ்தான், மங்கோலியா மற்றும் இந்திய மாநிலம் ஜம்மு & காஷ்மீர் ஆகியவற்றை சின்ஜியாங் எல்லைகளாக கொண்டுள்ளது.
சீன ஏற்றுமதிகள் பாகிஸ்தானிய கராச்சி துறைமுகத்தை அடைந்து, பின்னர் தெற்காசியாவிற்குள் நுழைய அப்பகுதியை கடந்தாக வேண்டும் என்கிற நிலையில், அப்பிராந்தியம் ஓர் முக்கிய வர்த்தக மற்றும் போக்குவரத்து மையமாகவும் உள்ளது. இது கிழக்கு ஆசியாவை ஐரோப்பாவுடன் இணைக்கும், சீனாவிலிருந்து மத்தியத் தரைக்கடல் வரையில் இணைக்கும் சீனாவின் விருப்பமான பட்டுச்சாலை உள்கட்டமைப்பு திட்டத்தில் ஒரு அதிமுக்கிய பாதையாக உள்ளது. எரிசக்தியில் இருந்து கட்டுமானம் மற்றும் தொழில்நுட்ப நிறுவனங்கள் வரையில், சுமார் 53 சீன அரசு நிறுவனங்கள், சின்ஜியாங்கில் 685 திட்டங்களில் 300 பில்லியனை முதலீடு செய்துள்ளன.
அப்பிராந்தியத்தில் அமெரிக்க மற்றும் ஐரோப்பிய ஏகாதிபத்தியத்தின் தலையீடு முற்றிலும் பிற்போக்குத்தனமானது என்கிற அதேவேளையில், சீன வணிக பிரபுத்துவத்தின் பதிலிறுப்பு குறைந்தபட்ச முற்போக்கானது கூட கிடையாது. பெய்ஜிங் உம் தேசியவாதம் மற்றும் இராணுவவாதத்தை ஊக்குவித்து வருகிறது, அதேவேளையில் சின்ஜியாங் இல் பொலிஸ் ஒடுக்குமுறையை அதிகரித்து வருவதுடன், அதன் சர்வதேச இராஜாங்க உபாயங்களின் பாகமாக பயங்கரவாத குழுக்களுக்கு அரசியல் ஆதரவை விரிவாக்கி வருகிறது.
இந்திய பத்திரிகை செய்திகளின்படி, இசாவிற்கு நுழைவனுமதி வழங்குவதென்ற புது டெல்லியின் தீர்மானம், பாகிஸ்தான் பக்கம் சாய்ந்து காஷ்மீரில் பாகிஸ்தானிய போராளிகள் குழுவான ஜெய்ஷ்-ஈ-மொஹம்மத் (Jaish-e-Mohammad - JeM) ஐ பாதுகாக்க உதவுவதென்ற சீனாவின் முடிவுக்கு எதிரான ஒரு பழிக்குபழி வாங்கும் நகர்வின் பாகமாகும். JeM தலைவர் மசூத் அஜாரை ஐக்கிய நாடுகளின் அல் கொய்தா-இஸ்லாமிய அரசு பட்டியலில் சேர்க்க வேண்டுமென்ற புது டெல்லியின் கோரிக்கையை தடுத்த சீனாவின் தீர்மானத்திற்கு இம்மாதம் இந்தியா ஆத்திரத்துடன் விடையிறுத்திருந்தது.
இசாவிற்கு நுழைவனுமதி கொடுப்பதில்லை என்ற இந்தியாவின் முடிவை சீனா வரவேற்றதுடன், அஜாரை ஐக்கிய நாடுகள் சபையின் பயங்கரவாதிகள் பட்டியலில் நிறுத்துவது மீதான கருத்துவேறுபாடுகளை இந்தியாவும் பாகிஸ்தானும் நேரடியாக பேசி தீர்க்குமாறு பரிந்துரைத்தது. செவ்வாயன்று வெளியுறவு அமைச்சக செய்தி தொடர்பாளர் Hua Chunying கூறுகையில், “மசூத் அஜாரை பட்டியலில் சேர்க்கும் விவகாரத்தில் சம்பந்தப்பட்ட எல்லா தரப்புகளும் நேரடியான பேசி, ஆழ்ந்த ஆலோசனைகளைக் கொண்டு ஒரு தீர்வு காண்பதை நாங்கள் ஊக்குவிக்கிறோம். சீனா சம்பந்தப்பட்ட எல்லா தரப்பினருடன் அதன் பேச்சுவார்த்தைகளைத் தொடர விரும்புகிறது,” என்றார்.
இந்தியா மற்றும் பாகிஸ்தானை போரின் விளிம்பிற்குக் கொண்டு வந்த டிசம்பர் 2001 இந்திய நாடாளுமன்றம் மீதான தாக்குதல் உட்பட இந்திய இலக்குகள் மீது பல மரணகதியிலான தாக்குதல்களை நடத்தியவராக அஜார் சந்தேகிக்கப்படுகிறார்.
By Kumaran Ira
28 April 2016
http://www.wsws.org/tamil/articles/2016/may2016/disa-m07.shtml

Saturday, 7 May 2016

ட்ரம்பின் வெற்றி: அமெரிக்க அரசியலில் ஓர் அபாயகரமான திருப்புமுனை

Trump’s victory: A dangerous turning point in American politics


இன்றைய நிலையில் குடியரசு கட்சி ஜனாதிபதி வேட்பாளராக டோனால்ட் ட்ரம்ப் முன்வரக்கூடியது பெருமளவில் சாத்தியமாவது, அமெரிக்காவினதும் மற்றும் உலக அரசியலினதும் ஓர் அபாயகரமான திருப்புமுனையைக் குறிக்கிறது. இரண்டு முதலாளித்துவ கட்சிகளில் ஒன்றின் வேட்பாளராக ஒரு பாசிச வனப்புரையாளர் தேர்ந்தெடுக்கப்பட்டிருப்பது, அமெரிக்க ஜனநாயகம் ஒரு அழுகிச்செல்லும் உயர்கட்டத்தை அடைந்திருப்பதற்கான சர்ச்சைக்கிடமற்ற ஆதாரமாகும். அமெரிக்க ஆளும் வர்க்கத்தின் ஒரு கணிசமான பிரிவு தங்களின் நலன்களைப் பாதுகாக்க அமெரிக்காவிற்குள் பாரிய அரசியல் ஒடுக்குமுறையும் மற்றும் அதன் எல்லைகளுக்கு வெளியே உள்ள அதன் போட்டியாளர்கள் மற்றும் எதிரிகளுக்கு எதிராக போரும் அவசியப்படுவதாக தீர்மானித்துவிட்டது என்பதையே எதிர்வரவிருக்கும் ட்ரம்ப் இன் நியமனம் அர்த்தப்படுத்துகிறது.
ட்ரம்ப் இன் நியமனம் ஒரு தற்செயலானதோ அல்லது ஒரு தனித்த சம்பவமோ கிடையாது. அது அமெரிக்க முதலாளித்துவத்தின் நீடித்த நெருக்கடியில் வேரூன்றியுள்ளதுடன், அதன் வரலாற்று முதலாளித்துவ-ஜனநாயக கட்டமைப்பு முறிந்து போயிருப்பதுடன் சம்பந்தப்பட்டதாகும். தசாப்தங்களுக்கும் அதிகமான காலத்தில் அபிவிருத்தி அடைந்த ஒரு நிகழ்வுபோக்கின் விளைபொருளே ட்ரம்ப் இன் வெற்றியாகும். இந்த நிகழ்வு 1972-74 இன் வாட்டர்கேட் நெருக்கடி இருந்து ஆரம்பிக்கின்றது. அரசியலமைப்பினை தவிர்த்து செல்ல நிக்சன் நிர்வாகம் குற்றகரமாக முயன்றது அதில் சம்பந்தப்பட்டிருந்தது. ரீகன் நிர்வாகம், காங்கிரஸில் நிறைவேற்றப்பட்ட சட்டங்களை குற்றகரமான மீறுவதற்கான முயற்சியிலிருந்து எழுந்த 1986 ஈரான்-கொன்ட்ரா நெருக்கடி, மற்றும் 2000 தேர்தலை களவாடியதன் மூலமாக ஜோர்ஜ் டபிள்யு. புஷ் ஜனாதிபதியாக நியமிக்கப்பட்டமை ஆகியவையும் இந்த நிகழ்வுபோக்கின் ஏனைய முக்கிய மைல்கற்களில் உள்ளடங்கும்.
முன்பினும் அதிக பகிரங்கமாக குற்றகர குணாம்சத்தை ஆட்சி முறைகளில் ஏற்றுவரும் பெருநிறுவன-நிதியியல் பிரபுத்துவத்திடம் முழுமையாக அடிபணிந்ததன் மூலமாக, முற்றிலும் ஊழலில் சிக்கியுள்ள ஓர் அரசியல் அமைப்புமுறையால் மேற்மட்டத்திற்குக் கொண்டு வரப்பட்டிருப்பவர் தான் டோனால்ட் ட்ரம்ப்.
ஊடகங்களால் உருவாக்கப்பட்ட ஒரு பில்லினிய வணிக பிரமுகரை மற்றும் தனியொருவராகவே தசாப்தகால பொருளாதார வீழ்ச்சியைத் திசைதிருப்பிவிடுவதாக வாக்குறுதியளிக்கும் ஒரு பிரபலத்தைக் முன்னுக்குக் கொண்டு வருவதன் மூலமாக, பாரிய சமூக அதிருப்தி ஒரு இடதுசாரி திசையில் அபிவிருத்தி அடைவதைத் தடுப்பதற்கான அமெரிக்க ஆளும் உயரடுக்கு பிரிவுகளது ஒரு முயற்சியை ட்ரம்ப் இன் பிரச்சாரம் பிரதிநிதித்துவம் செய்கிறது. புலம்பெயர்ந்தவர்களையும் ஏனைய சிறுபான்மையினரையும் பலிக்கடாவாக்க, பொருளாதாரரீதியில் பாதிக்கப்பட்டிருப்பவர்களிடம் ட்ரம்ப் எரிச்சலூட்டும் விதத்தில் அழைப்புவிடுவதுடன், மேலும் பொருளாதார மற்றும் வெளியுறவு கொள்கைகளில் அதீத தேசியவாதத்தை ஊக்குவிக்கிறார். மொத்தத்தில் இந்த கேடு விளைவிக்கும் அரசியல் வேலைத்திட்டம் மிக வெளிப்படையான ஒரு பாசிசவாத குணாம்சத்தைக் கொண்டுள்ளது.
குடியரசு கட்சி ஸ்தாபகம் அவரது பிரச்சாரத்தை வரவேற்கவில்லை என்பதும் மற்றும் அவரது வெற்றியால் நிலைகுலைந்துள்ளது என்பதும் உண்மை தான். ஆனால் அவர் வேட்பாளராக நிறுத்தப்பட்டதால் உருவான இந்த முரண்பாடுகள், அமெரிக்க பெருநிறுவன-நிதியியல் பிரபுத்துவத்தின் ஒரு அத்தியாவசிய பிரதிநிதி தான் ட்ரம்ப் என்ற உண்மையை மாற்றிவிடவில்லை. இந்த குறிப்பிட்ட பாசிச கும்பல், ஹிட்லரைப் போல, அடிமட்ட வர்க்க மோசமான குடியிருப்புகளில் இருந்தும், துர்நாற்றம் வீசும் மதுச்சாவடிகளில் இருந்தும் வந்ததில்லை. நியூயோர்க் நிதியியல் உயரடுக்கின் ஒரு நீண்டகால நிலைக்குழு அங்கத்தவரான ட்ரம்ப், அந்நகரின் ஊழல் நிறைந்த நில/கட்டிடத்துறையில் இருந்து அவரது பில்லியன்களைச் சேர்த்தவர்.
ட்ரம்ப் இன் எழுச்சி அமெரிக்க அரசியல் கலாச்சாரத்தின் நோய்பீடித்த குணாம்சத்திற்கும் மற்றும் பெருநிறுவன நலன்களால் கட்டுப்படுத்தப்பட்டுள்ள இருகட்சி அமைப்புமுறையின் இயங்குமுறையைக் கொண்டு சமூக முரண்பாடுகளை ஒடுக்குவதற்குமான ஒரு வெளிப்பாடாகும். தொழிலாள வர்க்க வாழ்க்கை தரங்கள் மீதான தாக்குதலில் ஜனநாயக மற்றும் குடியரசு கட்சிகள் இரண்டுமே பங்கெடுத்தமை, அரசியல் அமைப்புமுறைக்கு வெளியிலிருந்து வந்தராக கூறப்படும் ஒரு வேட்பாளருக்கு ஆதரவை உருவாக்கி உள்ளது.
எட்டாண்டுகளுக்கு முன்னர், பராக் ஒபாமா ஜனாதிபதி வேட்பாளராக தேர்ந்தெடுக்கப்பட்டதற்கான கூடிய காரணம் ஆழமாக மதிப்பிழந்த புஷ் நிர்வாகத்தின் கொள்கையில் மக்கள் முக்கிய மாற்றங்களை எதிர்பார்த்தனர். ஆனால் அதற்கு நேரெதிரானது நடந்தது. 2008 நிதியியல் பொறிவுக்குப் பின்னர் பதவிக்கு வந்த ஒபாமா, தொழிலாள வர்க்கத்திற்கு நாசகரமான விளைவுகளுடன் வங்கிகளுக்கு முட்டுக்கொடுக்கவும் மற்றும் மிகப்பெரிய பணக்காரர்களின் செல்வவளத்தை மீட்கவும் செயல்பட்டார். முழு வெறுப்புடன், அந்த ஜனநாயக கட்சி ஜனாதிபதி அவரது மிகவும் பிற்போக்குத்தனமான நடவடிக்கைகளை முற்போக்கான சீர்திருத்தங்களாக தொகுத்தளித்தார். புதிதாக வேலைக்கு சேர்க்கப்பட்ட வாகனத் துறை தொழிலாளர்களின் கூலிகளைக் குறைத்ததை, வாகனத் தொழில்துறையை "காப்பாற்றுவதற்காக" என்று கூறப்பட்டது; காப்பீட்டு நிறுவனங்களைச் செழிப்பாக்கும் மற்றும் மருந்துத்துறையை ஏகபோகமாக்கும் மற்றும் தொழில் வழங்குனர்களின் மருத்துவக் காப்பீட்டு செலவுகளைக் குறைக்கும் ஒரு வேலைத்திட்டம் "மருத்துவ சிகிச்சைக்கான சீர்திருத்தம்" என்றானது, பின்னர் அது "ஒபாமாகேர்" என்று மறுபெயர் வழங்கப்பட்டது.
ஹிலாரி கிளிண்டன், ஒபாமா நிர்வாகத்தினது “வெற்றிகளைத்” தொடர்ந்து எடுத்துச் செல்வதாக கூறிக்கொண்டு போட்டியிடுகிறார். ட்ரம்ப் க்கு ஒரு மாற்றீடாக பிரதிநிதித்துவம் செய்வதற்குப் பதிலாக, அப்பெண்மணி அதே அரசியல் ஊழல் மற்றும் பிற்போக்குத்தனத்தின் நிகழ்வுபோக்குக்கு ஆளுருவாக திகழ்கிறார், ஆனால் குடியரசு கட்சியின் கட்டமைப்பிற்கு மாறாக ஜனநாயக கட்சியின் கட்டமைப்பிற்குள் இருக்கிறார் அவ்வளவுதான். அமெரிக்க இராணுவ பலத்தை அதிகரிப்பது குறித்தும் மற்றும் வாஷிங்டனின் கட்டளைகளுக்கு எந்தவித அன்னிய எதிர்ப்பையும் ஏற்றுக் கொள்ள முடியாது என்றும் ட்ரம்ப் வெற்றுரைகளை வழங்குகின்ற அதேவேளையில், கிளிண்டனோ ஏற்கனவே பத்தாயிரக் கணக்கானவர்களின் இரத்தக்கறையை அவரது கரங்களில் கொண்டிருக்கிறார். குறிப்பிடும் வகையில், இராணுவ-உளவுத்துறை எந்திரத்திற்குத் தானே மிகவும் நம்பகமான தேர்வாக இருக்க முடியுமென காட்டுவதற்காக, தலைமை தளபதியாக விருப்பத்திற்குரியவராக இருப்பார் ட்ரம்ப் ஐ எதிர்பார்க்க முடியாதென அவரை தாக்கியதே, ட்ரம்ப் வேட்பாளராக வளர்ந்ததற்கு அப்பெண்மணி காட்டிய முதல் விடையிறுப்பாகும்.
ஜனநாயக கட்சி அதன் எரிச்சலூட்டும் அடையாள அரசியல் வாய்சவுடால் மூலமாக தசாப்தகாலங்களுக்கு முன்னரே வலதிற்கு மாறியிருப்பதை மூடிமறைக்கிறது, அது முற்றிலுமாக இனம், பால் மற்றும் பாலியல் நிலைநோக்கு பிரச்சினைகளில் ஒருங்குவிந்துள்ளது. இது, வெள்ளையின, கருப்பின, ஹிஸ்பானிக் இன மற்றும் புலம்பெயர்ந்த பரந்த பாரிய மக்களிடையே நிலவிய ஆழ்ந்த மற்றும் அதிகரித்து வந்த பொருளாதார மற்றும் சமூக துயரங்களின் அளவினை மட்டும் புறக்கணிக்கவில்லை. இது தொழிலாள வர்க்கத்தின் மிகவும் தனிச்சலுகை கொண்ட நடுத்தர வர்க்க பிரிவுகளிடையே, குறிப்பாக வெள்ளையினத் தொழிலாளர்களிடையே, இழிவுபடுத்தும் குணத்தையும் ஊக்கப்படுத்தியது. ஒரு இணைக்க முடியாத சமூக இடைவெளியால் வெள்ளையின தொழிலாளர்களிடம் இருந்து ட்ரம்ப் ஒரு பில்லியனராக பிளவுபட்டிருந்தாலும் கூட, அவர்களுக்கு வக்காலத்து வாங்கும் ஒரு நபராக காட்டிக்கொள்ள இது தான் ட்ரம்பை அனுமதிக்கிறது.
தொழிலாளர்கள் மற்றும் இளைஞர்களின் மிகப்பெரும் பிரிவுகளுக்கு மத்தியில், அங்கே முதலாளித்துவ மாற்றீட்டுக்கான அதிகரித்துவரும் விருப்பம் உள்ளது. இந்த உண்மை, ஒரு சோசலிஸ்டாக பரவலாக அடையாளம் காணப்பட்ட பேர்ணி சாண்டர்ஸின் ஜனாதிபதி வேட்பாளர் பிரச்சாரத்திற்கு கிடைத்த ஆதரவில் எடுத்துக்காட்டப்பட்டது. ஆனால் சாண்டர்ஸ் தலைமையின்கீழ், மில்லியன் கணக்கான இளைஞர்களும் தொழிலாளர்களும் ஜனநாயக கட்சிக்குப் பின்னால் திருப்பிவிடப்பட்டு வருகிறார்கள், இறுதியில் ஹிலாரி கிளிண்டன் வசம் ஒப்படைக்கப்படுவார்கள். இதுவொரு அரசியல் முட்டுச்சந்தாகும்.
ஆழமான அபாயங்கள் முன்னால் உள்ளன. முதலாளித்துவ வர்க்க ஜனநாயகத்தின் அதீத நெருக்கடி தானே தீர்க்கப்படாது. நவம்பரில் ட்ரம்ப் வெற்றி பெறவில்லை என்றாலும் கூட, முன்பினும் அதிக அச்சுறுத்தும் வேறொரு பிரமுகருக்கு களம் அமைக்கப்படும். ஜனவரியில் ஆட்சிக்கு வரவிருக்கும் அரசாங்கத்தின் தலைமையில் ட்ரம்ப் இருந்தாலும் சரி இல்லாவிட்டாலும் சரி, அந்த அரசாங்கம் அமெரிக்க வரலாற்றிலேயே மிகவும் பிற்போக்குத்தனமானதாக, வன்முறையானதாக மற்றும் சர்வாதிகாரமானதாக இருக்கும்.
அவசியமான அரசியல் முடிவுகளை இதிலிருந்து எடுக்க வேண்டும். ஒரு உண்மையான சோசலிச இயக்கத்தை அபிவிருத்தி செய்வது வாழ்வா சாவா என்ற முக்கியமாகின்றது. தொழிலாள வர்க்கம், இரண்டு முதலாளித்துவ-கட்டுப்பாட்டிலான கட்சிகளுக்கும் மற்றும் அவற்றின் வலதுசாரி வேட்பாளர்களுக்கும் சவால் விடுத்து, ஒரு சுயாதீன அரசியல் சக்தியாக முன்னுக்கு வர வேண்டும். இது தான் சோசலிச சமத்துவக் கட்சியின் (SEP) மற்றும் நமது ஜனாதிபதி வேட்பாளராக ஜெர்ரி வைட் மற்றும் துணை ஜனாதிபதி வேட்பாளராக நைல்ஸ் நிமுத் ஆல் தொடங்கப்பட்ட பிரச்சாரத்தின் முக்கியத்துவமாகும். இந்த பிரச்சாரத்தைக் கட்டியெழுப்ப ஆதரிக்குமாறும் மற்றும் உதவுமாறும் உலக சோசலிச வலைத்தளத்தின் எல்லா வாசகர்களுக்கும் நாம் அழைப்புவிடுக்கிறோம்.
By Patrick Martin
5 May 2016
 கட்டுரையாளர் பரிந்துரைக்கும் ஏனைய கட்டுரைகள்:

Trump’s “America First” speech and the US war election

[28 April 2016]

ட்ரம்ப் இன் சூப்பர் செவ்வாய்க்கிழமையில் இருந்து என்ன அரசியல் முடிவுகளை பெற வேண்டும்? [3 March 2016]

http://www.wsws.org/tamil/articles/2016/may2016/trum-m07.shtml

ஏகாதிபத்திய போருக்கும், தமிழ் தேசியவாதத்தின் வங்குரோத்துக்கும் எதிராக சோசலிசத்திற்கான போராட்டம்.

The socialist struggle against war and the bankruptcy of Tamil nationalism


நான்காம் அகிலத்தின் அனைத்துலகக் குழுவின் பிரான்ஸ் ஆதரவாளர்கள் மே 15 ம் திகதி பாரிசில் ஒரு பொதுக்கூட்டத்தினை ஒழுங்கு செய்துள்ளனர். பேச்சாளர்கள் இலங்கையிலும் ஆசியாவிலும் கூர்மையடையும் போர் ஆபத்தின் மத்தியில் தமிழ் தேசியவாத கட்சிகளின் வங்குரோத்து தொடர்பாகவும், தமிழ் தொழிலாளர்களும், ஐரோப்பிய தொழிலாளர்களும் போரையும் சிக்கன நடவடிக்கைகளையும் எப்படி எதிர்ப்பது என்பது தொடர்பாகவும் உரையாற்றுவார்கள். தமிழ் சமூகத்தினதும் அத்தோடு ஏனைய தேசிய இனங்களினதும் தொழிலாளர்கள், இளைஞர்கள், புத்திஜீவிகளை கலந்து கொள்ளுமாறு அழைக்கின்றோம்.
நீண்ட காலமாக ஐரோப்பாவில் தமிழ் புலம்பெயர்ந்தோரினது அரசியல் வாழ்க்கையில் ஆதிக்கம் செலுத்திய தமிழ் தேசியவாத கட்சிகள் மதிப்பிழந்து விட்டன. இலங்கையில் தமிழ் தேசிய கூட்டமைப்பினால் தலைமை தாங்கப்படும் அவர்களின் கூட்டு சிந்தனையாளர்கள் கடந்த வருடம் ஜனாதிபதி மைத்திரிபால சிறிசேன, பிரதமர் ரணில் விக்கிரமசிங்க ஆகியோரை பதவியில் அமர்த்திய அமெரிக்க ஆதரவு ஆட்சிமாற்றத்தின் வெட்கங்கெட்ட ஆதரவாளர்களாகி விட்டனர்.
நான்காம் அகிலத்தின் அனைத்துலகக் குழுவின் இலங்கை பிரிவான சோசலிச சமத்துவக் கட்சியின் துணை செயலாளர் தீபால் ஜெயசேகர கூட்டத்தின் பிரதம உரையை வளங்குவார். மாறி மாறி ஆட்சிக்கு வந்த கொழும்பு அரசாங்கங்களின் தமிழர் விரோத இனவாத யுத்தத்திற்கு எதிராக சோசலிச, சர்வதேசிய அடித்தளத்திலான சோசலிச சமத்துவ கட்சியின் சிங்கள, தமிழ், முஸ்லீம் தொழிலாளர்களை ஐக்கியப்படுத்தும் போராட்டத்தில் அவர் கிட்டத்தட்ட மூன்று தசாப்தங்களாக ஒரு தலைமைப் பாத்திரத்தினை வகித்து வருகின்றார்.
மே 15 ல் ஜெயசேகர, வாஷிங்டன் ஒரு அமெரிக்க சார்பு ஆட்சியினை கொழும்பில் நிர்மாணித்தது, எப்படி ஆசியா முழுமைக்குமான நாடுகளுடன் இணைந்து சீனாவினை சுற்றி வளைப்பதன் மூலம் போருக்கு தயார் செய்யும் அதனது பரந்த திட்டத்தின் ஒரு பாகம் என்பதை விளங்கப்படுத்துவார். இலங்கை, அனைத்து ஏகாதிபத்திய சக்திகளினதும் போருக்கான உந்துதலின் உலக அரசியல் நீர்ச்சுளிக்குள் இழுக்கப்பட்டு இருக்கின்றது.
சோசலிச சமத்துவக் கட்சியின், இலங்கை, இந்திய உபகண்ட தொழிலாளர்களை போருக்கெதிராக ஐக்கியப்படுத்தும் போராட்டம், நான்காம் அகிலத்தின் அனைத்துலகக் குழுவின் போருக்கு எதிராக சோசலிசத்திற்கான உலக தொழிலாளர்களை க்கியப்படுத்தும் போராட்டத்தின் ஒரு பிரிக்க முடியாத பாகமாக இருக்கின்றது. இந்த போராட்டத்தின் படிப்பினைகள் ஐரோப்பாவில் தமிழ் தொழிலாளர்களுக்கு மட்டுமன்றி ஏகாதிபத்தியத்தினால் கட்டவிழ்த்து விட்ட போர் முன்னெடுப்புகளுக்கும், சிக்கன நடவடிக்கைகளுக்கும் எதிராக போராட முனையும் முழு ஐரோப்பிய தொழிலாள வர்க்கத்திற்கும் இன்றியமையாதது.

காலம்: 15.05.2016, நேரம்: பிற்பகல் 3:00இடம்: Auberge de Jeunesse HI Yves Robert20, esplanade Nathalie Sarraute (en face du 43 rue Pajol)75018 Paris Métro: Marx Dormoy, Ligne 12 - La Chapelle, Ligne 2 - Riquet, Ligne 7

http://www.wsws.org/tamil/articles/2016/may2016/meet-m05.shtml

5 May 2016


Sunday, 1 May 2016

உலகத் தொழிலாளர்களே ஒன்றுபடுங்கள்! - மே 1, ஞாயிறு இணையவழி கூட்டம்


மே 1, ஞாயிறு இணையவழி கூட்டம்

முதலாளித்துவத்தையும் ஏகாதிபத்தியத்தையும் தூக்கியெறி! 
போர், சர்வாதிகாரம் மற்றும் வறுமைக்கும் எதிராக அனைத்துலகத் தொழிலாள வர்க்கத்தை ஐக்கியப்படுத்து!
அமைதி, சமத்துவம், சோசலிசத்துக்காக!



உலகத் தொழிலாளர்களே ஒன்றுபடுங்கள்!

மே 1, ஞாயிறு, நான்காம் அகிலத்தின் அனைத்துலகக் குழுவானது சர்வதேச தொழிலாள வர்க்க ஐக்கியத்தின் வரலாற்று நாளான மே தினத்தைக் கொண்டாட, ஒரு சர்வதேச இணையவழி கூட்டத்தை நடத்தவுள்ளது.
பதிவு செய்துகொண்டவர்களுக்கு நிகழ்வின் பின்னர் அதன் ஒலிப்பதிவு கிடைக்கும். மேலும் தகவல்கள் வரவுள்ளன.

நேர வலயங்கள்

அமெரிக்கா கிழக்கு நேரம் (EDT): பி.ப. 1:00 - பி.ப. 3:00
லொஸ் ஏஞ்சல்ஸ், கலிபோர்னியா (PDT): பி.ப. 10:00 - பி.ப. 12:00
மெக்ஸிகோ நகரம், மெக்ஸிகோ: பி.ப. 12:00 - பி.ப. 2:00
லண்டன், இங்கிலாந்து (BST): பி.ப. 6:00 - பி.ப. 8:00
பேர்லின், ஜேர்மனி: பி.ப. 7.00 – பி.ப. 9.00
கெய்ரோ, எகிப்து: பி.ப. 7.00 – பி.ப. 9.00
மொஸ்கோ, ரஷ்யா: பி.ப. 8.00 – பி.ப. 10.00
இந்தியா மற்றும் இலங்கை: பி.ப. 10.30 – மு.ப. 12.30
பெய்ஜிங், சீனா: மு.ப. 1.00 – மு.ப. 3.00 (மே 2, திங்கள்)
சிட்னி, ஆஸ்திரேலியா: மு.ப. 3.00 – மு.ப. 5.00 (மே 2, திங்கள்)

உங்கள் நேர வலயத்தை காண இங்கே கிளிக் செய்யவும்.

LinkWithin

Related Posts Plugin for WordPress, Blogger...

Popular Posts